آمدن نصرانی بقتل امام مظلوم علیه السلام
.
.
.
مرحوم سعدی زمان
.
.
آه او گوندن ساکنان عرش دل رنجوریدی
تو کماقا ثاراللهی بیر عیسوی مأموریدی
.
.
آدلاری اسلامیان قتلیندن ائتدی اجتناب
ائتدیلر شورا کیم ائتسون فاطمه قلبین کباب
رأی آلندی مجلس شوراده چخدی انتخاب
بیر نصارایه که دین حق اونا منظوریدی
.
.
اُول سعیده ویردی سعد اوغلی ریاست وعده سی
بو یارالی سویلدی ئولدی یقین گلمور سسی
سن گئدوب باشسیز اگر قویسان بوشاه بیکسی
سر سپه لیق اسموه شاماتده مسطوریدی
.
.
قتلی واجبدور بونون شرعاً ویروب فتوا فحول (1)
چون عربدور، قتلینه اعراب اودور ایلور نکول (2)
پور ترسا قربةً لِله ایدوب آخر قبول
خنجرین آلدی اَله بو امره چون مجبوریدی
.
.
قتل ثاراللهه اوز قلبنده چکدی دایره
قتلگاهه یوز قویوب وورسون جهانی بیربیره
عالم عُلویدن عیسی باش آچوخ گلدی یره
گوردی فکر اُمّتی حق ، فعلی حقدن دوریدی
.
.
الغرض نصرانی گلدی قتلگاهه دلفکار
بیر یارالی گوردی قان ایچره دوشوب بی اختیار
نیزه و خنجر ووروبلار بسکه قوم نابکار
قانیله آلات حرب آلتدا بدن مستوریدی
.
.
وجه وجه اللّهی دوتموش پرده پرده لخته قان
لمعه لمعه نور اولور قانلو جمالیندن عیان
نحر منحوری ائدور سر اَنَااللّهی بیان
معنی اللهُ نور اولموش سراسر نوریدی
.
.
گون کیمی اولموش وجودی کسوت کثرتدن عور
سرّ وحدت کثرت عشقیندن ایلوبدی ظهور
جسمدن آخدوقجا قانی یرده یا حق نقش اولور
گر چه اوخدان پیکری چون خانۀ زنبوریدی
.
.
عیسوی گورجک بو حالی اولدی پابند محن
سویلدی کیمسن یارالی گوزلرون قربانی من
سن اگر عیسی ابن مریم سن بو صحراده ندن؟
پیکرون انجیل تک اوراق اولوب منشوریدی
.
.
چرخ چارمدور یرون عیسی ابن مریم سن اگر؟
پرتو نور خدا اولموش بو چولده جلوه گر
محو اولوبسان جذبۀ دلداره موسی سن مگر
لن دیوب ارنی جوابینده بو صحرا طوریدی؟
.
.
گوزلرین آچدی بو سوزده شهریار نُه قباب
زادۀ ترسایه قیلدی حال ضعفیله خطاب
قدرتیم یوخدور ویرم بیربیر سُؤالاته جواب
رمح و سهمیله گورورسن نحریمی منحوریدی (3)
.
.
یر یوزینده من بو گون مصباح نور سرمدم
حیدر کرّار آتامدور شبل نسل احمدم
سویلَمَه عیسی منه من ویرمیشم عیسایه دم
بُل آنام مریم دگل انسیّه آدلو حوریدی
.
.
من نه موسایم ولی اونلان واریمدور سابقه
عیسیِ گردون نشین خادمدی مندن لاحقه
کتاب قدرت یازوبدور کلُّ نفسٍ ذائقَه
اُول سَبَبدن زخمدن سینم بئله مکسوریدی
.
.
نقطه نقطه علم کان و مایکونه آگهم
صاحب تاجم ربوبیّت سریرینده شهم (4)
عیسی عبدالله دور من لیک اباعبداللَّهم
کوفیان گورمور بصیرت گوزلری چون کوریدی
.
.
فارقلیط اسمی دیه لَّر جدّیمه قوم یهود
حق یازوب انجیلیده اسم شریفین مودمود
قارداشیم هاشندی هوشینم اؤزوم دریای جود
من شُبیرم قارداشیم آدی شَبَر مزبوریدی
.
.
آختاروردون یاری مرآت حقیله دیرده
اولمادون ارشاده نایل سن وصال غیرده
بو مقامی آختاروردون نچّه مدّت سیرده
وصل معشوقه یتن عاشق بو گون مسروریدی
.
.
گَل عجب دَمدَه گَلوبسن فکر وصل یاریله
صورتاً گرچه گلوبسن صورت زنّاریله (5)
تا کی اولسون اُلفتون آیینه ده دلداریله
آت بو زنّاری فضای عشق چوخ پر شوریدی
.
.
سویلدی عیسی سنه رؤیاده با قلب فکار
انبیا ایچره منی ائتمه اماندور شرمسار
گوردوقون رؤیانون اولدی ایمدی سرّی آشکار
سن منی ئولدورسن عیسی فعلیوه رنجوریدی
.
.
خنجرین آتدی بو سوزده اُول جوان پاک ذات
سویلوب ای لعل لبی خضره ویرن آب حیات
سنده که وار بو جلالت بو مقام عالیات
جسمیوه غسلون ندن قان توپراقون کافوریدی؟
.
.
من دیلون قربانی تعلیم ایله حق دینی منه
آخر عمریمده منی یاخشی یتوردون ایمنه
اذن ویر شاها ایدوم حمله صفوف دشمنه
ایمدی روحیم جسمیمه بر وصلۀ ناجوریدی
.
.
کلمه اسلامی تعلیم ایتدی محبوب جلیل
یوز قویوب میدانه دعوا ایلدی اولدی قتیل
حضرت زهرانی شاد ایلوب تاپوب اجر جزیل
ساغر عشق حسینیله ز بس مخموریدی
.
.
ای «#حسینی» دوت حسینون دامنیندن صبح و شام
مطلقا سرمایۀ عزّتدی بیله اعتصام
ایلسه خدمت حسینه هر کیم عالمده مدام
حضرت زهرا الیله حشرده مأجوریدی
.
(1) فُحول = جمع فحل بمعنای دانایان ، خردمندان
(2) نکول = اعراض،خودداری
(3) رمح = نیزه
سهم = پیکان، تیر، خدنگ
(4) امام صادق به فضیل فرمود: یا فُضَیلُ اَلْعُبودِیَّةُ جَوْهَرَةٌ کنْهُهَا الرُّبوبِیَّةُ فضیل! آیا تو می دانی که عبودیت چیست؟ آیا می دانی عبودیت چه گوهری است؟ عبودیت گوهری است که ظاهرش عبودیت است و کنه و نهایت و باطنش، آخرین منزل و هدف و مقصدش ربوبیت است.
(5) زُنّار = رشته ای که مسیحیان به وسیلۀ آن صلیب را به گردن آویزند. (علامت خاصی است برای عیسویان)
.
ترجمه #فارسی این شعر از #محمدرضاصادقی با هشتک زیر
#آه_از_آن_روزی_که_اهل_آسمان_رنجور_بود
.
#اصحاب_الحسین
#جوان_نصرانی
#سعدی_زمان
#آه_او_گوندن_ساکنان_عرش_دل_رنجوریدی
#کنزالحسینی2 ص 138 (کلیات ص 374)
#ترکی
#زبدةالاشعار
نظر دهید