زبانحال حضرت لیلا(س) در بالین علی اکبر (ع)
..
..
..
..
مرحوم خادم تبریزی
..
..
..
..
آچ گوزلرون بوقدر منه ایتمه ناز اوغول
قویما قالا اورکده بو اسرار راز اوغول
..
احسن بو حُسن خدمتوه ایلدون عجب
زهرا آنان یانندا منی سرفراز اوغول
..
بذل ایلدون بو جانوی جانانه بندبند
کوی وفاده سن کیمی یوخ پاکباز اوغول
..
سن مظهر صفات رسول کرام سن
خلق ایچره واردی کیمده بیله امتیاز اوغول
..
طغیان ایدوبله ظلمده بو فرقۀ جهول
جور و جفادن ایتمدیلر احتراز اغول
..
ظلمیله بو پیمبره بنزر جمالوی
رنگین ایتدی قانیله اهل مجاز اوغول
..
زلفون گوزون یوزون بلشوب قانیله سنون
آلقانیله آلوبسان عجب دستماز اوغول
..
ایندیکه قاندان آلدون علی دستمازیوی
یاتما نماز وقتیدی دور قیل نماز اوغول
..
بو جسموه ووروبلا زبس ناوک سنان
بال و پر آچمسان اودی چون شاهباز اوغول
..
دور بیر اوتور بو نوعیله یاندورما سن منی
اوز یانماقیم دگل من بی یاره آز اوغول
..
بو قلبیده اوغول ئولومى آیریلیق غمى
صبر و قراریمی ایلیوب ترک تاز اوغول
..
جانیمده هر قدر اولا جان آغلارام سنه
غم خانه زلفون ایلرم عمر دراز اوغول
..
روز ازلدن اولدی بلا همدمیم منیم
هرگز منیله گلمدی بو چرخ ساز اوغول
..
دوزدوم تمام زحمتیوه مدّت مدید
چکدیم نقدر اوزون گیجه لر من ایاز اوغول
..
گیتسم مدینیه نه دیوم بولمورم على
گر آلسالار خبر سنی اهل حجاز اوغول
..
آهیم اودیله وار یری دنیانی اودلاسام
بو حالیمه یانار هامی شیب و فراز اوغول
..
هر قدر عمریم اولسا على یانّام آغلارام
گر چه سنون یولوندا اولاجان گداز اوغول
..
آخر سنون عزیزیویدیم یوخدی بیر کسیم
سندن صورا بو بی کسه ایتسون نواز اوغول
..
نیلوم اولان قفسدن اوچوب روحوین قوشی
هر قدر سسلرم نیه ویرمورسن آز اوغول
..
بو جسم چاک چاکیله آتدان دوشنده سن
ایتدون غریبه حقّیله راز و نیاز اوغول
..
چوخ ناز ایلسن علی سن چونکه بولموسن
بیکس آناندا واردی بو نازه نیاز اوغول
..
اوز خدمتونده یوخدی قصوری بو «خادمون»
مایلدی خدمت ایتماقا مثل ایاز اوغول
..
..
آچ گوزلرون بو قدر منه ایتمه ناز اوغول #اکبریه_خادم_تبریزی
نظر دهید