ورود ماه محرم
.
#زبدةالاشعار
.
: @nohe_torki
.
#سبک_احوالیمیز_یاماندی … 10 سبک
.
مرحوم حسینی سعدی زمان
.
ارکان دین و ایمان
ویران اولوب بو آیدا
پیغمبر اوغلی قانه
غلطان اولوب بو آیدا
.
.
بو آی همان او آی دور
عرشه چکیلدی قاره
یِتمیش ایکی موحّد
دوغراندی پاره پاره
گلدی رسول اکرم
جنّتده آه و زاره
گوردی بتول عذرا
گریان اولوب بو آیدا
.
.
اولدی بو آیدا منزل
دشت بلا حسینه
افلاکیده قورولدی
بزم عزا حسینه
خرگاه ماتم اولدی
عرش خدا حسینه
گوگلر حسین غمینده
نالان اولوب بو آیدا
.
.
زهرا دیر اوغول وای
بو آیدا حیدر آغلار
ماتم دوتوب حسینه
جدّی پیمبر آغلار
آغلا حسینه شیعه
عالم سراسر آغلار
اشکی امام عصرین
آلقان اولوب بو آیدا
.
.
سو یولّارین کسوبلر
بو آیدا قوم اعدا
اللرده بوش سو جامی
آغلار بنات زهرا
ای کاش قان اولِیدی
یکسر قنات دنیا
ذرّیّه ی رسالت
عطشان اولوب بو آیدا
.
.
کرب و بلا چولنده
برپا اولوبدی محشر
لب تشنه دوغرانوبدور
قطعه به قطعه اکبر
پستان کیمی اَموبدور
نوک خدنگی اصغر
پیکان او شیرخواره
پستان اولوب بو آیدا
.
.
اوز سود اَمَر بالاسین
گورجک چکوبدی بیر آه
قالدی حسین نه حاله
بُلدی او حالی الله
دولدوردی قاندان اُوجین
سَپدی سپهره اول شاه
قانیله چرخ اطلس
الوان اولوب بو آیدا
.
.
اوچ شعبه لی خدنگه
اصغر نشان اولاندا
ظلمیله شاه دینون
گُل غنچه سی سولاندا
اصغر دیوب آناسی
گیسولرین یولاندا
اشک سکینه رشک
عُمّان اولوب بو آیدا
.
.
قاسم جوان ئولوبدور
غمگین اولوب آناسی
آغلار دیر بالامون
قان اولدی طوی حناسی
طوی گورمیوب جوانیم
گِیموبدی طوی لباسی
توپراقلاریله نعشی
یکسان اولوب بو آیدا
.
.
بزم نشاطی ایتسون
بیت الحزن جوانلار
ناکام ئولوب بو آیدا
گُل پیرهن جوانلار
دین اوسته دوغرانوبدور
طوی گورمین جوانلار
طویلار عزایه دونسون
اعلان اولوب بو آیدا
.
.
قان آغلادور جهانی
عبّاس ماجراسی
چیگنینده بیر سو مشکی
آنّیندا اوخ یاراسی
قول یوخ ولیک قویمور
دوشسون یره لِواسی
باخمور بدن نشانِ
پیکان اولوب بو آیدا
.
.
بو آی یر اوسته عطشان
سلطان دین یخلدی
کرب و بلاده فرشه
عرش برین یخلدی
اسلامیان امامی
حِصن حَصین یخلدی
زهرا عزیزی زیبِ
میدان اولوب بو آیدا
.
.
فریاد او وقتیدن شمر
آغلاتدی مهر و ماهی
ئولدوردی سو یانندا
عطشان، یارالی شاهی
آل علی سویولدی
اودلاندی خیمه گاهی
پیغمبرین جلالی
تالان اولوب بو آیدا
.
.
فصل خزان اولاندا
وار سرّی بلبل آغلار
گلزار دین سولوبدور
بلبل یانار گل آغلار
شیعه اولان بو آیدا
باشه سَپَر کُل آغلار
راس حسین کُل اوسته
مهمان اولوب بو آیدا
.
.
وار ای «حسینی» دردون
ممکن دگل مداوا
باخما علاج ایدنمور
عاجز قالوب اطبّا
یالوار حسینه آغلا
نومید اولما اصلا
چوخ درد بی دوایه
درمان اولوب بو آیدا
.
.
.
.
#ارکان_دین_و_ایمان_ویران_اولوب_بو_آیدا
#لمعات_حسینی ص 146
#ترکی
.
#زبدةالاشعار
.
: @nohe_torki
نظر دهید