ذکر توسل فرد عزادار به امام حسین (ع)
و مقدمه شهادت حضرت علی اکبر (ع)
.
✍️ #زبدةالاشعار ✍️
.
🆔: @nohe_torki
.
مرحوم صحاف تبریزی
.
او قلب لرده که آل علی محبتی وار
على الخصوص حسینه بیر اوزگه اُلفتی وار
.
آدی گلنده دولور دیده جامی اشگیله
سبب علاقۀ دلدور ثبوته حُجتی وار
.
نه تک حسینی سُوَه لّر یر اهلی خرد و کبار
گوی اهلینونده همین کلمه ده شراکتی وار
.
حسین عزیز خداوند حی یکتادور
بلور بو سرّی او کسلر که معنویتی وار
.
ویروب حسنیله اؤز عرشینه خدا زینت
تصور ایله نجه گور مقام عترتی وار
.
باساردی باغرینا جان تک حسینی پیغمبر
«حُسین منی» دیردی عجب جلالتی وار
.
چکردی نازینی دائیم آناسی زهراده
ایدردی خدمت حسینه نقدری همتی وار
.
آتاسی شیر خدا اؤز عزیز جانندن
اونی عزیز دوتاردی غریبه حکمتی وار
.
همین محبّته مصداق حسینون اکبریدی
گورون نقدر حسینون بونا محبتی وار
.
یتیشدی سوز یرینه عرض ائدوم همان خبری
بو یازدیقوم سوزه چون عمده مَدخلیّتی وار
.
یازولا بیر نفرین امری مشگله دوشدی
گوروب مصیبتنون منتهای شدتی وار
.
توسل ایلدی شاه شهیده یالواردی
گیجه گونوز نقدر دلده تاب و طاقتی وار
.
ولیک اولمادی اول مطلبی برآورده
گوتوردی بهت ایشنون بؤلمدی نه صورتی وار
.
پاتوبدی بیر گیجه گوردی حسینی رؤیاده
دوتوبدی دامن شهدن نه قدر قدرتی وار
.
کمال عجزیله عرض ایتدی ای شه عطشان
بو مضطرون بلوسن درد بی نهایتی وار
.
نقدر یالوارورام ایلورم فغان و نوا
علاج دردیمه اولمور شها نه علتی وار
.
بیوردی سرور لب تشنه ای حمیده خصال
منیم یانمدا هامی دعوتون اجابتی وار
.
ولی هاچان منی سن آند ویردون اکبریمه
قبول اولمادی عرضون بیانه حاجتی وار
.
بو شاهزادیه بیزده گلون توسل ایداخ
حسین یانندا بونون احترام و حرمتی وار
.
حُسینه سؤوگلی دور بو جوان مه سیما
او سرورون بونا بی انتها عطوفتی وار
.
اوگونکه گوردی حسینون کومکلری تریلوب
امام تشنه لبه شامیان شماتتی وار
.
دایاندی محضر شهده اجازه حاصل ایده
گوروب امام او جوانون خیال نُصرتی وار
.
دیدی علی یری بر قدّیوه دویونجا باخوم
بو سرو قامتوین خاطریمده حسرتی وار
.
سالوب یولا دالسنجا توکوب سرشگ ترین
یوزین دوتوب گویه قلبنده درد و محنتی وار
.
دیدی بو حالیمه سن شاهد اول اؤزون یا رب
بوگون منیله بو قومون نقدر عداوتی وار
.
بو اکبریمدی قلجلار قباقنه گیدوری
سنون پیمبریوون کاملاً شباهتی وار
.
اوقدری گیچمدی اما آلوبلا دورہ سینی
بروزه ویردی اودم هر کیمون شقاوتی وار
.
ایتی قلجلارینان بند بند دوغرادیلار
تصور ائت نجه شامون شقی جماعتی وار
.
یارالی پیکرینی گلدی تاپدی شاه شهید
گوروب او گل بدنین حدّسیز جراحتی وار
.
قلجلانوب باشی زلفی یوزی باتوب قانه
نفس شماره ده بیر اوزگه وضع حالتی وار
.
یوزین قویوب یوزینه قانلی گوزلریندن آپوب
باخان او شهده گوروب احتضار علامتی وار
.
دوداقنون دیشنون سیلدى قانلی توپراقنى
تعجبم نقدر دلده صبر و قوتی وار
.
بیوردی آچ گوزون ای جدّیمون شبیهی اوغول
بو حالوین منه بی انتها صُعوبتی وار
.
گوزی یولوندا قالوب خیمه لرده لیلانون
یوزینده اشگ بصر دلده درد فرقتی وار
.
الیوى ویر الیمه دور على خیامه گیداخ
عیالیمون نجه گور شورش قیامتی وار
.
بیری ورار یوزه سیلی بیری یولار ساچنى
سکینه نون هامودان چوخ اورکده محنتی وار
.
آپارماسام یارالی پیکرون خیامه اگر
عیال عصمتمون موجب هلاکتی وار
.
اوزین هلاک ایلسون آز قالور باجیم زینب
ز بس اورکده سنه عُلقۀ مودتی وار
.
ووروبدی چنگ بو دامان رحمته «صحاف»
سنه تیکوب گوزینی نیت زیارتی وار
.
اولان بو شرح جگر سوزه بانی محنت
آدی «علیدی موحد» جهاندا شهرتی وار
.
اوزون براتینی ویر بو ایکی دل افکارون
بیری بیریله نه مدّتدی که رفاقتی وار
.
#حسینه_مدح
#اکبریه_مدح
#اکبریه_شهادت
#او_قلب_لرده_که_آل_علی_محبتی_وار
#ترکی
.
✍️ #زبدةالاشعار ✍️
.
🆔: @nohe_torki
نظر دهید