شب عاشورا
.
✍️ #زبدةالاشعار ✍️
.
🆔: @nohe_torki
.
مرحوم دخیل
.
ای عزاداران شاه مشرقین
یادیمه دوشدی شب قتل حسین
.
اول گیجه کی صبح عاشورایدی
کربلاده شور و واویلایدی
.
قانیله دولموش گوگل گوز یاشیلن
قول بویون اولموش باجی قارداشیلن
.
هر آنا باغرینا باسمش بیر جوان
عرشه چیخمش ناله و آه و فغان
.
ئولمه میش اوغلی آنا دوتمشدی یاس
گیدیرنده اوغلونا فاخر لباس
.
گه سکینه یولاردی سنبلین
اکبرین گاهی داراردی کاکلین
.
گه توکردی گوزلریندن اشگ ناب
گه ایدردی زلفنه افشان گلاب
.
دور ایدوب پروانه شمعون باشینه
زینت ایلردی باجی قارداشینه
.
آختاروب هرکیم تاپوب مطلوبینی
هر حبیب ایتدی صدا محبوبینی
.
کربلا یکسر محل راز اولوب
هر گله اوز بلبلی دمساز اولوب
.
ناگهان بوحالیده کلثوم زار
گوردی بو احوالی اولدی بی قرار
.
حسرتیله ایتدی هرسمته نگاه
یوز دوتوب درگاه حقه چکدی آه
.
هر آنانون بیر عزیز جانی وار
فاطمه اوغلونا بیر قربانی وار
.
من کیمی هیچ کیم خجالت اولماسون
غرقۀ دریای محنت اولماسون
.
ای خدا چون تنگ اولور گوگلوم منیم
کاش اولیدی بیر جوان اوغلوم منیم
.
تا باسیدوم سینۀ سوزانیمه
ایلیدیم زینت اوز قربانیمه
.
آغلادی چون گوردى یتمز مطلبه
شوقمند اولدی حضور زینبه
.
گوگلنی گوردی دولی خالی الین
زینبه گلدی دیسون درد و دلین
.
چون حضور زینبه قویدی قدم
یوز ویروب کلثومه بی حد درد و غم
.
گوردی حاضر ایلیوب قربانلارین
باغرینا باسمش جوان اوغلانلارین
.
صاق صولندا اگلشوبلر هرطرف
زینبون دردین ایدلّر برطرف
.
عرض ایدر شکر خداوند حمید
قارداشیم یانینده اولّام روسفید
.
هر کیمون بیر تحفۀ شایانی وار
زینبونده بو ایکی قربانی وار
.
چون گوروب کلثومی اولدی بی شکیب
یادینه دوشدی علمدار غریب
.
خیمۀ عباسه اولدی چون روان
دیده گریان سینه سوزان بی گمان
.
خیمیه تا یتدی اول دم دوردی چوخ
گوردی خیمه بوش قالوب عباس یوخ
.
خیمه دن چخدی گزردی دوره سین
آختاراردی چادرون دورت دوره سین
.
گوزلری ناگاه بیر سمته دوشوب
گوردی عباسی ایشگده اگلشوب
.
نیزه سین یانینده نصب ایتمش یره
تکیه قیلمش تیغ آتش پیکره
.
چوخ غریبانه دوتوب زانولرین
حسرتیله گزدیرور آهولرین
.
گل یوزی برگ خزان مثلی سولوب
گوزلری ابر بهاران تک دولوب
.
گه باخار اطرافه گوزیاشی توکر
بی کسانه آهی آه اوستن چکر
.
یاندرور افلاکی بو منوالیله
بو سوزی سویلر زبان حالیله
.
هرکیمون وار باجیسی خوش حالینه
یا آناسی وار یانار احوالینه
.
خیمه لرده باجی قارداشین بزر
من غریبه کیمسه یوخ ایتسون نظر
.
بوگجه دردیم چوخ آرتوخدور منیم
محنتیم چوخدور باجیم یوخدور منیم
.
نه آنام وار نه باجیم نه بیر قزیم
جان ویرن وقته قالور یولداگوزوم
.
اولماسون هیچ بیکسه بو غم نصیب
کربلاده یوخ منیم تک بیر غریب
.
چوخ دیوب بوسوزلری اول نامدار
یوز ویروب کلثومه رقت بی شمار
.
بوینونا سالدى قولون چکدی الین
عرض ایدوب ای زاده ام البنین
.
آغلاما غیرتلی قارداش گلمیشم
دردوه قربان مگر من ئولمیشم
.
گرچه زهرا دُرجی گوهردور منه
گر قبول ایتسون کنیز اولام سنه
.
قالماسون گوگلندا قارداش آرزو
اشکیله قیلام لباسون شستشو
.
دوت الیمدن بزم سلطانه گیدک
خدمت شاه شهیدانه گیدک
.
تا دوتاخ هرایکمیز بیر دامنی
سن منی ایتمه خجالت من سنی
.
سن دخیل اول کربلا سلطانینه
من دخیل اولام اونون قربانینه
.
.
#شب_عاشورا_دخیل
#ای_عزاداران_شاه_مشرقین
#ترکی
.
✍️ #زبدةالاشعار ✍️
.
🆔: @nohe_torki
نظر دهید