نامه نوشتن حضرت صغری (س) به دشت کربلا
.
.
مرحوم ذهنی زاده
.
.
گوگل علاقه سی وار زلف تابداریله
او زلف خمخم و چین چین و مشکباریله
.
اوتار طرّه نون ایتدیم خیالینی شب و روز
دونوب گونوم گیجیه فکر تارتاریله
.
خیال وصل نگار ایلیوب خیالی منى
قسم او عشقه که روحا ًواریمدی یاریله
.
نه وار امید وصاله نه تاب هجرانه
وارام نقدر وارام فرقت نگاریله
.
یازام نقدر غم هجر یار قورتولماز
تمام عمریله دنیاجه دستیاریله
.
گر ایسته سن گوره سن مبتلای هجرانی
مدینیه گذر ایت چشم اشکباریله
.
دولان او شهریده تاپ خانمان زهرانی
یتیر قولاقوه بیر ناله آه و زاریله
.
او ناله صاحبی صغرادی دخت شاه حجاز
قاپو دالندا دوروب بیر تن نزاریله
.
دیر که بار خدا گلمدی علی اکبر
نقدر یانمالیام انتظار یاریله
.
اوزوم مریضه و رنجور و ناتوانم من
نولور بس آخر کاریم بو روزگاریله
.
گیدوب آتا، عمو، قارداش باجی هامی سفره
قویوب وطنده منی بیر دل فکاریله
.
مگر نقدر اولى من تک مریضه قیز دوزومی
بوقدر محنت و اندوه بی شماریله
.
گیدنلرون گوره سن ای خدا باشندا نه وا
که سالمیوب منى یاده بیر اختباریله
.
نجه اولور که منه یازماسونلا بیر نامه
باخام او نامیه بیر دیدۀ خماریله
.
مریضه ام من بیچاره بولمورم نیلوم
شرار هجریله یاندیم بو استناریله
.
یقین ایدم که مسافرلریم سلامتدور
فراقه صبر ایلیوم قلب داغداریله
.
بیر اهل دل تاپا بولمزدی درد دل دئماقا
صبایه شرح غم ایلردی اضطراریله
.
دیردی باد صبا کربلایه دوشسه یولون
بیان حال ایله سلطان تاجداریله
.
یتور سلاممی عرض ایله مهربان باباما
قالوب وطنده قیزون حال ناگواریله
.
اگر چه اوز وطنیمدور ولی غریبم من
وطن وطن اولى قومیله اهل داریله
.
گیدوب سنیله هامی قوم و اقربا سفره
کیم آشنا اولی دنیاده غم دچاریله
.
یادندادور باباجان آیریلاندا صغرادن
نه عهد باغلادون آخر بو بی قراریله
.
نه گلدی قارداشیم اکبر نه نامه گوندردی
من فلک زده ئولدوم بو انتظاریله
.
آنام اولیدی خدا دردیمی دیدیم بیر
چکیدی نازیمی بو درد انکساریله
.
یتور بو بیکسه بیر کیمسه غم گسار اولسون
اولورغمیم آزالار یار غمگساریله
.
ایله اثر واریدی آہ و زار صغراده
یاناردی هر ایشیدن آه شعله باریله
.
ایدر همین خبری نقل قول (ذهنی زاد)
بیر آز تصرّفیله قصد یادگاریله
.
دوشوب او کوچیه بیر گون گذاری بیر عربون
دیولّه قاصدیمش عمده اشتهاریله
.
ایشیتدی ناله نی ایتدی سؤال علتنی
اولوب قضیه دن آگاه اختصاریله
.
او باغلانان قاپونی گلدی دق باب ایلدی
دل کبایله داده چخ ابتهاریله
.
دیدی سلام اولا ختم رسالت عترتنه
ثبات وار نقدر لیلۀ نهاریله
.
خانملاریم گیدورم کربلایه اولسا سوزوز
بیان ایدون من دلخون و جان نثاریله
.
بو خانواده دن هر خدمت امر اولونسا منه
جهانه فخر ایدرم تک بوافتخاریله
.
یتشدی تا بو صدا گوش جان صغرایه
گل جمالی آچیلدی دم بهاریله
.
چخاتدی دردینی یاددان دوروب بیر اگلندی
او عین ضعفده شوقیله اقتداریله
.
خیال ایدوب آتاما نامه گوندریم باری
ایدوم گلایمی کتباً او شهریاریله
.
یازوم که صاقدی هنوز ئولمیوب قیزون صفری
قالور مدینه ده بی انتها فشاریله
.
قلم آلوب اله بی حد غم و ملالیله
او نامۀ غمی یازدی بو شرح حالیله
.
بو نامه دور بیر علیله صغیره صغرادن
او شهریاره که آواره دوشدی بطحادن
.
اگر چه ظاهر صورتده شرح حالیدی بو
منیم گوزومده بابا نیمۀ وصالیدی بو
.
هامی گیدنلره ب ونامه بیر پیام اولسون
من کمینه دن اوّل سنه سلام اولسون
.
گر ایسته سن بولسن بو مریضه نون حالین
بو مبتلای فراق و مصیبت احوالین
.
بو روزگار دنی طی روزگار ایلیور
ولیک گوندوزی هجرون گوزومده تار ایلیور
.
هنوز ئولمه میشم خالقه ثنا ایدرم
گیجه گونوز گوزی یاشلی سیزی دعا ایدیرم
.
بودور همیشه سؤالیم خدای یکتادن
مَصُون ایده سیزی غربتده هر بلایادن
.
اوقدر اولیدی ویریدى اجل منه مهلت
که ئولمییدیم اولیدی زیارتوز قسمت
.
اولا ایکیمجی سلامیم بنین کرّاره
على الخصوص ابوالفضل عموم علمداره
.
همان عمو که منی گونده دید ایلردی
من مریضه نی گل تک اؤپردی ایگلردی
.
نه تک عموما سلام عرض ایدر بوبخت سیاه
سلام گوندرور ام البنین و عبدالله
.
دعای خیر ویرنده سیزه بو زار و حزین
بولاردا صدق دلیله دیور خدا آمین
.
اولا اوچومجی سلامیم بنات طاهایه
خصوص حضرت زینب نشان زهرایه
.
خانم ببیمدن ایدم حقلیم گلایه بابا
نولوب که لطفی آزالدى بو بینوایه بابا
.
آنام ئولنده بویوردی سنه آنایم من
اوزی بولور نقدر درده مبتلایم من
.
مگر بو رسمله رفتار ایدر یتیمه نواز
قویالا ناخوشی یالقوز مین آهیله دمساز
.
داخی سلام اولا شهزاده گان والایه
خصوص قارداشیم اکبر او ماه سیمایه
.
او نوجوانه که یولدا قویوبدی گوزلریمی
على على ایلیوب صبح و شام سوزلریمی
.
من بلاکشه لطفون حد کماله یتور
بو بلبلون گله سین سن او گل جماله یتور
.
بودور سوزوم بابا شهزاده دل آرایه
او خُلق و خِلقت و منطقده شبه طاهایه
.
گورونمیوب على قارداش بو دار دنیاده
مریضه باجیسی قارداشی سالماسون یاده
.
قسم خدایه برادر که سندن آیرلالی
شرار محنت هجریله باغریقان اولالی
.
نه بیر گلوب گیدنیم وار نه حالیمی سوروشان
غریبم اوز وطنیمدن بو غربتیمدن امان
.
انیسیم آه سحرگاه مونسیم غم اولوب
گوزوم پیاله سی خونابه جگرله دولوب
.
گیجه گونوز گیچور عمریم چوخ آه و زاریله
یانار مریضه باجون نار انتظاریله
.
اوزیمی وعدۀ وصلونله دلخوش ایلمشم
قاپو دالین بو امیدیله منزل ایلمشم
.
که بیر گونی اولاجاخ بخت کوکبیم رخشان
عراقیدن گله جاق قارداشیم منه مهمان
.
اجل قوییدی قالیدیم او قدر دنیاده
او گل جمالی گوریدیم دوباره بطحاده
.
ولی بو وضعیله که ایلوری مرض شدت
اینانمورام اولا وصلون بو ناخوشا قسمت
.
گلینجه سن من زار و علیله ئولسم اگر
خدا رضاسینه بیر قبریم اوسته ایله گذر
.
قبول زحمت ایدوب یاز مزاریمون داشنا
که قالدی فاطمه حسرت ئولنده قارداشنا
.
چوخ اولدی زحمتیم ای عزت و شرف تاجی
نیدوم سؤَر بابا عالمده قارداشی باجی
.
نه بیرمنم یانورام آتش فراقیله
جوانلارین چوخی وار اکبر اشتیاقیله
.
گلولّه شام و سحر دسته دسته کثرتیله
خبر آلولّا او شهزاده نی نه حسرتیله
.
دیولّه عجزیله ای دختر امام حجاز
هاچان گلور بس على اکبر ایلیاخ پیشواز
.
قسم او طرّۀ طراره زلف خم خمینه
چوخی طوی ایلیه جاخ منتظردی مقدمینه
.
شرار هجریله هر چند من أوزوم یانورام
جوانلارا اوز اوزومدن زیاده اودلانورام
.
یتور سلامیمی بیرده مریض قارداشیما
اونون خیالیدی باعث همیشه گوزیاشیما
.
بو ناخوشون یرینه اوپ عذار بیماری
منیم دیلیمجه سوروش حال زار تبداری
.
خانم آنالاریما تک به تک سلامیم وار
آنام ربابه علاحدّه بیر پیامیم وار
.
بودور عرایضمون مجملی و مختصری
فراق گونلرینون دست رنجنون ثمری
.
شیار قلبده تخم وفانی أکدیم من
او که اذیّتیدی ضعفمیله چکدیم من
.
بو اولدی حاصل رنج و نتیجه زحمات
لباس تازه دی بیر دست اصغره سوقات
.
سرشگ دیده می صورتده سیله دوندردیم
حضوریوه آنا بو قاصدیله گوندردیم
.
گییندیر اصغریمون اگنینه اولا خوشحال
یوزوندن اوپ عوضیمدَن منیم قوجاقوه آل
.
بیور آخار باجوون قانلی گوزیاشی گوزدن
سالام محالیدی بوش گاهواره وی گوزدن
.
گلور خیاله بو گونلر او سود امر دل آچور
آنا باجی قاباقندا آیاق دوتوبدی قاچور
.
قالانلارا هامویه فرد فرد یازدی سلام
یتوردی نامه سین اشگیله ختمه دخت امام
.
یازیلدی نامۀ غم ختمه شرح غم یتدی
گتوردی قاصده بیر بوقچائیله ردّ ایتدی
.
گوروب او بوقچانی اول قاصد حمیده خصال
ندور بو یا کیمه تقدیم اولونسون ایتدی سؤال
.
جواب ویردی که بیر تحفۀ محقردور
آنام ربابه یتیشسون لباس اصغردور
.
بو فکر دیدیم اولور بیر گونی که بخت اولی یار
بو بینوانی عراقه بابام ایدر احضار
.
ایدنده درک حضور شهنشه عرصات
علی اصغره اولسون الیمده بیر سوقات
.
علی العجاله که ممکن دگول وصالی منه
بو زحمتی اودى ویرّم من ضعیفه سنه
.
خلاصه آلدى اماناتی پیک کوی نگار
اولوب عراقه طرف سرعتیله راهسپار
.
اولوب جبال و صخاریده تند رهپیما
یتیشدی دشت بلایایه عصر عاشورا
.
همان او وقتیدی گویا که شاه ملک حجاز
سپاه باطله ایتمیشدی احتجاج آغاز
.
الینده مصحف او قومیله صحبت ایلردی
نه دللریله که اتمام حجت ایلردی
.
کلوب یاخونلادی تا شهریار محتشمه
سلام عرض ایدوب اوّل او شاه غم حشمه
.
ایشیتدی تا او سلامی او دلشکسته امام
یانقلى قلبله ویردی جواب علیک سلام
.
کمال حسرتیله باخدی تازه مهمانه
اورکلنوب گوزونون یاشی آخدی دامانه
.
بویوردی کیمسن هایاندان گلوب هارا گیدوسن
من غریبی بو وقتیمده یادبود ایدوسن
.
جواب ویردی اودم پیک کوی جانانی
مدینه دن گلورم ای مدینه سلطانی
.
نیدوب مدینه آدی شاه ملک محنتیله
بولر او کسکه گچر روزگاری غربتیله
.
بویوردی وار نه خبر سنده شهر یثربدن
و یا نه حالده دور شیخ وشاب اهل وطن
.
دیدی مدینه دیمه ای وطندن آواره
سواد اعظم غمدور او شهر یکباره
.
اگر بیان ایلییم وضع و حال بطحانی
دوتار غبار محن قلب قطب امکانی
.
قالانلاریندان او شهر ایچره ناگرانسان اگر
بیور بو نامیه باخ مطلبی حکایت ایدر
.
وطن مطالبنه جزء جزء دارادور
مدینه نامه سیدور عرض حال صفری دور
.
ایله آلندی بوسوزدن امام یاراسی
سارالدى سولدی گل روی عالم آراسی
.
آخا آخا یوزونه اشگ چشم خونباری
آلوب او نامۀ صغرای زار و بیماری
.
تحسّریله باخوب بیر کتاب طُغرایه
او سر به سر غم و اندوه درد صغرایه
.
او قان اولان دلی درد ملالیلن دولدی
همان او قاصدیله مخیمه روان اولدی
.
زبس بومحنت بی حد سرایت ایلردی
امام اوز اوزونه یولدا صحبت ایلردی
.
قولاق ویریدی بیری گر امام صحبتنه
اولوردی پی آپاریدی گوگلده محنتنه
.
بولردی قلبینی حسرت اودی ایدیر بُریان
هامی مصیبتی بیر یان بو تازه غم بیر یان
.
او حالتیله که قانیاش توکردی سیمایه
قباقجه سرور مظلوم گلدی قتلایه
.
کمال حسرتیله باخدی بیر ئولنلرینه
همان طریق وفاده قباق گیدنلرینه
.
اولوب دوباره غم اوسته مزید غم سببی
مخاطب ایتدی جوانان هاشمی نسبی
.
بیوردی سیز منه هر شدّتمده یار اولدوز
ره وفاده صداقتله جان نثار اولدوز
.
نه یاتموسوز اویانون تازه بیر غمه توشم
مدینه دن سیزه نامه یازوب جگر گوشم
.
بو نامه دور گتورن نی کیمی نوایه منی
سالان بو وقتده بیر درد بی دوایه منی
.
سرشگیله غم ایدوب جام چشمی مالامال
مطالبین اوخویام ویرمور اشک دیده مجال
.
آلون بو نامه نی باری بیروز قرائت ایدون
نه یازموش اولسا منه کاملاً حکایت ایدون
.
کیمیم واریمدی منیم بو زمان سختیمده
گلوب هرایمه یتسون بو سخت وقتیمده
.
دیردی سوزلرین آهی چکردی آه اوسته
اوزین یتوردی اوغول نعشی اوسته آهسته
.
دیردی یاتما اویان ای جوان مه سیما
گلوبدی نامه وطندن یازوب باجون صغری
.
اوزون بلورسن اولور نامه ده جوابه نیاز
اوخی مریضه باجون نامه سین جوابینی یاز
.
روا دگل بیله بیر نامه بی جواب اولسون
وطنده فاطمه حسرتله دلکباب اولسون
.
اولاندا وارد قتلا امیر حِلّ و حرم
قضادن اولدولا آگه مخدّرات حرم
.
خیامدن توکلوب دیشره اهلبیت امام
بیوک کیچک خانیم عورت اوشاق کنیز تمام
.
گلوب او خیمۀ قتلانی ایتدیلر محصور
تمامنون گوزی یاشلی دلنده ناله و شور
.
قولاق ویروردیله مظلوم امام سوزلرینه
آخاردی جمله سینون اشک چشمی یوزلرینه
.
ایله مؤثّریدی حال سیّد ابرار
که گلدی شیونه سس چکدی عترت اطهار
.
ایشتدی ناله سسین تا که سرور مظلوم
کمال سرعتیله چخدى خیمه دن مغموم
.
مخاطب ایلدی گوز یاشلی زینب زاری
بیوردی گل باجی ای درد و غم خریداری
.
عذاره ایله دُر اشک چشموی جاری
آچلدی غصّۀ دیگر له غصّه بازاری
.
دیمه مریضه قزیمداندا ناگرانم من
خدایه شکر سلامتدور اول غریب وطن
.
دونوب وطنده گونی درد و غصّه دن شاهه
سالوب بیزی باجی جان یاده یولّیوب نامه
.
کباب اولار باخا هر کیمسه بوکتابتنه
سلامی وار هامی آل رسول خدمتنه
.
منه جوابنی یازماقلقا یوخ امکانی
اوزون جوابین آپار یثربه حسین جانی
.
یتور سلامیمی اول ناتوان و مهجوره
که ای سالان باشیمى صون نفسده مین شوره
.
وفای عهدی قضا و قدر گجه سالدى
بیرى بیریمزی گورماح قیامته قالدی
.
سفارشین یتوروب عازم اولدی میدانه
ایدوب مقابله کفاریله باتوب قانه
.
مآل کارینی اول قاصدین بولَن یوخدی
گیدوب مدینیه یا گیتمیوب دیَن وخدی
.
بوقدر وار گوزی یولّاردا قالدى صغرانون
وصال بابه امیدی آزالدی صغرانون
.
بودور خیالیم ایده کسر مطلبی تعقیب
بنای صبریمی گرچه ایدوبدی غم تخریب
.
او شاهزاده اگر ایلیه منی تأیید
بیر اوزگه طرزیله عنوانی ایلرم تجدید
.
او گونکی نامه نی یازدی خانم یولا سالدى
جواب گلمدی بیر عمر ناگران قالدى
.
دولاندی هفته لر آیلار همان قراریله
کیچردی هر گونی آلام و انتظاریله
.
یازولّا بیر گجه چوخ غصه و ملالیله
گیدنلرین یوخودا گوردی اوزگه حالیله
.
کمال وحشتیله اولدی خوابدن بیدار
توکردی عارضنه اشک دیدۀ خونبار
.
مخاطب ایلدی اوز جدّه سین او مهمومه
دیدی اویان یوخودان ای غمیله مغمومه
.
نه یاتمسان که گلستان مصطفی سولدى
خدای حقه قسم ختم انتظار اولدی
.
عبث یره یولا گوز تیکمیشم من مضطر
قیامته کیمی گلمز داخی علی اکبر
.
.
.
#گوگل_علاقه_سی_وار_زلف_تابداریله
#ترکی #حضرت_صغری #ذهنی_زاده
#زبدةالاشعار
نظر دهید