زبدةالاشعار

ازل حسینه ایکیمجی سلام ابوالفضله #عباسیه_ذهنی_زاده

حالات حضرت ابوالفضل العباس علیه السلام
.
✍️ زبدة الاشعار ✍️
.
🆔: @nohe_torki
.
مرحوم ذهنی زاده
.
ازل حسینه ایکیمجی سلام ابوالفضله
اولا تحیّت با احترام ابوالفضله
.
نه شان و مرتبه دور حَبَّذا خدای جلیل
کرامت ایلیوب اوزگه مقام ابوالفضله
.
وفا یولوندا وجودین ایدوب فنا فِی الله
اودور یتیشدی بو شان و مقام ابوالفضله
.
فدا او شأن و جلاله که روز عاشورا
پناه آپاردی حسین تک امام ابوالفضله
.
نه بیر حسینون امیدیدی تیکمیشدی گوزون
او گون که عترت خیرُ الانام ابوالفضله
.
او قانلی ورطه ده حبلُ المتین رشته لری
تماماً ایتموشیدی اعتصام ابوالفضله
.
ایدوب بو نکته نی احساس تشنه لب اطفال
امانه گَلدی سوسوزدان تمام ابوالفضله
.
یغشدیلار باشینا گُل کیمی سولان بالالار
سیزیلداشاردیلار اَل لرده جام آب ابوالفضله
.
بو حالیدن پوزولوب حالی اولدی دیگرگون
توکندی طاقت و صبر و دوام ابوالفضله
.
گَلوب حضور شهنشاهه ایستدی رخصت
ویروب اجازه شهِ خاص و عام ابوالفضله
.
اوزون یتوردی فراته او تشنه لب سقّا
ایدوب مقابله قوم لئام ابوالفضله
.
داغیتدی لشکری بیر حمله سینده صولتدن
تخیّر ایتدی عقول و فهام ابوالفضله
.
و لیک تشنه لیق اَلدن قرار و صبرین آلوب
عطش هجوم ایدوب اول تشنه کام ابوالفضله
.
آلوب بیر آز اَله سو یِتمه میش دوداقینه
وفا خیالی ایدوب نفسی رام ابوالفضله
.
دیدی من ایچمرم ای نفس نه خیالیدی بو
محال دور تاپا یول فکر خام ابوالفضله
.
حسین سوسوز قالا عبّاس سو ایچه یوخسا
نجه حلال اولی اولماز حرام ابوالفضله
.
توکوب سویی سوسوز اولدی فراتیدن خارج
اولوب توجّه سمت خیام ابوالفضله
.
ویریلدی لشکره فرمان چالیندی طبل و دُهُل
مهاجم اولدی سواره نظام ابوالفضله
.
قویاندا خیمه لره یوز مهِ بنی هاشم
اولوردی حایل عدد چون غمام ابوالفضله
.
کسوب قباقینی دشمن تماماً اَلده کمان
یاغاردی تند یاغیش تک سهام ابوالفضله
.
گَلنده مشکه طرف اوخ آچاردی سینه سینی
که حفظ مشکیدی مقصود تام ابوالفضله
.
ایدردی سعی آپارا بلکه مشکی خیمه لره
و لیک ویرمدی سود اهتمام ابوالفضله
.
کنار ایدنمدی اول ورطۀ بلادن اوزون
که قورموشودی قضا سخت دام ابوالفضله
.
او گیر و داریده بیر بی مروّت ایتدی کمین
حواله ایلدی غافل حسام ابوالفضله
.
قلج دگنده ازل صاق قولی قلم اولدی
یتوب بیر اوزگه شریر ظلام ابوالفضله
.
اودا سالوب صولون عبّاسه عرصه تنگ اولدی
ایشیقلی گوندوزی غم ایتدی شام ابوالفضله
.
سرشک حسرتی گوزده گَزَردی میدانی
یتوب گنه بیر الدالخصام ابوالفضله
.
قاباقجا دل یاراسی ووردی قان اولان دیلینه
شمادت ایلدی با احتشام ابوالفضله
.
دیدی منیم که اَلیم وار قصاصیمی آچارام
او کافر آچدی ید انتقام ابوالفضله
.
عمودیله نه جفا ایتدی بُولمورم یا رب
آت اوسته قالمادی حال قیام ابوالفضله
.
او سرو قد یوزی اوسته یخلدی توپراقه
دگلدی باقی اساس قوام ابوالفضله
.
دوشه دوشه یره گوردی آچوب قولون زهرا
اوغول خطاب ایلدی تشنه کام ابوالفضله
.
کمال وجدیله قارداش آدیله ایتدی خطاب
اوزون یتور شه والا مقام ابوالفضله
.
قلم قولوندان اگر «ذهنی» اولماسا تایید
قلم ایدر نجه نظم نظام ابوالفضله
.
.
#عباسیه_شهادت
#ازل_حسینه_ایکیمجی_سلام_ابوالفضله
#ترکی
.
✍️ #زبدةالاشعار ✍️
.
🆔: @nohe_torki

نظر دهید

جستجو در نام شاعر یا مناسبت

Search

کلمات کلیدی: فهرستاشعار14معصومموضوععاشورائیانماهشاعراصفهانیتبریزیاردبیلیزنجانی

جستجو در مصرع اول

Search

دسته بندی درختی

دسته بندی درختی

Generic filters
Exact matches only
Filter by Custom Post Type

More results...

Generic filters

Filter by Custom Post Type

نتایج بیشتر ...