زبدةالاشعار

آچوب حضوریوه ال یارب ایسترم توفیق #مناجات_ذهنی_تبریزی

#مناجات
#گریز به : توسل به امام حسین (ع) ، حالات خروج کاروان امام از مدینه ، خروج کاروان امام از مکه ، در راه کربلا ، رسیدن خبر شهادت حضرت مسلم (ع) به امام ، در راه کربلا ، مقابله با لشگر حرّ ، ورود به کربلا
( 270 بیت )
.
.
.
مرحوم #ذهنی_تبریزی
.
.
✔️ #مناجات
.
.
آچوب حضوریوه اَل یارب ایسترم توفیق
اوزون موفّق ایت ای وافق و شفیق و رفیق
.
یتوردوم عمریمی باشه تمام غفلتیله
عمل خجالتیم، نیلیوم بو خجلتیله
.
عزیز وقتی هوا و هوسده صرف ایتدیم
همیشه نفس دالنجا دوشوب خطا گیتدیم
.
منی یاراتمیشیدون معرفت سنه یتورم
نه این که معرفتین شاهراهینی ایتورم
.
دلیل اِنّی و لِمّی نی ائتمَرَم انکار
اثر موثّره حاکیدی ائتمیشَم اقرار
.
اگرچه اولموشام اوّلده قائل توحید
ولی قصور اطاعت ائدر منی نومید
.
اؤزون بُلورسن الهی ندور بو یأسه سبب
گئجه گونوز باشا باش، باش ویروب خلاف ادب
.
یقین دور منه بو نشئه دن علاقه کَسَم
گئدم او نشئیه بُلّم نه کاریم نه کَسَم
.
سفر قاباقدا، اوزاق یول، یوخ اَلده توشۀ راه
خطرلی مرحله لر، خاصّه پای بند گناه
.
اینانمشام که قورارسان جزاده بیر دیوان
نئدر محاکمه ده من کیمی سیَه دیوان
.
تمام صورت عصیاندی نامۀ عملیم
ثوابیدن بُلورم محضرونده بوشدی اَلیم
.
عدالتیله اگر حکم قیلسان ای عادل
اینانمورام که منه قهرون اولمیا شامل
.
سموم قهرون اگر اَسسه بیر دم ای قهّار
شرار غیظه نه بیر من یانار هامی زینهار
.
رحیم سن، گرک اوز رحمیویله یول گیده سن
چَکوب حساب کتابه قلم، گذشت ایده سن
.
اؤد اهلیَم بُلورم من گرک یانام ناچار
مگر نجاتیمه توفیقِ رحمون اولسون یار
.
بودور گناهه سبب بُلموشم کریم سنی
کرامت ایله، گذشت ائت، باغشلا سنده منی
.
.
✔️ توسل به امام حسین (ع)
#حسینیه_مدح #مناجات
.
.
سنی حسینه قسم ویرّم ای خدای جلیل
حسینی ائت منه باب کرامتونده دلیل
.
همان حسین که اودور سِیُّمینِ هشت و چهار
گناهکارلره وئرمیسن شفیع قرار
.
اگرچه خدمتینه گاه گاه مشغولم
ولی اونوندا حضورینده سخت مسئولم
.
کریمسن سن، حسینونده کانِ بخشش و جود
کرامتونله اونون جودیدور منه مقصود
.
حسین خاطرینه ایلمه منی مأیوس
هر ایکی نشاده جود و کرمله قیل مأنوس
.
همان حسین که هر بیر بلانی ائتدی قبول
نه دیل شکایته آچدی، نه دلدن اولدی ملول
.
بلایه لا دئمه دی، ویردی دل رضای حقه
سلیم قلبیله تسلیمیدی قضای حقه
.
نه قدر فرقۀ باطل فشارین آرتوردی
دوزوب دایاندی حق اوسته ثباتیله دوردی
.
وطنده عرصه نی دشمن او قدر تنگ ایتدی
که ضیق خاطر صافی نهایته یِتدی
.
گُل ریاض غمین اِنزوا نصیبیدی
باخاندا حالینه گویا وطن غریبیدی
.
✔️ #خروج_مدینه
.
یزید حقّینی غصب ائتدی، اولمادی قانع
دوشوب بو فکره که سونسون او پرتو لامع
.
ولیده یازدی منه آل حسینیدن بیعت
قبول ایلمسه ایله قتلینه سرعت
.
کلیم وارثی گوردی که چَکمیر اَل دشمن
علاج یوخدی گرکدور اولا جلای وطن
.
اگرچه شایقیدی محضر نگاره گیده
ولی مقدّریدی اوزگه بیر دیاره گیده
.
حقیقی کعبه مرامیله ائتدی عزم حجاز
بلی حقیقته مَعبَردی هر زماندا مجاز
.
یانندا اهل حرم، اقربا، اوغول، قارداش
مدینه دن گئجه چخدی که سرّی اولمیه فاش
.
✔️ #ورود_مکه
.
ایدوردی طیّ منازل او هادی عالم
یتشدی مکّیه تا پادشاه حِلّ و حَرَم
.
اولاندا واردِ کعبه او محو عشق اِله
تعارُفاً دیدی گویا خلیل بسمِ الله
.
مُنَوّر ایلدی بیت خدانی نور خدا
صفا و مرویه وئردی قدوم پاکی صفا
.
مقیم اولوب نچه آی مکّه ده امام زمان
ولیک ویرمدی اهل جفا وقوفه امان
.
او عین مَأمن اَمانگاهِ ناسی گوردی خطیر
مصمّم اولدی که ویرسون محلّینه تغییر
.
گوروب که مکّه ده قالسا عدو یتر کامه
ولی حبیبیله اوز عهدی یتمز اِتمامه
.
✔️ #خروج_مکه
.
قِرانِ حجّینی دوندَردی مُنفَرِد حَجّه
واریدی چون خبری مکر زمرۀ لَجّه
.
اوزی بُلوردی یزیدین فساد و حیله سینی
حسین قتلینه گوندردیقی وسیله سینی
.
معیّن ائتمیشدی بیر نچه ستم گستر
امامی حالت اِحرامیده شهید ایده لر
.
حجیجِ کعبۀ مقصوده ایلدی اعلام
که باغلاسونلا طواف حقیقته احرام
.
محبّت اهلینه کوی نگاره اولدی دلیل
او میر قافلۀ عشق ویردی امر رحیل
.
محمّد حنفیّه ایشیتدی بو خبری
که ایستور ایلیه قارداشی نینوا سفری
.
قرار شیشه سینه ووردی بو خبر بیر سنگ
اوزین حضور امامه یتوردی چوخ دل تنگ
.
دیدی حسین نَدی بو ناگهان سفر قارداش
بو عزمووین سببین ویر منه خبر قارداش
.
صباح تَرویه دور، متّصل گَلور حُجّاج
جهت ندور که خروجه سن اولموسان محتاج
.
اگر بو گِئتماقا باعث فشار دشمندور
خدا ائوینده مقام ایت که خلقه مَأمن دور
.
قالانمارام دیدی قارداش، عزیمت ایتمَه لیَم
کَسوبله چاره می لابد عراقه گِتمَه لیَم
.
بو یرده قالسا حسینون شُئون تامّی گیدر
تُوکَلَّه قانیمی بیتینده احترامی گیدر
.
محمّد عرض ایدوب ای خسرو وفا پرور
بُلورسن عهده وفا ایلمزله کوفه لیلر
.
اماندی کوفیه گئتمه اولار وفاسیزدی
تمام قلبلری صدقسیز صفاسیزدی
.
اگرچه نامه لرینده بیان ایدوبله وِفاق
ولیک متّفق اولماز سنیله اهل نِفاق
.
سنه محبّ دگولّر او قوم قطع نظر
نظرده دور بابامیز مرتضایه نِیلَدیلر
.
غم فراقیوی لابد نصیب ائدوبله منه
گیدورسن ایمدی که گیتمه عراقه، گئت یَمَنه
.
یَمَنَده ویرمسه دشمن اگر امان قارداش
بو شهر او شهریده بیر قدر دالدالان قارداش
.
بویوردی سهلیدی اولماز یَمَنده ده فرصت
که هر دیاره گئدم قویماز اشقیا راحت
.
ایدم وحوشین اگر آشیانینی مَأمن
بو قدر بُل که تاپار ئولدورر منی دشمن
.
ولی گیدیم بو گئجه فکر ایدیم سحر اولا تا
صلاح کار نه امر اولسا ایلرم اجرا
.
مرخّص اولدی محمّد قِییتدی منزلینه
ولی دوام ایده بیلمزدی سوزش دلینه
.
حسینون عالمینی فکر ایدوردی هر دمده
یاناردی شعلۀ آهیله آتش غمده
.
او فکریده واریدی تا گئجه حلول ائتدی
گوروب که چوخ نگراندور تحمّلی گیتدی
.
حسین فکرینی باشدان آتانمادی او گئجه
که صبح اولونجا بیر آنی یاتانمادی او گئجه
.
کمال هولیله دوردی اَیاقه ائتدی شتاب
دئدی گئدیم گوروم آیا حسین وئرور نه جواب
.
بلالی قارداشیم اوز دردینه نه چاره ائدور
بُولوم که باش گوتوروب هانسی بیر دیاره گئدور
.
او وقتیده یِتیشوب گوردی باغلانوبدی قطار
حرم کنیز تماماً ‌اولوب کجاوه سوار
.
دئدی حسین گئجه نی بس دئدونکه فکر ائدرم
سنه صباح نه اولسا نتیجه سین دیرم
.
هارا یِتیشدی او فکرون که اضطرابیله
صلاح نولدی گئدیرسن بیله شتابیله
.
بویوردی جدّیمی رویاده بو گئجه گوردوم
بُولوردی دردیمی امّا دوباره بُولدورورم
.
دئدیم داخی دَگولم اؤز حیاتیمه مایل
اَلیمی دوت منیده ائت مزاریوه داخل
.
منه بویوردی که باشلا بلا دیارینه راه
که بیله ایستیوب ئولموش گوره سنی الله
.
دئدی که هجریوه یوخ چاره منده لا دئمَرَم
ولی اوزون گیت آپارما یانونجا اهل حرم
.
ئولوم دالنجا اوزون بیله سرعت ایلورسن
بو قدر اَلسیز اَیاقسیز عیالی نیلورسن
.
بودور مشیّتی ئولموش گوره سنی باری
بنات فاطمه نی قوی حجازیده باری
.
دیدی اولاردا گرکدور گیده، بو سرّه گوره
حق ایستسوب اولاری دشمنه اسیر گوره
.
محمّدین ائله حالی پوزولدی بو سوزدن
بیر آه چَکدی که اشکی داشوب آخوب گوزدن
.
بیری بیرینی ایکی مهربان غم مأنوس
وداع ایلیوب، آیریلدیلار ولی مأیوس
.
✔️ #خروج_مکه
✔️ #در_راه_کربلا
.
حسین قافله سی نیّت عراقیله
حجازیدن چخوب انبوه طَمطَراقیله
.
اجازۀ حرکت وئردی میر اهل ولا
جلال و شوکتیله کاروانی دوشدی یولا
.
کجاوه لر دوزولوبلر یولا نظامیله
علی جوانلاری صاق صولدا انتظامیله
.
قاباقدا فاطمه قائم مقامی مَحمِلده
یانینجا باجیسی کلثوم هر مراحلده
.
دالی کجاوه لر ایچره مخدّرات حرم
تمام دَبدَبَه شوکت، جلال و جاه و خَدم
.
بو یرده ذهنیمه بعضی مطالب ایتدی خطور
کُمیت سرکش طبعیم دایاندی ائتمور عبور
.
روایت اهلی بیله بُلمسون سوزی آزیرام
زبان حالدی بو اوز دیلیمجه من یازیرام
.
اگر چه اکبر و عبّاس چوخ مواظبیدی
اولوردی زینبه هر حرمتی که واجبیدی
.
ولی یری واریدی میر کاروان سعید
که ساربانلارینا ایلیِیدی امرِ اَکید
.
کجاوه لرده کیلر اهلِ بیت عصمت دور
اوشاق بیوک هامی معتادِ ناز و عزّت دور
.
حریمِ نازیده نازیله بَسلَنوبله تمام
بناتِ فاطمه دور خاصّه لازمُ الاِکرام
.
گرک بو اولمیه بیر ناقه تند و تیز گیده
کجاوه چوخ حرکت ایلیوب اذیّت ایده
.
کجاوه لر یِرییَنده اوشاقلارین چوخوسی
یاتار مباد بیری دیسگنه قاچا یوخوسی
.
خصوص ناقۀ زینب وقاریله گئتسون
او نازنینی مبادا کجاوه اینجیتسون
.
آنالارین قوجاقیندا یاتان اوشاقلار وار
اوجا سَس ایلمیون اولماسونلا تا بیدار
.
گئنه تعاقب ائداخ مطلبی همان یردن
سوز اهلی رسمیدی باشلار سوزی قالان یردن
.
اولوب قاباقلاریجا عین شاهراه دلیل
دالینجا قطع مراحل ائدوب او اهل سبیل
.
گَلوب گئدن که تصادف ایلردی اُول شاهه
چخاردی جادّه دن، ایلردی سعی بیراهه
.
کنار راهیله ایلردی هولیله سرعت
امام نُصرته تا ائتمسون اونی دعوت
.
✔️ خبر شهادت حضرت مسلم (ع)
#مسلمیه
.
شقاق منزلینه تا او سرور ائتدی نزول
او گون اوتورموشیدی خیمه ده حزین و ملول
.
او میر و رهبر ائدیر دم به دم نظاره یولا
گوروب بیری گَلور امّا دوشوب کناره یولا
.
بُلوب گَلور او عرب شهر کوفه دن گویا
او سرور ایستدی اوندان خبر اولا جویا
.
او دمده بیر نفر اصحابیدن ائدوب مأمور
اونی حضوره گَتور، حاضر ایلدی فِی الفُور
.
گَلوب امامه سلام ایتدی دوردی محضرده
تمام فکریله امّا گوزی او سرورده
.
امام سویلدی هاردان گَلورسَن، ایله بیان
دئدی که کوفه دیاریندن ای امام زمان
.
بویوردی وضعی ندور کوفه نین، دئ وار نه خبر
سکوت ایدوب عرب، اطرافینه بیر ائتدی نظر
.
باخاردی دوره ده مَه رو جوانلارین یوزینه
سوزین دیَنمَزیدی فکر ایئدردی اوز اوزینه
.
باخوب که گوردوقی وضعین بیانین ائتسه اگر
بو هاشمیلر ائشیتسه بیر اؤزگه حاله دوشر
.
امامه یوز دوتوب عرض ایلدی که رخصت وار
که گوردوقوم خبری آشکار ائدیم اظهار
.
جواب وئردی او سرور سوزون دئ، ائتمه نهان
منه محارمِ اسراریدور بو پیر و جوان
.
دئدی که چخمامیشام کوفه دن کناره مگر
گوزومله گورموشم ای پادشاه جنّ و بشر
.
نهانی کینه سینی کوفیان پدید ائتدی
گونون گون اورتاجاقی مسلمی شهید ائتدی
.
بو سهلیدور اونی ئولدوردولر شقاوتیله
سوروردولر یارالی نعشینی اهانتیله
.
خیال ائدنده یانور دل بو غم شراره سینه
او نعشی ویردیلا قصّاب لر قَناره سینه
.
بو حالیدن که امام غریب اولوب حالی
آخوب عُذاره سرشکی، پوزولدی چوخ حالی
.
دوروب اَیاقه روان اولدی حالی دیگر گون
یِتیشدی خیمۀ زینبده اَگلشوب محزون
.
بویوردی زینب مظلومیه امام زمان
دایانما، حاضر ایله مسلمون قیزین باجی جان
.
خدیجه نی گَتوروب زینب اَلَم پرور
آلوب دیز اوستونه شه ائتدی چوخ نوازشلر
.
یوزین گوزین اؤپوب، اَل چَکدی لطفیله باشینا
خدیجه صورتی فوراً بویاندی گوز یاشینا
.
فَراسَتی چوخیدی بسکه حسّ ائدوب او بالا
که وار باشیندا بلا، چَکدی آه و واویلا
.
توکوب سرشگینی عرض ایلدی نه واردی مگر
یتیمیله بیله رفتار ائدَه لّه ای سرور
.
بو لطفیدن بئله احساس ائدور دل حَزَنیم
که ایمدی منده یتیمم، آتام ئولوبدی منیم
.
✔️ #در_راه_کربلا
.
کوچوب دوشردی منازلده کاروان حسین
قریب مقصد اولوب تا که رهروان حسین
.
یول اوسته بیر گون آت اوسته او محو عشق اِله
تعجّبیله دیوب لا اله الا الله
.
حسیندن علی اکبر ائشیتدی بو ذکری
بولوب که عمده سبب وار مَشوب اولوب فکری
.
ادبله عرض ائدوب ای افتخار آل خلیل
ندن پوزولدی بئله حالون ای حلیم نبیل
.
همیشه دلده واروندور جلیله تجلیلون
ولیک ایمدی سبب سیز دگول بو تهلیلون
.
دئدی منی یوخی دوتموشدی ایمدی یا ولدا
ائشیتدیم ایلدی هاتف اوجا سسیله ندا
.
دئدی ئولوم طرفین قصد ائدوب بو قوم گئدیر
ئولومده قافله نون آردیجا تعاقب ائدیر
.
اوغول گوروب ئولومی ایلیوب آتا رؤیا
دئدی که بیز دگولوق حقّیله بابا آیا؟
.
بویوردی سرور دین آند اولا خدایه علی
که حقّیله واروق حقده بیزیله واردی بلی
.
ادبله عرض ائدوب اول شبه سیّد لولاک
که حقّوخ ایمدیکه بیز ائتمروق ئولومدن باک
.
عزیز جانینی حق جان نصاری گوردی امام
بویوردی حق سنه وئرسون جزای خیر تمام
.
✔️ مقابله با لشگر #حر
.
دوتوب گئدیردی یولی سالکان راه وفا
یاخونلاشاندا عراقه یتوبله بیر چوله تا
.
صحابه دن بیری ناگاه سویلدی تکبیر
ائشیتدی آلدی خبر سرّینی شهِ دلگیر
.
جواب وئردی که ای عالم رموز و نکات
منیم یولوم بو بیابانیدن دوشوب کرّات
.
گورونمیوب ابداً نخله دن بو یرده نشان
ولی گوزوم گورور ایمدی قاباقدا نخلستان
.
بویوردی دقّت ایله یوخ بو یرده نخل اثری
اولار دَگولَّه مگر اهل کینه نیزه لری
.
اولار سواره دی مطلب منه مُبَرهَندی
دگولَّه دوست تمامی سپاه دشمندی
.
گلوب یاخونلادی بیر آز مسافه ده او سپاه
باخوب صحابه هامی گوردی دشمنی ناگاه
.
او دم کمک لرینه یوز دوتوب امام فخار
دئدی مناسب اولان بو یاخندا بیر یر وار
.
گلوب بیزیله قتال ایلسه اگر دشمن
او یر اولا بیزه تا سمت پشتدن مأمن
.
دلیل اولوب بیری انصار سیّد عربه
او قافله اؤزونی چکدی کوه ذوخَشَبه
.
یتوب او دامنۀ کوهی ائتدیلر منزل
کجاوه لردن انوب اهل بیت لرزان دل
.
بیوک کیچیک واریدی حالِ ناگواریله
گلوب یتیشدی او دم حرّ مین سواریله
.
کمال لطفیله امر ائتدی شاه رأفت خو
که حاضر ائتدی جوانلار سپاه دشمنه سو
.
چکنده مشگ الینده سو جامی سقّالر
وئروب سوسوزلارا سو بیر به بیر ائدردی گذر
.
او یرده حرّیده اؤز لشگریله منزل ائدوب
گوروب که قصد عبادت امام عادل ائدوب
.
او سرور اولدی نماز جماعته مشغول
گلوب ائدوب او رِیاحیده اقتدا معمول
.
قیلوب نماز جماعت او مقتدائیله
شروع صحبت ائدوب طرز مدّعائیله
.
دیدیکه ابن زیاد ایلیوب منی مأمور
سنی گرک آپارام کوفیه بودور منظور
.
بویوردی حقّه قسم تابع اولمارام سنه من
ئولوم یاخوندی سنه دلده کی بو قصدوندن
.
تعهّدیله منی کوفیان ائدوب دعوت
اولار کی عهدی پوزوب منده ایلرم رَجعت
.
دئدیکه آند اولا اَللهه اختیاریم وار
گرک سنی اؤزومه تابع ایلیم ناچار
.
او وقت اولوب که سر خَیل اصفیایه دلیل
او سرزمینیدن اصحابه وئردی امر رحیل
.
بویوردی ایمدیکه باشلور بو قوم کینه یولون
عراقی ترک ائدیرم قصد ائدون مدینه یولون
.
✔️ کشمکش دو لشگر
.
حسین قافله سی یولّاناندا راهیله
گلوب قاباقی کسوب حرّ اؤز سپاهیله
.
بویوردی شاه زَمَن حرّه بو نه جرئتدور
نه امردور نه تعدّی دی نه جسارتدور
.
ندور اِرادَن آنان ماتمونده اگلشسون
غمونده یعنی یانان ماتمونده اگلشسون
.
دئدی جوابوه هرچند قدرتیم چوخدور
ولیک فاطمه نون هتکینه یولوم یوخدور
.
دایاندی حرّ گینه ایلدی سوزون تکرار
دئدی گرک آپارام کوفیه سنی ناچار
.
گینه او هادیِ دین آند ایچوب خداونده
محالیدور تبعیّت اولا سنه منده
.
حسین قافله سی گتماقا ائدولّه تلاش
ممانعتده ائدور حرّ لشکری کنکاش
.
او یرده کشمکش ایلردیلر ایکی لشکر
ویراردی بیربیرینه تازیانه بعضی لر
.
چکوب قلجلاری بعضی لر ائتدیلر عریان
بیری بیرینه تعرّض ائدردی لشکریان
.
اوجالدی سسلر او دم سخت گیر و دار اولدی
فضا او عرصه ده فریاد و دادیله دولدی
.
او حالیده دییه بولمم حسینون اطفالی
نه حاله قالدیلا یا نولدی زینبون حالی
.
قُلوب اهل حرم بسکه وحشت آلمیشدی
تمام گل کیمی یوزلر سولوب سارالمیشدی
.
سکینه ئیکه نه لشگر گوروب نه وحشت جنگ
او حالیده دییه بولّم قاچوب یوزیندن رنگ
.
او نازپرورین اعضاسی تیتره دی یکسر
اَسَردی برگ خزان تک او غنچه وش لبلر
.
توکوب سرشکینی رخساره چکدی دلدن آه
فغان و دادیله بیر صیحه چکدی وا اَبَتاه
.
اودم سکینیه یوز دوتدی زینب مضطر
بویوردی قلبیمی یاندیرما توکمه اشک بَصَر
.
اماندی باغریمی قان ائتمه آغلاما صبر ائت
بو شدّتیله فغان ائتمه آغلاما صبر ائت
.
جواب وئردی ای عمّه نئجه دوتوم آرام
که قورخورام آنامی ئولدوره سپاه لُئام
.
آت اوینادوردی جوانان هاشمی انساب
کجاوه لر باشینا دور ائدردیلر پرتاب
.
بویاندا لشگری اِسکات ائدوب امام انام
اویاندا اؤز قوشونون حرّ ایلدی آرام
.
امامه سویلدی حرّ ای شهِ حمیده خصال
امیردن منه یوخدور سنیله اذن قتال
.
منیم بو عرضیمه گل یابن فاطمه عمل ائت
نه ایمدی کوفیه عزم ایله نه مدینیه گئت
.
کنار بیر یولی قصد ائت گئداخ معیّتیله
که صلح اولا آرامیزدا رَهِ عدالتیله
.
نظرده یوخدی داخی بوندان اؤزگه رأی صواب
یازوم امیریمه منده گوروم وئرور نه جواب
.
بو سوز موافق اولوب رأی شاه ذی شرفه
وئروب اجازه دونوب کاروانی صول طرفه
.
ایکی قوشون او یولی بیربیریله باهم اولوب
گئدوبله بیرنچه گون تا مهِ محرّم اولوب
.
✔️ #ورود_کربلا
.
محرّمین ایکیسی پنجشنبه نون سحری
دوشوب بلا چولونه والی الوُلا گذری
.
اولاندا دشت بلا میرعالمه مَقدم
گلوردی حرّیده شاه غریبیله توأم
.
قاباقدا بیر عرب اولدی پدید ناقه سوار
گلور شتابیله چیگنینده بیر کمانیده وار
.
گلوب برابره تا یتدی حرّه وئردی سلام
امامه ایلمدی اعتنا او شرّ لئام
.
اَنوب یره دوه دن وئردی حرّه بیر نامه
آلوب مطالعه ائتدی یتوردی اتمامه
.
دئدی بو حکم گلوب یا حسین امیریمدن
که اَل گُوتورمییَم ئولسمده دستگیریمدن
.
منه بو امری وئروبدور امیر با شوکت
حسینی قویما داخی بیر قدم ائده حرکت
.
سنیله رَسمِ مدارا داخی دگول منظور
گرک بو یرده نزول ائتدیریم سنی مجبور
.
امام گوردی تعدّیسین آرتیریر دشمن
مصمّم اولدی همان یرده ایلسون مسکن
.
علاوه عالمیدی عین قصد ائدن یردور
بولوردی جدّی آتاسی خبر وئرن یردور
.
✔️ فرمان امام خطاب به حضرت ابوالفضل (ع)
.
او دمده یوز دوتوب عباسه شاه مظلومان
بویوردی وئر آتام اوغلی سپاهیمه فرمان
.
بو دشتیدن دئ داخی گئچمسون بیری دورسون
نزول ائدوب هامی بو یرده خیمه سین قورسون
.
بو یردی مقصدیم ای صاحب وفا قارداش
منی همین بو یره سوق ائدوب قضا قارداش
.
گرک بو یرده وئرم دل قضای عشقیمه من
بو یر قضاسی منی ایلیوب جلای وطن
.
سوله بو یرده دوشه هم عنانلاریم قارداش
قطاری ساخلیالار ساربانلاریم قارداش
.
بو یر بو ناقه لرین سربه سر یاتان یریدور
هامی جوانلاریمون قانینه باتان یریدور
.
بو یرده غارت اولور ظلمیله خیام حرم
شهید ائدر بیزی بو سرزمینده اهل ستم
.
بو یرده آند اولا اللّهه ذبح اولور اطفال
بیزی زیارت ائدر بوردا صاحب آمال
.
همین بو تُپراقی جدّیم خبر وئروبدی منه
که یعنی بو یری مدفن وئروبله بو بدنه
.
حجاز قافله سی ایلدی عراقه نزول
کجاوه لردن اَنوب اهل بیت زار و ملول
.
وئریلدی امر شه دینیله سراپرده
ولی قورولدی خیام حرم چوخور یرده
.
✔️ گفتگوی حضرت زینب (س) با امام حسین (ع)
.
باخوب بو نکتیه زینب گلوب دِلی درده
گلوب حضور امامه دوروب برابرده
.
ائشیتمیشم دئدی قارداش که هر سفرده آتام
همیشه چوخ اوجا یرلرده قوردوروردی خیام
.
اونون مراسمینون سنده عکسینی گورورم
دوزنمیرم اؤزومه هر چه تسلیت وئرورم
.
نه سرّی وار منی آگاه قیل بو مطلبدن
نیه خیامی چوخور یرده قوردورورسان سن
.
کمال یأسیله گلدی او شاه گفتاره
بویوردی ای باجی سن محرمیم سن اسراره
.
آتام علی که علوّ خیامه طالبیدی
همیشه دشمنه دعوالرینده غالبیدی
.
ولی بو عرصه ده مغلوب ائدر منی دشمن
گرک خیامی چوخور یرده قوردورام باجی من
.
او دَم جوانلارینی ییغدی باشه میر انام
مخدّرات طهارتده دوره ووردی تمام
.
باخوب حسین اولارا یأس بی نهایتیله
اولاردا شاه غریبه باخاردی حسرتیله
.
حسین جوانلاری اهل حرم صغار و کبار
توکردیلر هامی رخساره اشک حسرت بار
.
شرار محنتیله صاف سینه داغلادیلار
صدا صدایه وئروب بیر دویونجا آغلادیلار
.
دوروب گئدوب هره اؤز خیمه سینده دوتدی قرار
ولی توکردیله گوز یاشلارین چو اَبر بهار
.
غمیله بسکه دِل شاه نینوا دولدی
شکسته حالیله دریای فکره غرق اولدی
.
✔️ نامه امام حسین (ع) به محمد حنفیه
.
مدینه یادینه دوشدی اله آلوب خامه
یازوب محمّده نسگل مقاله بیر نامه
.
بیان حالینی بش کلمه سؤزده آندیردی
نکات رمزیله پیش آمدینده قاندیردی
.
فقط بو مختصری یازدی یا اخا گویا
که بو جهان یوخوموش لایزالیدور عُقبا
.
اسیر قوش کیمی یعنی قفسدیَم قارداش
یاخونلاشوب اَجَلیم صون نفسدیَم قارداش
.
منه اگر چه برادر محبّتون چوخودی
غم ائتمه بیله گمان ائت حسینون هئچ یوخودی
.
وئروب او نامه نی بیر قاصده ائدوب اعزام
اوتوردی عالم یأس ایچره خیمه سینده امام
.
✔️ رسیدن نامه ابن زیاد به امام
.
یتیشدی قاصد ابن زیاد بد اختر
وئروب او سروره برنامه ی ملال آور
.
نه نامه سطرلری قید ظلم و جور شدید
تمام کلمه به کلمه اهانت و تهدید
.
حروفی سربه سر آلات حربیدی گویا
دل امامه اوتوردی باخاندا جا برجا
.
آلوب او نامه نی تحت لحاظه خواه نخواه
گوروب که بیله کتابت ائدوب عبیدالله
.
منه بو نوع خبر یتدی یاحسین سندن
که کربلانی به تحقیق منزل ایله میسن
.
بو قدر بول منه امر ایلیوب امیر یزید
بو امر سختیده تکراراً ایلیوب تأکید
.
که نه دویونجا ییم نه ایچم نه راحت اولام
که تا سنی یتورم قتله یاکه بیعت آلام
.
او نحس نامه که ائتدی حکایتِ مضمون
عزیز فاطمه نون اولدی حالی دیگرگون
.
گوروندی صفحه ی رویونده محنت آثاری
سارالدی کثرت غمدن جمال گلناری
.
دل شکسته سی تک برهم اولدی احوالی
الیندن آتدی یره نامه نی شه عالی
.
جواب ایستدی قاصد بویوردی یوخدی جواب
مکرر ائتدی سوزون پیک کفر کینه مآب
.
دئدی بو نامیه یوخدور جوابیمیز ابدا
اونا حلول ائلیوب کلمه ی عذاب خدا
.
دوتوب گلن یولونی قاصد اولدی ره پیما
یتوردی مطلبی ابن زیاده سر تا پا
.
بو سؤز مؤثّر اولوب بسکه نسل شیطانه
چکوب زبانه یانار اود تک ابن مرجانه
.
حسینیدن بو سوزه بیرگون انتقام آلدی
هاچان آلوب دئمورم سوز محلّینه قالدی
.
✔️ ادامه متن در موضوع #ورود_کربلا : کلام امام (ع) به حضرت زینب (س) در مورد زمین کربلا
در هشتک زیر
#باجی_حسینون_عهد_ائدوب_بو_یرده_امتحان_وئره

متن پیشنهادی:  داغیلدی ظلمیله پرگار زینب #غارت_خیام #حقیر_خویی

.
#آچوب_حضوریوه_ال_یا_رب_ایسترم_توفیق
#ترکی #حسینیه_ذهنی_تبریزی

نظر دهید

جستجو در نام شاعر یا مناسبت

Search
Generic filters
Exact matches only
Filter by Custom Post Type

کلمات کلیدی: فهرستاشعار14معصومموضوععاشورائیانماهشاعراصفهانیتبریزیاردبیلیزنجانی

جستجو در مصرع اول

Search
Generic filters

Filter by Custom Post Type

دسته بندی درختی

دسته بندی درختی