زبانحال حضرت لیلا (س) با حضرت علی اکبر (ع)
.
✍️ #زبدةالاشعار ✍️
.
🆔: @nohe_torki
.
مرحوم کاتب اردبیلی
.
#سبک_یارالی_جان_یارالی … 4 سبک
.
آنون ئولسون علی قویدون منی حسرت طویوا
دور قباقیمده دولان بیرجه باخوم من بویوا
.
.
بوئیدی فکریم علی من سنی داماد ائلیم
طوی اطاقون بزیوب خاطریمی شاد ائلیم
بئله بیلمزدوم اوغول بو گونومی یاد ائلیم
دور قباقیمده دولان بیرجه باخوم من بویوا
.
.
من دیردوم که طویوندا طوی اطاقون بزرم
مجلس عشرتیوه شربت و شکّر دوزرم
بزم عیشونده دولانّام ایاق اوسته گزرم
دور قباقیمده دولان بیرجه باخوم من بویوا
.
.
ایندی که آیریلقون طرحی مصوّردی بیزه
وادی کرب و بلا عرصة محشردی بیزه
دستگیر اولماقیمیز گون کیمی اظهردی بیزه
دور قباقیمده دولان بیرجه باخوم من بویوا
.
.
عزم ایدوبسن گیده سن جانب میدانه علی
رسیمدور زینت ایدرلر هامی قربانه علی
منده قوی شانه ویروم زلف پریشانه علی
دور قباقیمده دولان بیرجه باخوم من بویوا
.
.
بابون حیدر منه بیرمعجری قیلمیشدی عطا
ساخلامیشدوم اونی بیر مطلبه من بختی قرا
که عروسیم گلی ویرّم دییرم سال باشوا
دور قباقیمده دولان بیرجه باخوم من بویوا
.
.
بیلمزیدوم گله جک بیله یامان گونلری من
یولّارام رزمه اوزوم سن کیمی مه پیکری من
ایندی ساللام ایاقون آلتینا اول معجری من
دور قباقیمده دولان بیرجه باخوم من بویوا
.
.
دور ازل معجریمون اوسته گز ای کان وفا
صورا گئت رزمگهه جانوی قیل حقّه فدا
راضیم منده او امره که بابون ویردی رضا
دور قباقیمده دولان بیرجه باخوم من بویوا
.
.
گیت جهاد ایله علی دفع ایله دشمن لری سن
بابون حیدرکیمی ویربیر بیرینه لشکری سن
کشته دن پشته ایدوب برهم ایله صفلری سن
دور قباقیمده دولان بیرجه باخوم من بویوا
.
.
گورورم رزمه سنی یاخشی برازنده اوغول
گون او گوندور ایده سن خصمی پراکنده اوغول
منیده فاطمه دن ایلمه شرمنده اوغول
دور قباقیمده دولان بیرجه باخوم من بویوا
.
.
گرچه مملّودی بو لشگریله کرب و بلا
باک قیلما اوزوی شیر کیمی ویر قوشونا
عمون عبّاس دلاوردی بابون شیر خدا
دور قباقیمده دولان بیرجه باخوم من بویوا
.
.
بابون ابراهیمه بنزر علی بو چولدی منا
سن ذبیح الله ثانی آنون هاجردی بالا
گیت بو قربانگه حقده اوزوی ایله فدا
دور قباقیمده دولان بیرجه باخوم من بویوا
.
.
«کاتبا» آغلا علی اکبره هرصبح و مسا
یاز مصیبتلرینی تا نقدر عمرون اولا
آه او وقتدن که دیدی لیلی بیچاره اونا
دور قباقیمده دولان بیرجه باخوم من بویوا
.
#اکبریه_کاتب_اردبیلی
#اکبریه_شهادت
#آنون_ئولسون_علی_قویدون_منی_حسرت_طویوا
#ترکی
.
✍️ #زبدةالاشعار ✍️
.
🆔: @nohe_torki
نظر دهید