«احوالات جناب عبدالله بن حسن»
.
✍️زبدة الاشعار✍️
?: @nohe_torki
.
محمد علی مصیبی تبریزی
.
او دم کی دوشدی یئره شاه کربلا آتدان
نوایه گلدی فلک تتریوبدی کون و مکان
.
دوشوبدی توپراقین اوسته منادی ازلی
اولوبدی قانینه غلطان حبیب لم یزلی
بوکوبله قامت دینی چتین او بئل دوزلی
یارالاریندان آخار چشمه چشمه توپراقا قان
.
خبر چاتوبدی عمر سعده البَشاره امیر
حسینی توپراقا سالدوق دوشوب فشاره امیر
اونون قتالینه کافی دی بیر اشاره امیر
کی تا حسین ئولومی عالمه اولا اعلان
.
او قدر ائتدوق اونی تیر و نیزیه آماج
وجودی پارچالانوبدی دوشوبدی باشداکی تاج
اجازه وئرسن ائداق خیمه گاهی نی تاراج
مباد کی الیمزدن چیخا زمام و عنان
.
عُمَر دیوبدی ؛ازل ایلیون حسینی قتیل
جدایه صوندا وورون باشینی ائدون تعجیل
او ئولمه سه حرم اهلین ائدنمه سیز تذلیل
بنین هاشمی نین قدرتینده یوخ نقصان
.
چالوبدی طبل هیاهونی تازه دن دشمن
امیر امر ائلیوب جان وئره حسین علناً
بو حین ده یوخودان دوردی یادگار حسن
خیم ده یاتموشیدی دیلده واحسین گویان
.
اویاندی گوردی عجب التهاب و بلوا وار
بلا چولونده غریبه فغان و غوغا وار
نوای طبل و دهل واردی شور عظما وار
دئنن کی محشر کبرا اولوبدی خلقه عیان
.
وُروللا باشینه مخیمده کی مخدّره لر
یوزون خراش ائلیور چون بنات طاهره لر
هراسیدن بالالار آز قالوللا جان وئره لر
اسور سَراچۀ عشقه بلالی بیر طوفان
.
قاچوبدی تلّه طرف گوردی عمه سی آغلور
سرشگ دیدۀ زارین عذارینه باغلور
حسین حسین دیوری سینه سین دؤیوب داغلور
بقیع سمتینه سسلور ؛ هایانداسان آناجان
.
هایانداسان آنا گل کربلاده غارته باخ
بلا چولونده قوپان شورش قیامته باخ
ئوزون بو کوفه لیلرده اولان جسارته باخ
پیمبر اوغلونی ایلوبله قانینه غلطان
.
اِلیکی بولدی عموسین سالوبلا توپراقه
بیر آه چکدی ئورکدن یاخوبدی نه طاقه
قویوبدی یوز گئده تا قتلگاه اشراقه
دوتوبدی زینب اونی باسدی باغرینا او زمان
.
بیان ائدوبدی اوغول خیمه دن کنار اولما
بو قوم رحم ائله مز بیله بی قرار اولما
دئدی قالوبدی عموم تک ، منه حصار اولما
عمومدان آیریلا بولمم بوراخ منی فِی الان
.
او دم قوتاردی ئوزون زینبین قوجاقیندن
عدول ایله میوبدی وفا سیاقیندن
گئچوبدی منزل حرّیتین رواقیندن
ئوزون سالوب شهین آغوشینه سفیر جنان
.
امام او لحظه باسوب باغرینا ولا گهرین
مخاطب ائتدی حَسن باغینون وفا ثمرین
نئدندی ترک ائله دون اهل بیت خیمه لرین
دئدی عمو گرک اولسون بو جان سنه قربان
.
دئدی بو چۉل دولی نامرد دون و ناکسدی
بولار لباس نفاقه هامی ملّبس دی
ثبات عشقیده قاسم قانی منه بس دی
قییت خیامه کی عشقون بیلوندی حقّه،اینان
.
دییوب عمو ؛ بیلوسن گلمیشم کی خدمت ائدم
بو یولدا جان وئرم اسلامیدن حمایت ائدم
قلج دگنده سنه بلکه دفع ضربت ائدم
آتام یانیندا اولا تا باشیم اوجا عموجان
.
اولوبلا گرم سخن محییان حلم و ادب
او یادگار حسنله او تاجدار عرب
گلوبدی الده قلج ناگه اَبجَر بنِ کَعَب
هدف بوئیدی کی شاه وحید یدن آلا جان
.
قلج هواده گزوردی دگه شه زمنه
او دم کی ایستدی قلب شهنشهه دُشَنه
گوی اهلی سسله دی احسنت زادۀ حسنه
الین وئروبدی دم خنجره او تازه جوان
.
او ماهرخ بدنیندن آرالی دوشدی قولی
یازیلمیوب کی دوشوب صاق قولی ویا کی صولی
او ضربه بس آغیریدی بالا ایتیردی یولی
سینیق قوشی آلوب آغوشه سرور دوران
.
دئدی عمو یارالاندیم دوشوب قولوم یانیما
قاریشدی ایندی قانیم سینه وُن آخان قانینا
منی قوجاقیوه آل بیر آپار ننم یانینا
بو یاره می سنه قربان آنام ائده درمان
.
امام سویله دی ای نور دیده گان اخا
بهشتیده یولیوی گوزلوری آنام زهرا
پیمبرین قیزیدی ایلیَر بو درده دوا
یاراوی مرهم ائدر اشک دیده سیله اینان
.
او لحظه حرمله چیخدی خفا جلوسیندن
ایچوبدی زهر هلاهل جفا سبوسیندن
او اصغره ووران اوخدان ووروب گلوسیندن
اونون شهادتینی ایله دی حسین اعلان
.
«مُصَیّب»ائتمه بو درگهدن هر تقاضانی
نظر ده آلگیله شأن ومقام عُظمانی
نبیرۀ نبویدن ال ئوزمه بیرآنی
عنایت اولمالی اولسان ائدر ئوزی احسان
.
#حسینیه_شهادت
#عبداله_الحسن
#او_دم_کی_دوشدی_یئره_شاه_کربلا_آتدان
#مصیبی_تبریزی
#ترکی
.
✍️ #زبدةالاشعار ✍️
?: @nohe_torki
نظر دهید