بسته شدن راه فرات
.
.
مرحوم صابر
.
.
آه او گوندن عترت زهرایه قحط آبیدی
خوردا جا قزلار سوسوزدان خیمه ده بی تابیدی
.
.
معتبر دور بو خبر مهریه دور زهرایه سو
کوفیان ویرموب ندن بس عترت زهرایه سو
زینبون گوزیاشی تک اولدی روان صحرایه سو
بیر سو کی اوندان چولون وحشی لری سیرابیدی
.
.
کربلا ده یا علی اوغلون حسین مهمانیدی
هم اوزی هم اهلبیتی حیف اولا عطشانیدی
بولمورم بو شیوه رسم آل بو سفیانیدی
یا شُریحین امری بو امری ایدن ایجادیدی
.
.
وا سویا عینا اصول شرعیده بو اصطلاح
صاحب شرعین یازوبلا قولیجا اهل صلاح
سو آدی ذیروحه حتی کَلبَه ده اولموش مباح
تشنه لیقدان لیک آل الله دچار کابیدی
.
.
گر حلال ایلوب سوئی خلقه خدای لاینام
بس بو نه سوزدور یازوب ابن زیاد بد مرام
من سوئی ایتدیم بو گوندن آل طایه حرام
تک بو سوز یوز مین جفاو جوره فتح بابیدی
.
.
ابن سعدبی حیا ایتموب خدادن شرم وعار
تابع ابن زیاد اولدی او شوم کین شعار
سو یولون کسدی یانوب آل شه والا تبار
تشنه خاتون و کنیز و طفل و شیخ و شابیدی
.
.
شدت سوز عطشدن آل عصمت یاندولار
عترت عین الحیات اود دوتدولار اود لاندولار
کوفیان آل اللهه بو ظلمی آسان ساندولار
چون مروّت قان توکن اعرابیده نایابیدی
.
.
گلشن پیغمبرین سولدی سارالدی گل لری
لال اولوب سوز عطشدن خوش نوا بلبل لری
حضرت عباسی یاندوردی سکینه دللری
غیظیدن تتردی گل اندامی چون سیمابیدی
.
.
باشه یغموشدی سکینه قرخادین تشنه اوشاق
اللرینده بوش سو جامی دللرینده احتراق
العطش صوتیله دولموشدی بیابان عراق
لاله گون یوزلر سارالموشدی چوماه تابیدی
.
.
نا له لر قلب بُریرَه عاقبت ایتدی اثر
عزم ایدوب تحصیل آبه اول غیور خوش سیر
تشنه لب قزلار سویوندی نشر اولوب تا بو خبر
جمله سی آغلار گوزیله انتظار آبیدی
.
.
الغرض بیر مَشگ سوگتّدی بُریر پاک ذات
دور مشگی از دحامیله آلوب تشنه بنات
سو جالاندی قالدی حسرت عترت عین الحیات
خون جگر بو ماجرادن زُمرۀ اطیابیدی
.
.
سو آخوب آل علی گوزدن توکوب قانیاش یره
خوردا جا قیزلار هجوم آور اولوب بیر باش یره
قوزیان پیراهنین سالدی اوزینی یاش یره
گور نجه هنگامه و نه شرب و نه اشرابیدی
.
.
کاش اولیدی ظُهر عاشورا بُریر با وفا
قتلگهده جان ویرنده شهریارکربلا
سوویروب سیراب ایدیدی اولغریبی ای خدا
حیف اولا اوز قانینه غلطان همامی اصحابیدی
.
.
اُولمیوب یوز مین نفردن بیر نفر دادرسی
نُه قُبابی دولدوروب یاندیم عطشدن ناله سی
آغلادوب حالی حسینون اهل چرخ اطلسی
برده مَخیَم ده او حاله اشگریز احبابیدی
.
.
شاعره سوز صاحبیدن اولماسا (صابر) نظر
سوزیازانماز یازسا سوز اولماز گیدر زحمت هدر
شه نظر ایلوب سنه سویلر سوز اهلی سر به سر
نطقه باخ بیر وقت صابر اعجز کُتّابیدی
.
.
#فرات
#آه_او_گوندن_عترت_زهرایه_قحط_آبیدی
#صابر_تبریزی
#ترکی
#زبدةالاشعار
نظر دهید