خروج از مدینه
حالات #حضرت_صغری(س)
.
✍️ زبدة الاشعار ✍️
.
🆔: @nohe_torki
.
فتح الله #خدانواز (نوازی)
.
اولدی آماده یولا دوشسون بلا عاشقلری
جامه ی عشقی گییندی کربلا عاشقلری
.
باریلر باغلاندی دوشدی کاروان غم یولا
حسرتیلن بیر مریضه قیز باخوردی ساق صولا
.
گوردی ائللردن قالان یوخ بیر نفر هم صحبتی
جلوه لندیردی گوزینده آهوان عترتی
.
کاروان گئتدوقجه قلبینده چوخالدی محنتی
وای دئدی بوندان صورا صغرانین اولماز عزتی
.
آز قالوب صبریم قوتارسون گل دئدی یامرتضا
قلبیمی غم تیری یاردی دردیمه یوخدور دوا
.
سسلدی اکبر دایان گئتمه باجون قربان سنه
یاندی قلبیم نار غمده بیر تسلّی وئر منه
.
سن قدم آتدوقجا قلبیم قان اولور آغلور گوزوم
بیر دایان بو غصه لی قلبیمده قارداش وار سوزوم
.
وار یری بوندان صورا قانه دولانسون گوزیاشیم
نه قالور عمم یانیمدا نه باجیم نه قارداشیم
.
نیلیر درده دوشنده یار و یولداشسیز باجی
دردینی هئچ کس سوروشماز قالسا قارداشسیز باجی
.
چوخ چتیندور بیر مریضه قیز قالا افسرده حال
دهریده گولسون یوزی غم لشکری وئرمز مجال
.
روز و شب اکبر دئیوب گوزدن توکردی اشگ تر
هی دییردی ائللریمدن یوخدی الله بیر خبر
.
بیرگونی رویاده گوردی کربلا غوغاسینی
اکبرین ایستی قوم اوسته دوغرانان اعضاسینی
.
باخدی یرده قطعه قطعه دوغرانان مه پیکره
لبلرین قویدی قیزیل قانه بویانمش لبلره
.
سویلدی بیردم دانش منله باجون قربان اخا
قیل نوازش من سنون مهمانوم ای مه لقا
.
قارداشیندان گوردی سس گلمور اولوبدور باغریقان
باخدی اول قانلی بیابانه ائدوب اشگین روان
.
سسلدی عباس عمو قانه دولاندی گوزیاشیم
هارداسان بس قطعه قطعه دوغرانوبدور قارداشیم
.
باخدی هر بیرسمته اوردا گوردی قان دریاسینی
تاپدی قانلی پیکری قولسوز دوشن عباسینی
.
سسلدی ایوای گوزوم قربان کسیلمیش اللره
قان یاغور کرببلانین دشتی بنذر محشر
.
بیر طرفده گوردی زینب سسلنور قارداش قاچور
اللریندن قان سوزور گوزدن توکور قانیاش قاچور
.
گه دیور یافاطمه گل دوت عزا قارداشیمه
گه دیور قارداشیم ئولدی کول توکولدی باشیمه
.
اوندا گویا گوردی پهلوسی سینان زهرا گلور
وای حسینیم وای دیینده لرزیه صحرا گلور
.
دمبدم ایوای حسین سویلر ائدر اشگین روان
اللری پهلوده مقتلده گزور قدّی کمان
.
بیر طرفده گوردی اخیامه وروب اود قوم کین
غرق اولوب طوفانه قیزلار آختاروللار بیربیرین
.
بیر طرفده قانلی پیکرلر دوشوب باشسیز قالوب
زینب بیچاره سرگرداندی قارداشسیز قالوب
.
لرزیه دوشدی وجودی گوردی ویلان عمه سین
آچدی رویادن گوزین آگاه ائدوبدور جدّه سین
.
سویلدی گل جدّه جان یاندیم غم هجرانه گل
مرغ روحیم غرق اولوبدور قورخولی طوفانه گل
.
عالم رویاده بیر قانلی بیابان گورمیشم
اول بیابانین هواسین اود، یرین قان گورمیشم
.
عمم اول قانلی بیاباندا قاچوردی بی کمک
یدّی قارداش صاحبین آواره قویموشدی فلک
.
گه دیوردی داده گل قولسوز قالان مشکل گشا
گه دیوردی یاندی قیزلار هارداسان یامرتضی
.
غملی رویادن ائله حالی پریشان اولموشام
ائللریم بیرده قییتمز خانه ویران اولموشام
.
ای #نوازی سنده آغلا اول مریضه دختره
گوزیاشون اولسون ذخیره بلکه روز محشره
.
.
#خروج_مدینه
#اولدی_آماده_یولا_دوشسون_بلا_عاشقلری
#ترکی
.
✍️ #زبدةالاشعار ✍️
.
🆔: @nohe_torki
نظر دهید