امّ فضلین ستمی قلبمی قان ایتدی آنا #جوادیه_هدایت_تبریزی

شهادت امام جواد علیه السلام
.
زبدة الاشعار

?: @nohe_torki
.
محمد هدایتی تبریزی
.
امّ فضلین ستمی قلبمی قان ایتدی آنا
آلوب آرامشیمی صلب توان ایتدی آنا
آنا گل حالیمه باخ
پوزقون احوالیمه باخ

.
یار الیندن ئورگیم شعله چکیب اودلانوری
تار و پود بدنیم زهر اثریندن یانوری
آه پر سوز و گدازیم فلکه قوزانوری
فلک ئوز همسریمی دشمن جان ایتدی آنا

.
کیمه درد دل ایدیم درد ئوزی همدمدی منه
همدمیم ، همنفسیم ، خصمدی دشمندی منه
ئوز ایویم قتلگهیمدی دیمه ایمندی منه
باغ عمرمده اجل بادی وزان ایتدی آنا

.
کاش بیر کیمسه منیم دردیمه دارو گتوره
بو تواناسی گیدن پیکره نیرو گتوره
جان چخاندا بیر ایچیم باری منه سو گتوره
زهر کین قامتیمی اگدی کمان ایتدی آنا

.
ئولورم سوز عطشدن دلیم آغزیمدا یانور
یانورام زهر اثریندن جگریم پارچالانور
نه پشیماندی ایشندن حرمیم نه اوتانور
طعنه ووردی منه چوخ زخم زبان ایتدی آنا

.
هدف اولدی ئورگیم کینه و آزار اوخونا
ریب و انکار اوخونا سمّلی افکار اوخونا
من وورولدوم آنا بیر اهل ستم یار اوخونا
منی ئوز همنفسیم تیره نشان ایتدی آنا

.
دوشموشم افعی ورانلار کیمی پیچ و خمه من
قویورام گاه الیمی آلنما گه سینمه من
نه روادور بیله پوزقون گیدم اول عالمه من
منی دشمن بئله سی قبره روان ایتدی آنا

.
بو سوسوزلوق آنا جدّیم عطشین یاده سالور
ایلورم گوزده مجسّم ئورگ آرامین آلور
زینب عمّه م گورورم اللری باشدان اوجالور
قارداش احوالی اونی دل نگران ایتدی آنا

.
دیدی ایوای آنا قارداشمی ئولدوردی عدو
جان ویرور تشنه اونا کیمسنه یوخدور ویره سو
خشک اولوبدور دوداقی قان ویروری یاره گلو
ئوز عنادین بو ستمگرلر عیان ایتدی آنا

.
بوغازین قارداشمین نوک سنان یاره لیوب
سجدگاهنده ستمله داش آتان یاره لیوب
قلبنین قانین اوخ ایلوبدی روان یاره لیوب
اوخ دگیب قلبنه قطع شریان ایتدی آنا

.
نه (هدایت ) بولر احوالیمی نه یار و حبیب
دردمین چاره سی وار نه ، نه ده درمان و طبیب
نجه بو جور و جفایه ایلیوم صبر و شکیب
باغ صبری ستمین بادی خزان ایتدی آنا
.
#سبک_یارالی_جان_یارالی ( 4 سبک شامل سبک های کربلا_منتظر_ماست … گل_حلال_ایله_منی … شهریاریمسن_آقا … یارالی_جان_یارالی )

.
#جوادیه_شهادت
#ام_فضلین_ستمی_قلبمی_قان_ایتدی_آنا
#هدایت_تبریزی
#ترکی
.
#زبدةالاشعار

?: @nohe_torki