اننده بیردن اوتوز مین ایتی قلجار انه #قاسمیه_مضطر_اردبیلی

حالات حضرت قاسم (ع)
..
..
..
مرحوم مضطر اردبیلی
..
..
..
اننده بیردن اوتوز مین ایتی قلجار انه
دگن زماندا دگه بیر لطیف گل بدنه
..
نئجه بدن نئجه نازک نئجه لطیف و ظریف
که چوخ شبیهدی برگ حریر یاسمنه
..
نه چار آئینه وار، نه گیئم وار آگئینده
فقط فقط گئینوب بیر قماش پیرهنه
..
او پیرهن نئجه ساخار ایتی قلج قاباقین
اوزون تصور ائله احتیاجی یوخدی منه
..
اون اوچ یاشیندا جوان آتلارون آیاقینده
قلجلانور گلنه سنگسار اولور گئدنه
..
الینه دسته لیوب قانلو کاکلین جلاد
نه اول جوانه ترځم ائدر نه أمام حسنه
..
او حالتیله یوزون دوتدی خیمه گاهه طرف
عرایضین بئله عرض ائتدی سرور زمنه
..
عمو باشیم بدنیمدیکه گل گوروم یوزوی
کسلله باشیمی قویمازلا باری سن گلنه
..
آلیجى قوش کیمین اول شه یتیشدی میدانه
ائدوبدی حمله او دامادینون باشین کسنه
..
قلیج ووروب او لعینون قولین قلم ائلدى
سؤیونمیوب اورگی آت سالوب دالیجا گینه
..
گلوبدی جنبشه لشگر دگوبدی بیر بیرینه
اوزونی ویردی سلیمان گروه اهرمنه
..
او آتلارون ایاقی آلتدا بیر صدا اوجالوب
حزین حزین او صدا صاحبی گلوب سخنه
..
عمو قلنجووا قربان قلیجی قوی یرینه
سکوت قیل غضبون بیر ترحم ایله منه
..
انوب حسین اوتوروب قاسمون باشی اوسته
ازل او قانلی باشین اوپدی قویدی سینه سینه
..
نقدری سسلدى قاسم سسینه اولمادی سس
دییردی آه جوانیم بالا نه گلدی سنه
..
حسین جنازه نی ایستر گتوره خیمه لره
محال اولوب نیه، بسدور اشاره سی بیلنه
..
باشا وئرر حرکت گر ایاق قالور یرده
او قدری نیزه قلج اوخ دگوبدی اول بدنه
..
تمام بند به بندیندن آیریلوب اعضا
گلون او یاپراقی مثلی دولی یاغار چمنه
..
باغیشلا بار خدا «مضطرون» گناهلرین
دو نور عین پیمبر حسینیلن حسنه
..
..
..
..
#قاسمیه #مضطر_اردبیلی #قاسمیه_شهادت #ترکی #زبدةالاشعار