ازلیت چمنینده گل زیبا زهرا #فاطمیه_انور_اردبیلی

حالات حضرت زهرا (س) در #قیامت
.
.
.
مرحوم انور اردبیلی
.
.
ازلیت چمنینده گل زیبا زهرا
ابدیت وطنینده وطن آرا زهرا
.
.
صدف عصمته ای گوهر یکدانۀ ناب
پیکر اقدسی اسطورۀ موزون حجاب
حضرت باری ایدوبدور سنه محبوبه خطاب
کلک قدرتله قیلوب وصفوی انشا زهرا
.
.
سورۀ نوریده شأنونده گلوب آیۀ نور
سورۂ کوثریله رتبون اولوبدور مشهور
وجه باقی ایدوب آئینۀ ذاتونده ظهور
صورتونده گورونوب طلعت معنا زهرا
.
.
شوکتون حضرت سارانی ایدوبدور مبهوت
سن اولان یرده گرکدور ایده حوّاده سکوت
محضروندن آپارار فیض جلال و جبروت
مریم اولسا سنه شاگرد الفبا زهرا
.
.
کیمدی سندن صورا اسپهر عفافین ماهی
خلوات و جلواتنده گورن اللهی
فکرتی فلسفۀ غیب و شهود آگاهی
سینه سی علم کلام اللهه دارا زهرا
.
.
حلقۀ پنج تنه حسنی نگین ممتاز
بندۀ عشقی ایدن تخت سلیمانلارا ناز
کوی لطفونده حجاب اهلی ایدن عرض نیاز
آستانینده ملک صفّاً صفّا زهرا
.
.
آتاسی سیر ایلین منزل او ادناده
آناسی کفو نبی مرتبۀ کبراده
شوهری کعبه ده دنیایه گلن آزاده
باشدا اون بیر بالاسی تاج تولّا زهرا
.
.
مجری وحیدی پیغمبر مختار و امین
حق رضاسیله دیوب هر سوزی شأنونده یقین
اذن معبودیله حتماً او سخنگوی متین
سنه ویرمیش لقب امّ ابیها زهرا
.
.
سنیله روح صفا تاپدی رسالت چمنی
گوهر ذاتیوه خبریدی رسول مدنی
گوز ایویندن اوزاقا گتمگه قویموردی سنی
اولموشیدی دیلینون ازبری زهرا زهرا
.
.
غوص ایدن بحر کمالوندہ گرکدور بوغولا
پرورش ویردون حسینیله حسن تک اوغولا
حاشه لِلَّه اولارون بیرده نظیری دوغولا
چشم خلقت حسنینه گوره همتا زهرا
.
.
یوم محشر او چتین مرحله هنگام جزا
شیخ مرسل دوشه جک تنگه او موقع حتّى
چخادوب یوسفی یاددان وراجاق وانفسا
گوز تیکر مقدمیوه حضرت طاها زهرا
.
.
روز کیفردی او گون عذره محل اولمیاجاق
چشم پوشی بیرینه حدّ اقل اولمیاجاق
شیعه نون مشکلی سن گلمسون حل اولمیاجاق
هامّی سندن ایده جک چاره تمنّا زهرا
.
.
گورسنر حشمتون ای بنت رسول مدنی
تخت نور اوسته ملیکه ایدر الله سنی
باشوین تاجی حسینون سویولان پیرهنی
قیمت اولماز اونا مین تاج مطلّا زهرا
.
.
پیکروندن اوجالار شعشعۀ نور جلی
ظلمت حشره دوشر پرتو ذات ازلی
گوزل عبّاسین اولور هر بیر الونده بیر الى
هر الین جلوه سی فوق ید بیضا زهرا
.
.
نجه اللّر سپر ردّ بلای نجبا
نجه اللّر که علمدار رئیس شهدا
جنگده هر بیری اعجاز ایلیوب عاشورا
نجه اللّر که قلم ایلدی اعدا زهرا
.
.
او بیوک محکمه ده قاضی واحددی خدا
ساحتیندن گله جکدور سنه اوّلده ندا
نه شکایت ایلیورسن ایله یا خیر نسا
حکم بیزدندی گرک عدل اولا اجرا زهرا
.
.
دل آچارسان سوزه ای بانوی مرضیه مقام
بارالها اولان ایشلر سنه روشندی تمام
سن بلورسن بیزه نه ظلم ایلیوب قوم ظلام
هانسی بیر دردینی کشف ایلسین آیا زهرا
.
.
شاکیَم اوّل او ناکسدن عداوت ایلدی
اولین ظالم اودور غصب خلافت ایلدی
رأی شورایه باخوب دینه خیانت ایلدی
غصّه دن عود کیمی یاندی سراپا زهرا
.
.
نابکار آلدى اله مکتب اسلامین ایشین
پایمال ایلدی ظلمیله عدالت روشین
حجت مطلقوى ایلدیلر خانه نشین
آه چکدی اونا باخدوقجا خدایا زهرا
.
.
الأمان ظالم دوّمدن اللهی او دنی
قاپومی بیعته خاطر اودا چکدی علنی
در و دیوار آراسندا یاری جان ایتدی منی
بالاسندان الینی اوزدی معزّا زهرا
.
.
بادۂ حبّ خلافت ایلمشدی اونی مست
اولمیان ظلم لری ایلدی اول غاصب پست
صحن خانه مده یخلدیم یره پهلوسی شکست
ایاق اوسته دایانا گورمدی یارا زهرا
.
.
بالالاریم یخلان یرده منی دوره لَدی
قورخوسندان یوزه هر تک تکی اشکین اَلَه دی
ظلم صیّادی گوروب دورد بالا آهو مَلَه دی
دوردیده سسلدی دور یاتما آنا یازهرا
.
.
ای خدا ثانی منیم قیمتیمی سندیردی
غصّه لی فاطمه نون رشتۀ عمرین قردی
اوزی توهین ایلدی قنفذه ده وردردی
قویمادی قبره گیده سالم الاعضا زهرا
.
.
بیر کسیم اولمادی حامی اولا یارب مندن
دادخواهی ایدورم یوم جزاده سندن
چک اوزون محکمیه قانمی آل دشمنان
اولمیوب اوز اجلیله متوفّی زهرا
.
.
آند ویرّم سنی معصوم لرین عصمتینه
بابامون چکدیگی زحمتلرینه حرمتینه
پاکدل حجّتوین دلده غم عزلتینه
ظالمه کیفر ایله راحت اولا تا زهرا
.
.
بیرده ای ذات احد یوم قیامتدی بوگون
سپر آتش اولان حبّ ولایتدی بوگون
شیعه لر منتظر فیض شفاعتدى بوگون
التجایه دیل آچوب محنتی دریا زهرا
.
.
آند ویرّم سنی مظلوملارین اشک ترینه
شهدا سرورینون قاسمینه اکبرینه
قاره گون زینبیمون باشدا قرا معجرینه
اولدی هر غمده او زینب که مثنّی زهرا
.
.
آند ویرّم سنی عبّاس على اللرینه
سینه سوزان بالامون شمر کسن حنجرینه
یوز گوزی قانلی بوغازی یارالی اصغرینه
اوخ دگن وقته اونا جان دیدی حتی زهرا
.
.
محسنمدنده اونون دردى منه اولدی گران
گل بی خاریمی قهریله دگوب اوودی تکان
یاره سیندن ایلدی دوشلوگونه قان فوران
خونبها ایستور او مظلوم قانا حالا زهرا
.
.
او قانا خاطر الهی کرم ایت شیعه لره
ایستورم نخل شفاعت ویره الان ثمره
آغلیب کیم بیزه آغلاتما آپارما سقره
محضروندن ایلیور عفو تقاضا زهرا
.
.
«انورم» شعریمی فکر عالمی اندازه لرم
دفتر عشقیمی ایمانیمی شیرازه لرم
قرخ ایکی ایلدی هر ایل نوحه وی من تازه لرم
ایدرم دشمنوین ظلمنی افشا زهرا
.
.
#فاطمیه #انور_اردبیلی
#فاطمیه_مدح #قیامت
#ازلیت_چمنینده_گل_زیبا_زهرا
#ترکی #قیامت_انور_اردبیلی
#زبدةالاشعار