یا حضرت معصومه (س)
.
#زبدةالاشعار
.
: @nohe_torki
.
محمد صحتی سردرودی
.
آللاها گؤزل بنده یا حضرت معصومه
زهرالیقا زیبنده یا حضرت معصومه
.
.
هجرتده، دیانت ده، سن هاجر و ساراسن
تقواده، عبادتده، سن مریم عذرا سن
عصمتده، وجاهتده، زهرا كیمی حورا سن
غربتده، مصیبتده، چون زینب كبراسن
ای صبری چكن بنده، یا حضرت معصومه
آللاها گؤزل بنده، یا حضرت معصومه
.
.
یا فاطمه! ای آدی، زهرانی سالان یاده
«وَجیهةً عِنْدَ الله» اذكاریله، اوراده
معصومه خانم جانلار قوربان او گؤزل آده
چوخلار گلوری هرگون، قم شهرینه امداده
گلدوم قاپووا منده یا حضرت معصومه
آللاها گؤزل بنده یا حضرت معصومه
.
.
قم شهرینه ای قبری غربتده وئرن قیمت
صحنون تؤزیدور سورمه گؤزلرده گؤزل زینت
آلله ائلینه ائودی عارفلر اوچون جنّت
بیرگوشه سینی ساتماز هر كیم اؤلا حق طینت
مین كشوره، مین كنده یا حضرت معصومه
آللاها گؤزل بنده یا حضرت معصومه
.
.
كریمةَ أَهْلِ الْبِیت، یا بِنْتَ نَبِی الله
موسی قیزی معصومه، یا بِنْتَ وَلِی الله
گونلر گونونه باجی، یا أُخْتَ وَلِی الله
یا سَیدَةَ السّادات، وَجیهَةً عِنْدَ الله
ای گون كیمی تابنده یا حضرت معصومه
آللاها گؤزل بنده یا حضرت معصومه
.
.
بیر عمری گؤزون آغلار بغداد یولونا باخدی
گؤزیاشی جمالوندان صبح اؤلدوزی تك آخدی
تاریخی خراب اؤلسون مظلوملارا گستاخدی
مظلوم آتاوون هجری یاندیردی سنی یاخدی
آغلار سنه دوشمنده یا حضرت معصومه
آللاها گؤزل بنده یا حضرت معصومه
.
.
.
غملر قیزی ای قلبی مین غصه نین آماجی
شیرین سو بؤغازینده غربتدن اؤلان آجی
قارداشی رضا رسمی، آلله یولوی منهاجی
دنیایه داخی گلمز سن تك وفالی باجی
زینبلیقا زیبنده یا حضرت معصومه
آللاها گؤزل بنده یا حضرت معصومه
.
.
.
اؤن دؤرت گونون اورتاسی اؤز یتدی سینه یتدی
مظلوم آتانین آهی، قیز قلبینه تئز یتدی
لعنت گله هارونه موسانی شهید ائتدی
مست أؤلدی ریاستدن، فرعون یولونی گتدیی
گول قالمادی گولشنده یا حضرت معصومه
آللاها گؤزل بنده یا حضرت معصومه
.
.
یا سیّدتی سن سن احساندا سخا كانی
صورت ده جمال الله، سیرت ده صفا جانی
لطف ایله قبول ائله بو نظم پریشانی
بو عرض ارادتده چوخ اؤلمادی امكانی
أؤلدی سؤزی شرمنده یا حضرت معصومه
آللاها گؤزل بنده یا حضرت معصومه
.
.
سؤز صحتی صبریله سعی ائتدی صفا ائتدی
اؤز عهدینه عشقیله، شوقیله وفا ائتدی
بیر ایل سورا اؤز نذرین منذوره ادا ائتدی
توفیقینه بیر عمری یالواردی، دعا ائتدی
أولسون سنه بیر بنده یا حضرت معصومه
آللاها گؤزل بنده یا حضرت معصومه
.
.
#حضرت_معصومه_محمد_صحتی
#حضرت_معصومه_مدح
#آللاها_گؤزل_بنده_یا_حضرت_معصومه
#ترکی
.
#زبدةالاشعار
.
: @nohe_torki
نظر دهید