آه او ساعتدن که دیوان عدالت باشلانار #فاطمیه_علومی_تبریزی

حالات روز #قیامت
جلالت حضرت فاطمة الزهرا (س)
.
.
علومی تبریزی
.
.
آه او ساعتدن که دیوان عدالت باشلانار
عمر دنیا قورتولار بیر گون قیامت باشلانار
.
.
صور اسرافیله حکم خالق جبار اولار
مرد و زن کافر مسلمان قبریدن بیدار اولار
دادگاه محشره پیر و جوان احضار اولار
عدلیله دیوان ربّ حیّ رحمت باشلانار
.
.
خوف وحشتدن دوتار خلقی او گونده اضطراب
بیر جدا اندازه سنده جلوه ایلر آفتاب
شدت گرما او گون قویماز بیرینده صبر و تاب
دمبدم خلقه هراس بی نهایت باشلانار
.
.
بیر طرفدن عرصۀ محشرده خلقین کثرتی
بیر طرفدن نعرۀ دوزخ چوخالدار وحشتی
لال اولار دللر چوخالدوقجا حرارت شدتی
اوزگه بیر اندازه ده سوز و حرارت باشلانار
.
.
جلب اولار پای حسابه اولین و آخرین
آه و حسرت دلده جمله مومنین و کافرین
ترک ایدر چوخ انبیا و اولیا امّتلرین
اهل محشردن فغان وا مصیبت باشلانار
.
.
مصدر حقدن یتر پیغمبره ناگه ندا
امتین پای حسابه حاضر ایت یا مصطفی
هرکس اوز اعمالینون آلسون جزاسین جابجا
امت ایچره اضطراب و خوف و وحشت باشلانار
.
.
رحمةً للعالمین پیغمبر عالی جناب
مومنین و مومناتین بعضین ایلر انتخاب
حاضر ایلر محضر داداره دلده اضطراب
جانب حقدن همان جمعه کرامت باشلانار
.
.
سس گلر حقدن دوباره یا شفیع المذنبون
یا حبیبی یا محمد هاعلاء العاملون
معصیت کاری گتور ای شاه این الامجرمون
قلب طاهاده بو سوزدن گورنه حالت باشلانار
.
.
بار دیگر لطف اوزیله سرور خیر البشر
امتندن محضر داداره بیر جمعی سچر
خیرله شرّی مساویدور او جمعین مختصر
ناله و شیون همان امّتده شدت باشلانار
.
.
سس گلر دربار حقدن ای رسول کردگار
چیخ کناره امتندن دوتما بیر لحظه قرار
ایستر آیریلسون ولی فریاد امت باشلانار
.
.
بیرده قهریله پتر پیغمبره حقدن ندا
گیت کناره بو معاصی قومیدن یا مصطفی
ایستر آیرلسون پیمبر ناگهان نار بلا
امتی ایلر احاطه شور و وحشت باشلانار
.
.
نالۀ امت آلار آرامنی اول سرورین
رحم قویماز ترک ایده هرگز گنهکار امتین
امتین عاصی لری افلاکه قوزار شیونین
شور وانفسائیله اندوه محنت باشلانار
.
.
نیله سین دریای رحمت سرور عالی شرف
نعرۀ دوزخ آلوب الدن توانین بیر طرف
امّت عاصی گورر دورموش مکدّر صف به صف
نازنین قلبنده طرح آیری نیت باشلانار
.
.
امر خلاقی بیلنده بیرده اول کان وفا
جبرئیله یوز دوتار سسلر دیر گل یا اخا
گیت گتور زهرانی امت گتدى الدن برملا
گلسه زهرا محشره عفو و کرامت باشلانار
.
.
بیرنچه عده ملک همراه ایدر روح الامین
قبر زهرایه گلر اول پیک رب العالمین
سسلنر دور قبردن ای بنت ختم المرسلین
مقدمونله امّته فیض شفاعت باشلانار
.
.
حشر اولوب یا فاطمه حق عدل دیوانین قوروب
امتین واویلتا فریادی حشری دولدوروب
انتظارونده سنون افلاکیان یکسر دوروب
خلقه سن گلسن عطای حیّ رحمت باشلانار
.
.
قبردن زهرا دورار پهلولرنده اللری
ظلم ثانی دن ایدر شکوه او حال مضطرى
جبرئیله یوز دوتار گوزدن توکر یاش گوزلری
بیر کسه سویلر نچه حشر و قیامت باشلانار
.
.
محشریم اولدی او گون گتدى الیمدن طاقتیم
درگیهم یاندی بالام سقط اولدی آرتدی محنتیم
سیلی ثانی دگوب سولدی سارالدی صورتیم
ایندیده ذکرونده دلدن آه و محنت باشلانار
.
.
محشریم اولدی او گون اهل عداوت جبرئیل
اوغلومی کرب و بلایه ایتدی دعوت جبرئیل
کربلا دشتنده گوردوم من قیامت جبرئیل
روز عاشورا گورونسه حشره آیت باشلانار
.
.
جبرئیل عرض ایلدی ای خالقین محبوبه سی
موقع شکوه دگل ای مصطفی ریحانه سی
ایمدی هنگام کرمدی یوخدی خلقین بیر کسی
گلمه سن امتدن عرشه وامصیبت باشلانار
.
.
فاطمه سویلر آتام گر امر ایدوب زهرا گله
امته بیر محشر تازه بو ساعت باشلانار
.
.
چوخ وسائل واردی گر روز قیامتدور بوگون
اصغرین قونداقی اسباب شفاعتدور بو گون
اوغلوم عباس اللرى اما کفایتدور بوگون
اول ید مقطوعیله حقّه شکایت باشلانار
.
.
یوز قویار زهرای اطهر دادگاه محشره
شوریله باشلار شکایت کردگار داوره
آه جانسوزی ویرار اود روز محشر دللره
عرض حالیندن او دم آیری حکایت باشلانار
.
.
عرض ایدر ای عادل الله وی خدای ماسوا
ایسترم بیر آیری محشر بوردا اولسون برملا
یعنی امر ایت محشره گلسون بساط کربلا
سوز یتنده بو یره اعجاز قدرت باشلانار
.
.
ناگهان ظاهر اولار کرب و بلا برنامه سی
پاره پاره نعشلر بریان اسیران جامه سی
محشری یاددان چخاردار کربلا هنگامه سی
موقف محشرده بیر آیری مصیبت باشلانار
.
.
عرض ائدر زهرا خدایا گور اوجالمش شیونیم
بو یارالی بیکفن پیکر حسینمدور منیم
کربلا دشتنده ظلمیله پوزولدی گلشنیم
هانسی بیر مظلومه بیر بیله اذیت باشلانار
.
.
باخ حسینون حالنه گور ایخدا بو حالتی
عفوایله اوغلوم حسینه بو خطاکار امتی
کیم حسین تک ایلیوبدی دینوه بو خدمتی
سوز بورا منجر اور عفو و کرامت باشلانار
.
.
خالق یکتا او قومین اشتباهندن گچر
عفو ایدر جرمین علومینون گناهدن گچر
داخل فردوس ایدر فریاد و آهندن گچر
روضۀ رضوان ایچنده عیش و عشرت باشلانار
.
.
.
#قیامت #علومی_تبریزی
#فاطمیه #فاطمیه_مدح #قیامت_علومی_تبریزی
#آه_او_ساعتدن_که_دیوان_عدالت_باشلانار
#ترکی
#زبدةالاشعار