او وقت اولوب شه بطحا مدینه دن چیخسون #خروج_مدینه_یحیوی

خروج اهل بیت رسالت از مدینه و نقل ماجرای امّ سلمه
.
#زبدةالاشعار
.
: @nohe_torki
.
مرحوم یحیوی اردبیلی
.
او وقت اولوب شه بطحا مدینه دن چیخسون
که یعنی ظاهره گوهر خزینه دن چیخسون
.
قطاره باغلادیلار محمل زرافشانی
یتیشدی عترت طاهایه کوچ اعلانی
.
سفر لباسی گئیندی مخدّرات حرم
نئجه لباس او لباسی که قیمتی اعظم
.
بو دستگاه شهنشه دی موکب کبرا
اوشاق بیوک گئینوب رخت فاخر و اعلا
.
تفاخریله او دم بانوی حریم ادب
سفر لباسی گیوب اگنینه خانم زینب
.
ملیکه ی حرمیدی مقام و شأنی بلند
قولونا سالدی جواهرنشان بازوبند
.
قبا و پیرهن زر کنار قیمت دار
گئیندی سالدى باشا معجر حریر وقار
.
دوباره معجرون اوستن یوزینه سالدى نقاب
ایپک عبایه بوروندی نقابه اولدی حجاب
.
بنا به رسمیت شاهزادگان عرب
مجهز اولدی بو ترتیبیلن خانم زینب
.
اویاندا لیلی گلوب زینبون سیاقینده
سفر لباسی گییوب اکبرون اطاقینده
.
سوپوردی سیلدی توزین یغدی فرشینی یئردن
او حجله نی ائلدی خالی زیب و زیوردن
.
عروس شمعینی آئینه سین بطور امید
قویوب هاموسینی صندوقه ووردی قفل و کلید
.
وداع ائدوب در و دیواره گوز یاشین سپدی
چیخاندا حجله گهون آستانه سین اوپدی
.
قاپونی باغلادی بیر قفل دائمی ووردی
او قفلی دست جفا کربلاده سیندیردی
.
قالوبدی باغلى اطاقلار هامی کنار اولدی
او خانمان ایکی نالانه واگذار اولدی
.
خلاصه محمله میندی حریم خرد و کبار
اولوبدی تخت روان زینبه محل قرار
.
چون ایستدی یولا دوشسون او کاروان بلا
ائشیتدیلر که بلند أولدی بیر ضعیف صدا
.
حسین آنان سنه قرباندی بیر زمان گئتمه
ز بسکه لازم العرضم بالا دایان گئتمه
.
حسین نه گوردی او یئردن که غملو کلمه گلور
پیمبرون حرمی یعنی ام سلمه گلور
.
گلوب قوجاقلادی بوینون او شاهون ام کبار
دوتورب حسینون الیندن یواشجه چکدی کنار
.
قولاقینه دئدی ای شاه برگزیده اوغول
پیمبره منه زهرایه نور دیده اوغول
.
منه بویورمیشیدی جدّون احمد مختار
حسینیمون قباقیندا بلالی گونلر وار
.
گوررله کرب و بلا آدلو بیر مکاندا وحید
اونا قیام ائدوب امّت اونى ائدرله شهید
.
بو سرّی کشف ائله اوغلوم بو واژگون بخته
همان سفر بو سفردور و یا قالور وقته
.
بویور گوروم گله جکسن مدینیه بیرده
امیدیلن اوتوروم گوزلیوم بو ائولرده
.
سنونکه همسفروندور بو قوم و قارداشم
خبر وئروم نگران اولماسون بنی هاشم
.
آنا نیه خبر آلدون بو غملی اسراری
آپارورام گورو سن اکبر و علمداری
.
همان سفردی بلی جدّیم ایلیوب سنه فاش
قیتمرم داخی شاهد دی بو گوزومده کی یاش
.
منیله دوغراناجاق کربلاده انصاریم
گلور مدینیه اهل حرمله بیماریم
.
منیم قیتمگیمه بیرده منتظر قالما
سالورسان اوندا قرا ایندیدن قرا سالما
.
بالا او وقتی نئجه من بیلوم نه گوندور اوگون
سنون کومکلروون نعشی لاله گوندور اوگون
.
الین اوزاتدی حسین کربلا مناسینه
وئرو بدی مقتلینون توپراقین آناسینه
.
بویوردی شیشیه توک ساخلا سرّ عیان اولاجاق
او ساعتی که من ئولّم بو شیشه قان اولاجاق
.
دولاندی دور زمان اولدی یوم عاشورا
بویاندى قانه حسین دوغرانوب هامی شهدا
.
گونوز قوتاردی شب اون بیری محرمده
یاتانمادی حرم اهلی کنار علقمده
.
هوای شام غریبانی غم قرالتمیشدی
اؤرک دولى غمیله امّ سلمه یاتمیشدی
.
گوروبدی عالم رؤیاده دوتدی عالمى نور
چراغلاری کئچن ائولر اولوبدی وادی طور
.
طلوع ائلدی گون تک جمال خیر بشر
گلور شکسته قیافیله ختم پیغمبر
.
قولونی دیرسکه جک چیمرایوب رسول خدا
بئلینده دامنی سینه آچوق به رسم عزا
.
عمامه یوخدی باشیندا ایاق یالین ای داد
باتوب محاسنی توز توپراقا ائدر فریاد
.
دیور اوجا سسیله متّصل حسینیم وای
جهول امّت الینده قتیل حسینیم وای
.
اضافه اولدی بو غم امّ سلمه غملرینه
قاچا قاچا یخیلوب حضرتون قدملرینه
.
فداک أمی ابی روحی یا رسول الله
هانی عمامه و نعلینون أی حبیب الله
.
اجازه سیز دگه بیلمز داراق محاسنیوه
بو قانلی توز ندی دگمیش بو آغ محاسنیوه
.
باشون آچوقدی قولون چمرانوب دی سینون چاک
بویور منه توکولوب باشیمه هایاندان خاک
.
واروندی چوخ عجله ای نبی خوش کردار
بویور گلورسن هایاندان بئله سراسیمه وار
.
ائدوب عیالینه خیر الانام فرمایش
بو سرّی کشف ائلسم یوخدی وقته گنجایش
.
اشارتاً دیرَم امّ سلمه ایله فغان
حسینی تشنه سو اوستینده کسدیلر قربان
.
داغیتدیلار بالامون ظلمیله تفاقینی
کئچیرتدیلر حرم هاشمون چراغینی
.
ئولوب نقدری حسینله واریدی عنصر مرد
بالالارى حرمی اولدیار بیابان گرد
.
بلالی زینبیمی قویمادیلار آغلاماقا
به رسم تعزیه قارداشلارینی اوخشاماقا
.
اوزوم وئروب اونا غسل ائلدیم حنوط کفن
قازوب مزار ائلدیم ایندی وارد مدفن
.
من ایندی فارغ اولوب دفن نور عینیمدن
سنه خبر وئرورم ماتم حسینیمدن
.
قبیلیه خبر ائت هاشمیّه لر گلسون
حسین عزاسینه نسوان نوحه گر گلسون
.
دوتون حسینیله عبّاس و اکبره ماتم
قرا چکون قاپوسی باغلانان اطاقلارا هم
.
داخی گرک بو عمارت عزاسرا اولسون
او وقته دین اُسرا تا مدینیه گلسون
.
ائشیت جکین ائلدى ام سلمه بیر فریاد
اویاندی اوز سسینه ای فلک ائوین آباد
.
دوروب سراسیمه قاچدی او شیشه نون اوسته
گوروب او تربت اولوب پارچا قانه پیوسته
.
ال آتدی زلفینه بیردن دئدی حسینیم وای
عزیز فاطمه دلبند نور عینیم وای
.
او قدری یولدی ساچین ووردی باشینه دیزینه
او قدری آغلادی تا گلدی لخته قان گوزینه
.
حرم باشی ایدی او خاتون اؤزی قوجا عورت
دؤیؤب اؤزینی یوروب قالمادی داخی طاقت
.
قرانلوق ائوده یخیلدی یوز اوسته غش ائتدی
بو آغلاماق سسى صغرا قولاقینه یئتدی
.
دوروب عصایه ائدوب تکیه نصف شبده گلوب
گوروب اونی بئله بیلدی خانم آناسی ئولوب
.
آچوبدی باشین ائدوب سخت شدّتیله نوا
اودا بویاندا دوشوب ائتدی غش واویلا
.
بو سسلری أئشیدوب داده قونشولار گلدی
حسین یولینا اولان گوزلر انتظار گلدی
.
نه گوردیلر یخیلوب یان یانا ایکی نالان
هاموسى قالدی بو اوضاعه مات و سرگردان
.
سپوبله عنبر و عود یوزلرینه موقع شب
گتوردیلر اولاری حاله بانوان عرب
.
خانم نه اولدی سیزه دوشمیوسوز بو احواله
گوزونی آچدی ائدوب أم سلمه بیر ناله
.
دئدی یوخودا بویوردی منه رسول امین
زمین کرب و بلاده یتیشدی قتله حسین
.
اویانمیشام یوخودان تتریور بئله بدنیم
بو شیشه که گورسوز قاندی شاهدیمدی منیم
.
تمام ائله بو سؤزی بسدی وئرمه «یحیوی» طول
سنه شفیع گُنه دور رسول و آل رسول
.
#او_وقت_اولوب_شه_بطحا_مدینه_دن_چیخسون
#اسرار_عاشورا
#ترکی
.
#زبدةالاشعار
.
: @nohe_torki