زبانحال حضرت رباب (س)
.
.
.
مرحوم #سیدحسن_روضه_خوانی
تضمین شعر مرحوم #ذهنی_زاده
.
.
آچوبدی کاتب غم دفتر مصیبت عجب
یازوبدی منشی گردون ملال و محنت عجب
ربابی گتدی دیله بلبل شهادت عجب
«اوغول مروت ایدوب قوم بی مروت عجب»
«گلوب ترحّمه بو رحمیسیز جماعت عجب»
.
.
سالوبدی سوز عطش اود قلوب اضیافه
تب اولدی ساتر جسمون بسان لفّافه
او اودلی حالتون ایلوب اثر دلِ صافه
«باخوب سَنه گلوب انصافسیزلر انصافه»
«یانوب مصیبتوه لشکر شقاوت عجب»
.
.
چوله آخاردی فرات چشمۀ رحیق کیمی
یانان مصیبتیوه یوخ دل رقیق کیمی
بولوبله قیمتیوی گوهر و عقیق کیمی
«ایدوبدیلر سارالان رنگوی عقیق کیمی»
«سولان گُلیم نه گوزل تاپموسان طراوت عجب»
.
.
بو کربلا چولی مملوّ فرقۀ مرموز
هوانون ایستیسی پیکانِ خصم تک دلدوز
صغیرسن ولی اقبال طالعین فیروز
«گوروبله سوز عطشدن دوشوب وجودیوه سوز»
«سپوبله سو کیمی قانون، سونوب حرارت عجب»
.
.
سنی بو سوز عطش سالدی تاب و طاقتدن
یاتانمادون گئجه نی قالدون استراحتدن
سحر آچیلسا دئدیم قورتولار اذیّتدن
«عجب سو ویردیله اولدون خلاص زحمتدن»
«نه یاخشی یوخلاموسان تاپدون استراحت عجب»
.
.
گلور تموّجه گوز یاشی بو گوزومده علی
بسان شیوۀ مرجان دوروب یوزومده علی
ایله یانقلی عبارت چخیر سوزومده علی
«نه دلدی من دیورم والهم اوزومده علی»
«خیال عجب، سوز عجب، حال عجب، حکایت عجب»
.
.
یوخوندی یالقوز آناندان صورا بو چولده کَسون
بو صَعب امریده تک آغلاماقدی دادرسون
اوچوبدی طایر روحون قالوبدی بوش قفسون
«نه سوز نجه یوخی گوررم که گلموری نفسون»
«گنه دانشدیریرام منده واردی غفلت عجب»
.
.
سوسوزلوقن اودی دریا تک ائتدی جوش و خروش
ز بسکه سرکشیدی سبز رنگ اولوب لبِ نوش
ویروبدی ناوک پیکانیله سو باده فروش
«نجه سودور که ایدوب نشئه سی سنی مدهوش»
«قویوب حکیم قضا ظلم اوخوندا لذّت عجب»
.
.
نگار دعوتینی پیک خاریده بولدون
شکسته نی کیمی فریاد و نالیه گلدون
او پیک یاره پر آچدون حقیقتی بولدون
«نقدر اوخ سنه خوش گلدی شوقدن گولدون»
«بوغازون اوخ یاراسیندان آلوب حلاوت عجب»
.
.
بو اوخ آناندان ائدوب سلب اختیار و دؤزوم
گوزون قانیله دولوب قانیله دولیدی گوزوم
محالیدور گوله سندن صورا جهاندا یوزوم
«سَن اوخلانونجا علی کاش اوخلانِیدیم اوزوم»
«ویرِیدی سَن تک آنان جان، اولِیدی راحت عجب»
.
.
فلک منی بالاسیزلار قطارینه قوشدی
اودور که جوشه گلوب بحر محنتیم جوشدی
سینه مده هم بشیگینده داخی یرین بوشدی
«سنی بو نوع گورونجه ئولوم منه خوشدی»
«ندندی ئولمَز آنان واردی منده طاقت عجب»
.
.
اولونجا حشر گل و غنچه دن باش اولدی سوزون
که نرجسی گلی مدهوش ائدوب خمار گوزون
صفا تاپوبدی سنیله بهار لیک اؤزون
«خزانیدون ولی لاله کیمی گُل آچدی یوزون»
«چَکیلدی سینه مه آخِرده داغ حسرت عجب»
.
.
نه طبعدور که سماواته اوج ائدر ذهنی
نه شوردور بو مقاماته اوج ائدر ذهنی
نه نوریدور دل ظلماته اوج ائدر ذهنی
«نه ذهن دور که مقاماته اوج ایدر ذهنی»
«یقین که روح قُدُسدور ویرور مهارت عجب»
.
.
یازاندا «ذهنی» بو اشعاری آب و تابیله
گلوبدی نی کیمی زاره قلم ربابیله
ائدوبدی سوزلری تخمیر اشک نابیله
مقابل اولماز اگر ذرّه آفتابیله
بو «روضه خوانیه» حق ایلیوب عنایت عجب
.
.
.
.
#اصغریه_شهادت #اصغریه
#حضرت_رباب
#اوغول_مروت_ایدوب_قوم_بی_مروت_عجب
#آچوبدی_کاتب_غم_دفتر_مصیبت_عجب
#ترکی
#زبدةالاشعار
نظر دهید