در ضربت خوردن و وصیت حضرت امیرالمومنین علیه السلام
گریز به #امان_نامه
.
.
.
مرحوم انور اردبیلی
.
.
ائتدی طلوع کوفه ده خورشید انقلاب
ضربت دگوب یخیلدی نماز اوسته بوتراب
.
صدمه یتوب مظاهر سرّالعجائبه
غالب اولوب یارا اسدالله غالبه
.
نایل اولوبدی زادۀ ملجم مرادینه
ظلمون اودون سالوبدی وفا اتّحادینه
.
پنجه گشای حقّه آچوب پنجۀ جفا
غمگین اولوب بو حادثه دن روح مصطفی
.
قُتِلَ العَلی منادی غیبی ائدوب ندا
شمشیر ائدوبدی ساجدی ، مسجودیدن جدا
.
زهرابه سی آلوبدی اورکدن ثباتنی
روح الصّلاة پاره قویوبدور صلالتی
.
دلدن سالوبدی یاره سی شاه ولایتی
رنگین اولوبدی قانیله محراب طاعتی
.
شیر خدا مراده یتوب موسم صبا
قاندان سالوبدی دست اجل چیگنینه عبا
.
ضعف ایلدی وصیّ بلافصل احمدی
رکن صلاة سیندی دوباره دوزلمدی
.
قادر قیامه اولمادی اول مقتدر امام
حکمت ندور یخیلمادی بو چرخ کینه فام
.
مشکل گشا بالالاری توش اولدی مشکله
ماتم صداسی مسجدی گتدی تزلزله
.
درک ایلیبودی گوش فلک آغلاماق سسین
اجماعیلن صحابه لری آلدی دوره سین
.
باش آچدیلار بوکولدوله محنت لباسینه
حمل ایتدیلر او حضرتی دولت سراسینه
.
قطب وجودی نائرۀ غم آلیشدیروب
صبحون نسیمی شیر خدانی دانیشدیروب
.
نطقه گلوب بیان ائلدی شاه عشقباز
آگاه سن بو مطلبه ای باد دلنواز
.
خلّاقدن خلایقی الفت کسن زمان
صبحون دمیده سی اویانوب سن اسن زمان
.
بیر صبح گهده غفلت اولا بوترابیده
یاتموب علی فراغتیلن رختخوابیده
.
ای گللری شکفته ائدوب منظره آچان
مندن قاباق اوزوی گورموسن هاچان
.
ضعف حالتینده باشدا یارا پوزقون حالتی
درگاهینه یتوردوله شاه ولایتی
.
اصحابینی مخاطب ائدوب ایلدی خطاب
گرچه یارام ائدوبدی وجودیمده انقلاب
.
فکریم بودور اوزوم یئریَم صحن خانه نی
پوزقون حالیندا گورمیه تا زینبیم منی
.
ناله سسی اوجالسا یادیمدان چیخار یارام
چوخدور بلاسی آغلاسا زینب من آغلارام
.
گئچدوم سوزی دوشوب خطره کشتی نجات
آلدی قوجاقه شیر حقی بستر ممات
.
تأثیر ائدوبدی سمّ جفا اولدی کارگر
غالب اولوب آچوبدی اجل جبهۀ خطر
.
رنگ جمالی سولدی اولوب زعفران کیمی
ماه صیامون اولدی شب بیست و یکّمی
.
جمع ایلدی بالالارین اطراف بستره
آخر زمان ، محبّت اوچون آجدی منظره
.
بیر بیر قیلوب نظاره هامی مه لقاسینه
تفویض ائدوب امامتینی مجتباسینه
.
اوندانصورا حسینی چاغوردی برابره
ائتسون وصیّت ایستدی عبّاسی محضره
.
حلّ ایلیوب او حالیده بیر عمده مسئله
اوغلانلارینی حسرتیله وئردی ال اله
.
داغلی اورکدن آه چکوب سینه داغلادی
عبّاسینی حسینینه تاپشوردی آغلادی
.
یوم بلا سنیله بودور هم معاهده
رأفتله سن پناهیوی ساخلا پناهیده
.
بذل محبّتون ائله بوضیغم افکنه
دست خطر گلنده سپرگیردور سنه
.
کرب وبلا وزیرینه بعد ایلدی خطاب
ای محفل وفاده وفا شهرت انتخاب
.
نوکر سنی اوغول وئرورم نور عینیمه
ابراز خدمت ایله ئولونجه حسینیمه
.
هر بیر خطرده ایله کمک قویما تک قالا
سندن حسینیم اینجیسه من اینجورم بالا
.
ختم رسالتون گهر دلرباسیدور
پیغمبرون رضاسی حسینون رضاسیدور
.
درک ایلیوب بوسوزلری عباس نامدار
صندوق سینیه جمع ایدوب قالدی پایدار
.
کرب و بلا چولنده قیلوب حقّینی ادا
پیغمبری علینی حسینی ایدوب رضا
.
هانسی زمان نه ساعتیدی موقع لزوم
صاحب لوایه گتدی امان نامه شمر شوم
.
تلّى اننده آرتدی بلا فوجنون سانی
فریاد ایدوب منیم باجیم اوغلانالاری هانی
.
یتدی خیمده سمع اباالفضله بو صدا
آگاه اولوب سسینه ولی وئرمدی صدا
.
سلطان دین بویوردی اباالفضله ای دلیر
گت گور گلوب نه علته بو ظالم شریر
.
امر امامه مجرى اولوب اول رشید خو
گلدی دایاندی شمر لعینیله روبرو
.
فرمایش ایتدی شمره که ای منبع ستم
فکرون ندور بوساحته سن قویموسان قدم
.
تعظیم ایدوب الف قدینی ایلدی چو نون
تسلیم قیلدی نامه نی عبّاسه شمر دون
.
نامد نه نامه معنی عنوانی تلخ بار
قتل حسینه حکمدی مضمونی آشکار
.
برنامه ای جهانی او نامه ایدور عیان
مضمون عمده سی ولی عباسچون امان
.
بو نحولن ایدوبدولر عباسی باخبر
یتجک سنه بو نامه مز ای شیر باهنر
.
آیریل گلن او چولده شه مشرقین دن
بل که حسین خطرده دی ال چک حسیندن
.
قوی قلزم بلاده امیر حجازی تک
دریا اوزینده دی او حسین تخته پاره تک
.
اعظم لواسی باتماقنا آزقالور اونون
بحر بلاده باتماقنا آز قالور اونون
.
اوز حالوه ترحم ایله گور هایانداسان
گلسون بزیم سپاهیمزه گل امانداسان
.
مضمون نامه نون ندی مطلوبی بَلَنوب
عبّاس نامدار اوخودوقجان غضبلنوب
.
تهییج ایدوب قواسنی غم قلبدن یانوب
پاره ایدوب او نامه نی شمره آجقلانوب
.
نقشونده یوخدی فائده بیجا دایانموسان
شرمنده ایلدون منی سن هیچ اوتانموسان؟
.
یوخدور اجازه روشن ایدردوم حسابوی
شمشیرمله یاخشی وئرردوم جوابوی
.
رجعت ایدوبدى خیمیه ساری بلا درنگ
اما نحالدا دوتفون حالندا پریده رنگ
.
غم لشکری یریش گتوروب اولدی مستقر
شهرتلنوب خیامده بو قورخولی خبر
.
بحران زمانی خیمه ده دیگ بلا جوشوب
رعشه دوتوبدی قورخوشان اطفال قورخوشوب
.
زینب گلوبدی فوراًحضور امامته
مشغول اولوبدی واهمه حالیله صحبته
.
عرض ایلیوبدی ای شه ابرار نیلروک
وقت خطردی گتسه علمدار نیلروک
.
عباسیدور بو چولده امید و پناهمز
اوندان صورا بزیم کیممز وار نیلروک
.
تشویشده گوروب باجسین شاه کربلا
احضار ایدوب حضوره گله صاحب لوا
.
فوراً حضور شاهه شرفیاب اولوب وزیر
سوزدن گوتوردی پرده شهنشاه بی نظیر
.
قارداش ایشتمشم سنه دشمن امان ویرور
اکرام ایدور علاقۀ مفرط نشان ویرور
.
گر خیمه گاهی ترک ایده سن مانع اولمارام
تنها قویوب منی گیده سن مانع اولمارام
.
دشمن سنی امیر ایلسه گر سپاهنه
آتلو پیاده دولماز حسین خیمه گاهنه
.
فرصت یتن زمانیده آل امیّیه
شمر شریر سیلی ورانماز رقییه
.
ئولسمده من قرا گونه قویمازلا زینبی
غارتده سن باخاباخا سویمازلا زینبی
.
باشیم کسیلسه ایلسه ده نیزه نی مکان
قویمازسان اللریمی کسه باری ساربان
.
عرض ایلدی حسیننه یاندیرما چوخ منی
بو سوزلری دیوب سن اوتاندیرها چوخ منی
.
درباروون یقین بله سن ترکین ائتمرم
بحران زماندی گر منی قؤسوندا گئتمرم
.
قؤسون ئولنجه چوللرى من مسکن ایلرم
شهرت تاپار حسین قوئوب عبّاسی نیلرم
.
گر اولماسون رضا شهدا ایجره گورسنیم
آل پرچمی قلنجی بیلیمدن گل آچ مینم
.
رخت علاقه می بلوسن که سویانمرم
اهل عیالوی گوزی یاشلی قویانمرم
.
ای لشکر حسینده صاحب لوا اولان
أی سو یولوندا قولاری تندن جدا اولان
.
ایتسون نظر بو «انوره» شیرین کلام اولار
گرشامل اولسا لطفون عزیز و گرام اولار
.
.
#حیدریه_انور_اردبیلی
#حیدریه_شهادت
#ائتدی_طلوع_کوفه_ده_خورشید_انقلاب
#ترکی #انقلاب_کربلا
.
#زبدةالاشعار
.
: @nohe_torki
نظر دهید