حالات شب عاشورا
.
✍️ #زبدةالاشعار ✍️
.
🆔: @nohe_torki
.
#سبک_یارالی_جان_یارالی … 4 سبک
.
مرحوم تائب تبریزی
.
اوزگه بیر عالم اولوب لیلۀ عاشور حسین
دوشدی یتمیش ایکی شوریده باشا شور حسین
.
.
ایستدی لشگره شه آندورا منظور ندور
دلده کی عشق ندور باشادا اولان شور ندور
سرّ عاشور ندور لیلۀ عاشور ندور
ایتدی اعلان که بودور دلده کی منظور حسین
.
.
صبح آچیلسا باتا قانه لب عطشانیله
شرح عشقی یازا توپراقدا قیزل قانیله
عشق بازی ایده قان ایچره سر و جانیله
حشره دین آدلانا بو قصۀ مشهور حسین
.
.
منشی غم اَلَه تا آلدی بلا خامه سینی
لفظ عاشوریله دولدوردی بلا چامه سینی
منده مُهر ایتدیم ا ونون غصّه لی برنامه سینی
نشر اولار صبح او برنامۀ مَمهور حسین
.
.
بو سوسوز دشتیده هر یانه سو تک قانلار آخار
باجی اوز قارداشینین نعشینه قان ایچره باخار
اوغلونون قانین آنا زلفینه شوریله یاخار
سپیلر توپراقا چوخ لوءلوء منشور حسین
.
.
عشق دریادی او دریاده کی دُرّ ِ صدفم
عشق تیری گله هر یاندان او تیره هدفم
عالم عشقیده باش فکرین آتان جان به کفم
ناصر دیندی حسین دین اوزی منصور حسین
.
.
من ازل گونده اولان نعش و نگار آختاریرام
عالمی گوزدن آتوب وصل نگار آختاریرام
جلوۀ نور جمیل رُخ یار آختاریرام
اونی قان ایچره تاپار نرگس مخمور حسین
.
.
منله هر کس قالا بو دشتیده قانه باتاجاق
پیکرینده دوزولوب باش باشا اوخلار چاتاجاق
جسمی یورقون یارالی قانلی قوم اوسته یاتاجاق
قانه غلطان لوق اولوب لوحده مسطور حسین
.
.
اولموشام من بو بیاباندا بلا هم نفسی
بو همین بیر گئجه دی عمریمین آخر گئجه سی
گیتسون او کس کی دوشوب باشینه دنیا هوسی
جاه دنیا سُوَن اشخاص دگل جور حسین
.
.
ایتمین ترک سر و جان منه دمساز اولماز
عندلیبان گل عشقه هم آواز اولماز
خانۀ عشقه تاپوپ یول منه همراز اولماز
ایده بولمز که ایده شرکت پُر شور حسین
.
.
یومویان قانیله بو نشئه ده اوز یوز گوزونی
خانۀ خلوت عشق ایچره گورنمز اوزونی
بولموین درس وفا مهر و محبت سوزونی
بوله بولمز ندی کیفیّت مستور حسین
.
.
منله هر کس قالا لازمدی که مردانه اولا
آشنا دینینه دنیاسینه بیگانه اولا
من کیمی مهر و وفا شمعینه پروانه اولا
گِتسون اول کیمسه که دوشموب دلینه نور حسین
.
.
گوتوروب بیعتی اول خسرو اقلیم بلا
سچیلوب اهل وفادن او گئجه اهل جفا
شه حضورینده قالوب یتمیشه دین اهل وفا
باشلاریندا اولارین چون واریدی شور حسین
.
.
شه گوروب قالمادی اطرافده بیگانۀ عشق
یعنی اغیار گیدوب خالی اولوب خانۀ عشق
باشه یغدی دل شبده نئچه پروانۀ عشق
شمع تک جلوه لنوب چهرۀ پر نور حسین
.
.
باخدی اصحاب وفادارینه شاه شهدا
ایتدی فرمایش او مظلوم که ای اهل وفا
سیز که خوشسوز ایده سیز جانوزی جانانه فدا
وار جزاسینده سیزه مژدۀ پر سور حسین
.
.
علم و اعجاز امامتله او سلطان جهان
ردّ ایدوب پرده نی اصحاب گوزوندن او زمان
باغ جنّتده اولان یرلرینی ویردی نشان
غصّه لر گیتدی اولوب جمله سی مسرور حسین
.
.
گوردی اوز یرلرین اصحاب گوگل تاپدی صفا
بوردا بیر نکته باریک دیر اهل وفا
باخمادی اوز یرینی گورماقا عباس ابدا
سویلوب اول طاقت و صبر دل رنجور حسین
.
.
ای آتام اوغلی ازل شرح نوشتیم سن سن
عاشم گل یوزیوه سرّ سرشتیم سن سن
نیلورم باغ بهشتی که بهشتیم سن سن
عالم عشقیده عبّاس دی مقهور حسین
.
.
باشداکی شوری او اصحاب وفا آتمادیلار
آخرت سودینی دنیادن اوتور ساتمادیلار
شوقیدن صبح آچیلینجا او گئجه یاتمادیلار
گوزلیوب صبحی او بیر عدّه سلحشور حسین
.
.
کربلا ناله و فریادیله دولدی او گئجه
باجی قارداشه باخوب گل کیمی سولدی او گئجه
اوغولیله آنالار قول بویون اولدی او گئجه
عالم محشر اولوب لیلۀ عاشور حسین
.
.
تاپدی هر غصه و غم یولداشی اوز یولداشینی
جان کیمی باغرینا باسدی باجی اوز قارداشینی
آلدی لیلا غمیله سینیه اکبر باشینی
دیندیروب اوز آناسین خوش دیلیله پور حسین
.
.
آناسی قاسمه باخدیقجا غمی جوش ایلیوب
گل باغِ حسنی زینت آغوش ایلیوب
اوز الیله او گل اندامی کفن پوش ایلیوب
کَفَنین گر چه سویوب دشمن منفور حسین
.
.
زینب آغوشه چکوب جان کیمی اوغلانلارینی
زینت ایلوب ویره قربان قوزی قربانلارینی
شهدا قانیله قاتسونلا قیزل قانلارینی
پُر بها دور او بولوب چون دم موتور حسین
.
.
آلوب آغوشینه اصغر آناسی صود امرین
گوزلیوب صبحه کیمی شام قیامت سحرین
ایده قربان حسین غنچۀ نو خیز و ترین
چونکه یتمیشدی اونا عشقیده دستور حسین
.
.
باشینه یغدی امامت گونی اولدوزلارینی
آلدی اطفال اورگیندن غم جانسوزلارینی
گوردی اول شاه دویونجا بالاجا قیزلارینی
چون بولوردی اولاجاق تک تکی مهجور حسین
.
.
گئجه قورتولدی یتوب شام شهادت سحری
آچیلوب محشر کبرادن علامت سحری
نه سحر زینب کبرایه قیامت سحری
ایله بیر صبح اولوب لیلۀ دیجور حسین
.
.
ایلیوب «تائبی» ترغیب ایکی نیک سیَر
تا دوزه رشتۀ نظمه بیله بیر عالی گُهَر
بسدی زهرا بالاسی ایلسه منظور نظر
چون که منظور الهی اولی منظور حسین
.
.
.
#شب_عاشورا
#اوزگه_بیر_عالم_اولوب_لیلۀ_عاشور_حسین
#ترکی
.
✍️ #زبدةالاشعار ✍️
.
🆔: @nohe_torki
نظر دهید