شهادت حضرت فاطمه زهرا سلام الله علیها
..
..
مرحوم صحاف تبریزی
..
..
آچ گوز بصیرتیله گوزوم روزگاره باخ
بو چرخ کجمدارده بیر وضع کاره باخ
..
ظاهرده باخما عزّت دنیایه باطناً
عزّت برابرینده کی رنج و فشاره باخ
..
چوخ بیوفادی ایلمیوب بیر کسه وفا
بو بی وفا زمانه ده بیر اعتباره باخ
..
عالمده چوخ عزیزلری ایلیوب ذلیل
رسم سپهر کجروش و کجمداره باخ
..
پیغمبریکه علّت ایجاد کَونیدی
باشدان نظاره قیل او شه کامکاره باخ
..
گور بیر سالوب نه زحمته بو روزگار اونی
ما اؤذِیَ النّبی ده اولان اشتهاره باخ
..
گه کول توکوبدی باشنه گه سنگسار ایدوب
جور جفای امت بی ننگ و عاره باخ
..
قویدی امانت أمّته رحلت ایدن زمان
زهرا عزیز عالم اولان یادگاره باخ
..
بیر گون عزیز حق اولی بیر گون ذلیل خلق
عالمده سن ارادۀ پروردگاره باخ
..
گه سینۀ رسول خدانی مقام ایدر
جاہ و جلال و رفعت و شأن و وقاره باخ
..
گاهی میانۀ در و دیوارده قالور
پهلو شکسته ذلّته باخ حال زاره باخ
..
بیر گون اولور دورور قاپوسندا ملائکه
ایستور اجازه فاطمه دن افتخاره باخ
..
بیر گون اولور که ثانی بیشرم و رو گلور
بیعت علیدن آلماقا اول نابکاره باخ
..
ظلمیله اود وورور ملک اذن ایستین قاپو
شعله چکور سپهره چخان دود ناره باخ
..
دیواریله قاپو آراسندا قالور او دم
ریحانۀ رسول خداوندگاره باخ
..
بیر سینه که پیمبر اؤپردی قویاردی یوز
مسمار باتدی بیر ستم ناگواره باخ
..
ثانی الینده حامله عورت فشار در
گور بیر دوشر نه حاله او جسم نزاره باخ
..
سندی قولی قابورقاسی سقط اولدی محسنی
گول تک بویاندى قانینه اول گلعذاره باخ
..
سسلندی فضّه ویر خبر آخر عم اوغلوما
آز قالدى ئولدوره منی بو کین شعاره باخ
..
فضّه یتوردی شیر خدایه بو مطلبی
عرض ایتدی انتظار ایله آز ذوالفقاره باخ
..
اگلشمه یا علی داخی درک ایت عمون قیزین
ئولدوردی ثانی فاطمه نی گیرُ داره باخ
..
مشگلدی گور نقدری او مشگل گشایه بو
صبر و تحمّل شه عرش اقتداره باخ
..
قان ایچره ال ایاق چالا بانوی کبریا
اما على دوروب باخا بیر اصطباره باخ
..
پیغمبرین وصیتینه ایلیوب عمل
دؤزدی مقدّراته شه تاجداره باخ
..
اولدی بو صدمه لر سبب موت فاطمه
کنز بلا شفیعۀ یوم شماره باخ
..
اون سگّیز ایل تمام بو عالمده عمر ایدوب
آز عمریله او درد غم بیشماره باخ
..
یتدی بهار عمرینه تیز آفت خزان
تاراج موسم دی اولان نوبهاره باخ
..
گل تک سارالدی سولدی جمال مبارکی
بار غمیله قامتی خم دل فکاره باخ
..
زلفی آغاردی غصّه دن آرتوب مصیبتی
قلب شریفی لاله صفت داغداره باخ
..
اوچ گونلریله آج قالوب عالمده دردینی
حتّى علیدن ایتدی نهان بردباره باخ
..
مزدور اولوب یهودیه ال داشی چکماقا
پیغمبرین خانم قیزی بیر روزگاره باخ
..
ایلردی عرض اللهی یتور تیز وفاتمی
لطفونله بو شکسته دل بیقراره باخ
..
چکدی او قدری غصّه علیل اولدی بستری
بیر حال ضعف دخت رسول فخاره باخ
..
گلدی عم اوغلوسی باشی اوستونده اگلشوب
مهر وفای خسرو والاتباره باخ
..
فرمایش ایتدی فاطمه آچ گوزلرون اویان
بو بی انیس و مونس و بی غمگساره باخ
..
راز و نیاز وقتی بو نه خواب نازدور
قربانی گوزلرون گوزون آچ بیر کناره باخ
..
گوردی جواب اولمادی طرز کلامنی
ایتدى عوض ولىّ حق کردکاره باخ
..
سسلندی ای حبیبۀ خلّاق ذوالجلال
دور یاتما آچگوزون من محزون زاره باخ
..
بیر نطقه گل دانیش منیله باغریم اولدى قان
بو آه سوزناک دل شعله باره باخ
..
گوردی دوباره فاطمه دن گلمدی جواب
یأس شه ولایته باخ انکساره باخ
..
وردی یره عمامه سنی توکدی گوز یاشین
شأن و وقار صاحبی بیر شهریاره باخ
..
آغلار گوزیله سویلدی یا بنت مصطفا
سس ویر گوز آچ بو حالیمه ایله نظاره باخ
..
ناز ایتمه فاطمه بو قدر باشون اوسته من
آز قالدی جان ویرم بو دم احتضاره باخ
..
هر قدری سسلورم نیه بس ویرموسن جواب
آخر عم اوغلوام من ایوی تارماره باخ
..
آلدی علی سسین گوزینی آچدی فاطمه
فرقت زمانی محضر دیدار یاره باخ
..
عرض ایلدی عم اوغلی منی گل حلال ایله
لطفاً بو دل شکستۀ بی اختیاره باخ
..
چوخ دردسر بو ایوده سنه ویرمشم مدام
معذور دوت گذشت ایله بو اعتذاره باخ
..
اما واریمدی بیر نچه عرضیم حضوریوه
قوی منّت قبول بو محنت و چاره باخ
..
ویر غسلیمی اوزون گیجه وقتینده دفن ایله
گوزلور آتام آنام یولومی انتظاره باخ
..
قویما جنازم اوستونه دشمنلریم گله
غمدیده خاطریمده اولان انزجاره باخ
..
مندن صورا عم اوغلی آجقلانما زینبه
رأفتله بو دیده لری اشکباره باخ
..
کلثومی خوشدلیله دانشدیر شکسته دور
اوغلوم حسنده آهِ دل پرشراره باخ
..
واردور حسینه روحیمون اوزگه علاقه سی
باعث همان علاقه دی بو اضطراره باخ
..
کرّات حُسینی مِنّی أَنَا مِن حُسین دیوب
الفاظ لعل بار رسول کُباره باخ
..
گویا گوزوم گورور کسیلوب باشی تشنه لب
سیر ایله بیر شقاوت قوم شراره باخ
..
من کربلایه گئتملیم سنده گل او گون
عیناً جفای أُمّته بیشرم و عاره باخ
..
سو اوسته تشنه قانه باتوب نوجوانلاری
قاندان او دشت غمده آخان جویباره باخ
..
بیر یاندا قطعه قطعه اولوب جسمی اکبرون
بیر یاندا نعش قاسمه باخ خاکساره باخ
..
بیر یاندا سرو قامت عبّاسه قیل نظر
قولسوز دوشن سو اوسته سوسوز نامداره باخ
..
بیریاندا اوخلانوب الى اوستونده اصغری
پستان یرینه قانین اَمن شیرخواره باخ
..
«صحّاف» یازما قافیه سخت اولدی ساخلا اَل
قویما سوزون مطوّل اولا اختصاره باخ
..
..
..
#فاطمیه #صحاف_تبریزی #فاطمیه_شهادت #ترکی #زبدةالاشعار
نظر دهید