حالات حضرت زهرا (س)
.
✍️ #زبدةالاشعار ✍️
.
🆔: @nohe_torki
.
مرحوم عاصی تبریزی
.
بخش 1️⃣
.
آه او ساعتدن جفای اشقیا وئردی ثمر
شرمسار اولدی مداریندن سپهر فتنه گر
.
عالمی ترک ایلدی بنت رسول کردگار
مین جهان غملی حکایت قالدی اوندان یادگار
.
سیر ائدنده دفتر دوران عمرین لابلا
گوز گورور هر صفحه ده مینلر خطوط ابتلا
.
عمر کوته ، شرح غم اما مفصل گورسنور
ظلم ثانی لیک هر محنتدن اوّل گورسنور
.
یاده دوشدوقجا تحمل ائتدوقی آلام و غم
موج خوناب جگر ایلور کنار چشمی یَم
.
اوندا که خصمانه ال آچدی جفایه اهل کین
پایکوب دشمن اولدی مهبط روح الامین
.
گوردی یول تاپمور حریم عصمت حقّه عدو
باب ختمی مرتبت اودلانسون اولدی گفتگو
.
قان ائدوب انسیۀ حورا دِلِ آگاهینی
منبع تنزیل وحیون اودلادی درگاهینی
.
بو مصیبتدن نه تنها کون و امکان آغلادی
روح دین فریاده گلدی چشم قرآن آغلادی
.
بزم رازه قویماسون یول تاپماقا دیو رجیم
چوخ تقلّا ایلدی ناموس خلّاق کریم
.
سعی یتسون آخره بی رحملر وئرموب امان
لاجرم فضّه تعالی جمله سین ائتدی بیان
.
قصّه ختم اولدی علی الظّاهر یاتوب غوغا و شر
مسجده جلب اولدی شیر حق ولیّ دادگر
.
صحبت مسمار و در هر چند تاپدی انتها
رحلت زهرایه منجرّ اولدی امّا ماجرا
.
صدمه گوردی روح پیغمبر او وضع و حالدن
دویدی عمرینده مدار روز و ماه و سالدن
.
یاده سالدوقجا وفور درد و مظلومیّتین
عارضه باغلاردی گوزدن سیل اشک حسرتین
.
صبح اولونجا ماه و انجمله گئجه دمسازیدی
خالق بیچونیله گرذم بیان رازیدی
.
اودلی دلدن پیشگاه حقّه ایلردی دعا
کای خفایای دله دانا علیم لایُری
.
صبریمون سرمایه سین اندوه و غم ائتدی تباه
عمردن سیرم داخی عَجِّل وفاتی یا اِلاه
.
اولدی مقرون اجابت بو دعا یا لَلاَسَف
اوندا که گلدی باشی اوسته شهنشاه نجف
.
رو بقبله گوردی روح قبلۀ ایمان یاتوب
جسم رنجوریله جان عالم امکان یاتوب
.
رنگ زردی طاق آهیندن آلوب قندیل نور
بستر مهتابده گویا مه تابان یاتوب
.
موج اشگه غرقدور گویا دل گردابده
کشتی بی بادبان بشکستۀ طوفان یاتوب
.
تاب غم تضعیف ایدوب بیر نوع جسمین گوئیا
سایۀ تن بستر ابهامده لرزان یاتوب
.
آستان طور سینای لقای یارده
پور عمران تک اولوب محو رخ جانان یاتوب
.
پرده پرده نای دلده واردی مین آوای درد
شمع سوزان تک دلی بی ناله و افغان یاتوب
.
بلبل آسا ایلمز شکوه جفای خاردن
جلوۀ گُلدن ز بس خاموش اولوب حیران یاتوب
.
تیره شب اول گوز که مشگل درک ائدیدی خواب ناز
روز روشن نه گوروب یا رب بئله آسان یاتوب
.
زلفی اورتوب عارضین گویا خزان هنگامی دور
باشینی بلبل پر آلتندا ائدوب پنهان یاتوب
.
رختخواب مرگده یاللعجب بنت رسول
خصم کم فرصت جفاسندن تاپوب امکان یاتوب
.
شمع خلوتگاه عصمت آز قالور اولسون خموش
زلف زینب تک جهانی غمدن ائتسون تیره پوش
.
پوزدی حالی، حال شیر حق ولیِّ داوری
عین حقّین خونِ دلدن دولدی حق بین گوزلری
.
ائتدی تکراراً پیمبر بَضعۀ جانین صدا
قالب زهرایه قوّت وئردی صوت آشنا
.
گوزلرین آچدی باشی اوسته گوروب جانانینی
دردمند هجر تاپدی وصلدن درمانینی
.
بزم صحبت ائتدی برپا مرتضی و فاطمه
وئردی زهرا عمرینون ختمی او بزمه خاتمه
.
نه حکایتلر اولوب مابینده ردّ و بدل
بولدی زهرا و علی بیرده خدای لم یزل
.
بیر ایشقلی گون سحاب مرگده ائتدی افول
ظلمت اندوهه غرق اولدی هامی آل رسول
.
شاه دین حصب الوصیّه دلده اندوه و تعب
ایلدی تجهیزینه اقدام لازم نیمه شب
.
نه چکوب غسلین وئرنده شهریار انس و جان
هانسی لال اولموش دیلین یاراسی وار ائتسون بیان
.
بو قدر وار که او کوه صبر و دریای وقار
یوز قویوب دیواره اشگین توکدی چون ابر بهار
.
الغرض حمل اولدی زهرا جسم پاکی مدفنه
گلدی معناده سماوات اهلی داد و شیونه
.
شیر یزدان توکدی اشگ دیدۀ گریانینی
اوز الیله قویدی قبره اوز عزیز جاننی
.
روشنان چرخ ظلمات شب دیجورده
خیره اولموش بو، تراب ابچره مه مستورده
.
غرق خاموشی در و دشت و زمین و آسمان
حالت بهت و تحیرده هامی کون و مکان
.
ناگهان سندی سکوت محض بیر آوازیله
دولدی بو آوازیدن اقطار، سوز و سازیله
.
.
لحن دردانگیزیله گلدی مقاله بو تراب
تربت قبر بتوله ائیلدی بیله خطاب
.
.
.
ادامه متن برای سینه زنی و زنجیر در هشتک زیر
#ای_تراب_تیره_نور_دیده_طاهادی_بو
.
#فاطمیه_شهادت
#آه_او_ساعتدن_جفای_اشقیا_وئردی_ثمر
#عاصی_تبریزی
#ترکی
.
✍️ #زبدةالاشعار ✍️
.
🆔: @nohe_torki
نظر دهید