ازل حمد خداوند قدیم و قادر و یکتا #فاطمیه_غمگین_اردبیلی

حالات حضرت زهرا (س)
.
مرحوم غمگین اردبیلی
.
ازل حمد خداوند قدیم و قادر و یکتا
کریم و کردگار و خالق دنیا و مافیها
.
تحیّات و درود اُول احمد محمود و مختاره
اولا هم عترت اططهارینه بی حدّ و لایُحصی
.
خصوصاً حضرت زهرایه صلوات و سلام اولسون
أودور خاتون محشر فاطمه انسیّۀ حورا
.
گرک حمد و ثنا درگاه حقّه أیلیک دائم
بیزی ائتمیش محبّ خاندان عترت طاها
.
زبان قاصر عقول آواره دور اوهام سرگردان
قلم عاجزدور اوصاف بتولی ایلسون انشا
.
وجود مرتضی خلق اولماسمیدی هرگز عالمده
تاپولمازدی او خاتونه یقیناً همسر و همتا
.
خواتین جهان ایچره اونی بی مثل ایدوب خالق
کمینه خادم اولماز درگهینده مریم و سارا
.
اودور ام الائمه مظهر ذات صفات حق
ایکی عالمده خاتون معظّم دُرّۀالبیضا
.
أودور مشکوة انوار خدا بنت شه لولاک
حیا و عصمتون سرچشمه سی صدّیقۀ کبرا
.
نچه اسماء حُسنایه ملقّبدور او معصومه
یر اهلی آدینه زهرا دیر گوی اهلی منصورا
.
زمان صحبت زهراده جدّی حضرت خاتم
بلی یا فاطمه روحی فدا سویلردی اول مولا
.
ہو سوز واضحدی حبّ فاطمه حبّ الهیدور
اونون فرمانیدور فرمان و امر ربّی الاعلا
.
اونا دشمن اولا هر کیم مقامی نار و دوزخدور
محبّیندن اؤتور ایجاد اولوبدور جنّة الاعلا
.
بو زهرانون ثنا خوانی اولوب افلاکیده راحیل
نثار ایتدی اونون عقدینده برگین نخلۀ طوبا
.
چنین فرموده کشّاف حقایق حضرت صادق
مثال لیلة القدر است مامم حضرت زهرا
.
سوروشدی بیر نفر اصحابیلردن یا ابا موسی
آنون هانسی مرضلن ایلیوبدور رحلت عقبا
.
او سرور گوز یاشین توکدی بویوردی اولگلان آگاه
آنامی ظلمیلن اللرده مقتول ایلدی اعدا
.
بو شأن و بو جلالتده اولان زهرای مرضیّه
بیله مجهول قدر اولدی پیمبردن صورا اما
.
او وقتیکه ایدوب غصب خلافت اوّل و ثانی
علینی ایلیوب خانه نشین اول فرقۀ ترسا
.
گلوب درگاهینه یاندیردی باب وحیی دشمنلر
قاپیلان قالدی دیوار ایچره بنت سیّد بطحا
.
فشاره سالدیلار پهلو سینوب محسن شهید اولدی
بو ظلم و جوره دشمنلر کفایت قیلمادی اصلا
.
او قدری ظلملر حقّینده ایتدی بی وفا امت
کانّه بنت پیغمبر دگیلمش حضرت زهرا
.
باخاردی حسرتیلن مسجد و محرابه آغلاردی
گورردی سامری گوساله سی خلقی ایدر اغوا
.
اوزی فرمایش ایتمیش چکدیگیم غملر توکولسیدی
ایشقلی گونلرون اوسته اولوردی چون شب یلدا
.
امان ظلم و جفای ثانی ملعون و کافردن
او ظالم سالدى آفاقه نقدری شورش و غوغا
.
اگر یاندیرماسیدی ظلمیلن درگاه زهرانی
مگر غارت اولاردی خیمه گاه زینب کبرا
.
اگر ورمیدیلار زهرا قولیندان تازیانیلن
نجه زنجیریلن باغلاردی زینب قولّارین اعدا
.
مصیبتده اگرچه فاطمه امّ المصائبدور
نجه مافوق اولار زینب غمیندن محنت زهرا
.
غم زهرائیلن زینب غمین گر ایلسون میزان
غم زهرا مثال قطره دور زینب غمی دریا
.
هاچان خیرالنّسایه خارجی آد قویدی دشمنلر
اونا زینب کیمین آیا کیم ایتدی طعن و استهزا
.
هاچان قولباغلى زهرا مجلس نامحرمه گیتدی
زیاداوغلون گوره مست اگلشوب تخت اوسته بی پروا

الینده خیزران رأس حسین طشت طلا ایچره
دیر کلّمنی یازینب اوتانموب حقّیدن اصلا
.
بس ائت زینب غمین «غمگین» غم زینب تمام اولماز
بو غمده ناله ایلر ساکنان عالم بالا
.
خداوندا به حق اهل بیت حضرت خاتم
بیزی ایمانیلن قبره آپار ای قادر یکتا
.
.
#فاطمیه #فاطمیه_شهادت #فاطمیه_مدح #ترکی #زبدةالاشعار #غمگین_اردبیلی