او کسکه ایستری تاپسین حقیقتین قاپوسین #حیدریه_علومی_تبریزی

وقایع شهادت حضرت علی (ع)
.
#زبدةالاشعار
.
: @nohe_torki
.
علومی تبریزی
.
او کسکه ایستری تاپسین حقیقتین قاپوسین
ازل گرک تاپا مطلق طریقتین قاپوسین
.
محالدور اولا بیر کس طریقته آگاه
مگر گیدوب تاپا اوّل شریعتین قاپوسین
.
شریعت نبوی مشعل طریقتدی
نشان ویرن اودی کامل سعادتین قاپوسین
.
کلید قفل حقیقت على محبّتیدی
محبّت اولسا تاپارسان ولایتین قاپوسین
.
ولایتیکه دیولدی همان محبّتدی
محبّتیله آچالّار عبادتین قاپوسین
.
اولار که سن گوروسن فقری اختیار ایلیوب
تاپوبدی عالم معناده عزّتین قاپوسین
.
اگر مقّدمه دن اصل مطلبی آلاسان
ایتیرمه سن داخی بیرده امامتین قاپوسین
.
علیدی شاه ولایت حضور قلبیله
گلون گیداخ آچاخ ایندی او حضرتین قاپوسین
.
علینی سالدولا دلدن عدالت اوستونده
ستمله باغلادی دشمن عدالتین قاپوسین
.
ووراندا ظلمیله باشینه تیغ زهرآلود
آچوبدی ملجمین اوغلی قیامتین قاپوسین
.
نماز صبحده باشدان یارالانان مولا
بیوردی فزت که آچدیم بو دعوتین قاپوسین
.
خدای کعبیه اولسون قسم که قورتولدوم
خراب ایتدیلر علم و فضیلتین قاپوسین
.
.
اوجالدی سس هامودان لااله الاالله
چخوب گیدور یر اوزوندن علی ولیّ الله
.
.
او آخرین گجه که مرتضایه فرصتیدی
تمام فکر و خیالی کمال خدمتیدی
.
چکردی باش فقرایه تمام ایتامه
سفارشی آقامون لطفدی محبتیدی
.
اولاندا موقع افطار او امّتین آتاسی
قوناق گیدوب قزی کلثومه قصدی قربتیدی
.
دیر او سروره بیر کاسه سود گتوردوم اودم
بیر آزا دوز ایده افطار او بزم خلوتیدی
.
دیدی قزیم ایکی سیندن بیرین گوتور بولارین
آتان علی روشی بیلموسن قناعتیدی
.
خانم دیر که دوزی ایستدیم او دم گوتورم
دیدی سودی آپار آخر على رضایتیدی
.
على لذیذ طعامیله ائتموب افطاری
گوگل قالور متحیر او نه حکومتیدی
.
دوزیله ایلدی افطار رهبر اسلام
ولی امره خدایاغریبه عادتیدی
.
دوروب باخاردی گویه یاد ایدردی طاهانی
سحر اولونجا ایشی ذکردی عبادتیدی
.
یاخونلاشوب سحر اولسون دوروب یولا دوشدی
گیدور نمازه على نیّتی اطاعتیدی
.
دوتاردی دامن مولانی نچّه مرغابی
وقوع واقعیه بو عمل علامتیدی
.
یتشدی مسجده بیر بیر یاتانلاری اویادوب
چراغ مسجدی روشن ایدوب که ظلمتیدی
.
اولاندا صوت اذانی بلند مأذندن
دوشوب تلاطمه عالم که جای حیرتیدی
.
.
اوجالدی سس هامودان لااله الاالله
چخوب گیدور یر اوزوندن علی ولی الله
.
.
او روبهی که خدا شیرینی شکار ایلدی
دل پیمبری معناده داغدار ایلدی
.
گوروب موانعی مفقود مقتضی موجود
عداوتین او زنازاده آشکار ایلدی
.
وران مصمّم، آچوخ باش عبادته مشغول
بیوک جنایت او بی شرم و نابکار ایلدی
.
ایله علی باشینا اَندیروبدی شمشیرین
سپیلدى قان یره محرابی لاله زار ایلدی
.
یریله گوی آراسندا صدای جبرائیل
بومطلبی هامو دنیایه انتشار ایلدی
.
توكولدی مسجده هر ستمدن صغیر و کبیر
گورن باش آچدی چکوب ناله آه و زار ایلدی
.
حسن گوروب آتا حالین اوجاتدی فریادین
حسین آچوب باشنی گوز یاشی نثار ایلدی
.
بلنمورم نجه دوزدی او حالده عباس
حصار صبرینی بو غصّه تار و مار ایلدی
.
ال اوسته شیر خدانی آپاردولار ایوینه
عجب مدارینی بو چرخ کجمدار ایلدی
.
یاخونلاشاندا ایوه قویدولار علینی یره
که انتظار قزی زینبی فکار ایلدی
.
همینکه وارد اولوب منزله ولی خدا
فغان وا ابتا چرخ اوزینی تار ایلدی
.
خانملار آلدیلار اطرافنی یارالی باشین
او منظره هامودان سلب اختیار ایلدی
.
.
اوجالدی سس هامودان لااله الاالله
چخوب گیدور یر اوزوندن علی ولی الله
.
.
همان گجه که علی ترک ایدردی دنیانی
یغوبدی دوره سینه اهلبیت نالانی
.
غریبه مجلسیدی شورش قیامتیدی
حرملرین گویه اوج ایلمیشدی افغانی
.
گلوردی دسته به دسته عیادته اصحاب
گلن ویراردی باشا باشلیوردی افغانی
.
خبر ویرردی اوز آیرلماقین بالالارینا
اورک گوزیله گور اول مجلس پریشانی
.
اولاندا مجلسی خلوت علی ولی خدا
سکوته امر ایلدی رأفتیله نسوانی
.
یواش یواش ایلدی آغلیانلاری آرام
دیدی محلّ گذردی بوعالم قانی
.
آلوب کنارینه اولده مجتبا اوغلون
سفارش ایتدی وصیّتده دین و تقوانی
.
ایدوب ودیعۀ امر امامتی تسلیم
آتا دلیندن آلوردی حسن او فرمانی
.
صورا چاغوردی حسینی اورکدن ایلدی یاد
حسینُ مِنّى أنا مِن حسین طاهانی
.
گوروب که اللری قوینوندا باوفا عباس
چاغوردی باهم ایدوب او ایکی دل آرانی
.
ویروب او حالده عباس الین حسین النه
او دم ایشتدی هامو بو پیام مولانی
.
دیور حسینه که عبّاسیدن گوتورمه گوزون
آیرما بیر گون اوزوندن بو ماه سیمانی
.
اشاره ایتدی بیر آز ساکت اولدی اهل حرم
صورا بیوردی ابوالفضله کای وفا کانی
.
عزیز فاطمه دی بو حسین اوغول عباس
مباد ترک ایدسن بوعزیز زهرانی
.
بلا گلنده حسینون دایان قباقنده
بیوردی مختصراً بیر اوزون قضایانی
.
بو سوزده شیونه گلدی خانملار آغلاشدی
فغان و نالۀ زینب پوزوب صبایانی
.
.
اوجالدی سس هامودان لااله الاالله
چخوب گیدور یر اوزوندن علی ولی الله
.
.
علی عزاسیدی ای گوز سرشگون ایت جاری
چخوب حرملرینون عرشه شیون و زاری
.
دوشوبدی بستره مولا آلوبلا اطرافین
اولوبلا شیر خدانین هامو عزاداری
.
دوشوبدی خیبر آچان قولّاری تلاطمدن
خزان یتوب سارالوبدی سولوبدی رخساری
.
حسین باخور یوزینه شدتیله ناله ایدور
اویاندا زینبی آغلور بویان علمداری
.
ضعیف حالیله مولا او دمده آچدی گوزون
دگوب بیری بیره گوردی بنات اطهاری
.
واریدی کوفه ده نعمان آدنلو بیر جرّاح
اجازه ویردی گتورسونله اول دل افکاری
.
گیدوب گتوردوله چوخ سرعتیله جرّاحی
باخوب باشا یوزینه اشگین ایلدی جاری
.
ساغالمیاندی بو یاره ایشیتدی تا زینب
اوجادان آغلادی پوزدی هامو وفاداری
.
دیدی منیم بو یره گلماقیم یقین دولدی
اسیر ایدلّه منی شام و کوفه كفّاری
.
.
اوجالدی سس هامودان لااله الاالله
چخوب گیدور یر اوزوندن علی ولی الله
.
.
على شهادته یتدی جهان خراب اولدی
فضای عالم خلقتده انقلاب اولدی
.
دوتوبدی انفس آفاقی بانگ واویلا
محیط عالم امکاندا اضطراب اولدی
.
ایدوبله غسل و کفن پیکر مقدّسنه
شرار آهیله دللر یانوب کباب اولدی
.
وصیّتیدی که گیزلین گِجِیله دفن اولسون
بو نسگل آل رسوله بیوک مصاب اولدی
.
باش آچدی قزلاری تابوته ویردیلر حرکت
یانقلی سینه لرین سوزی بی حساب اولدی
.
نجف چولونده على دفن اولوبدی گیزلینجه
تراب تیره مکان ابوتراب اولدی
.
همان او قبر که قاز مشدی نوح پیغمبر
همان او یرده نهان قرص آفتاب اولدی
.
علی قوتولدی اوزی همّ غمّ دنیادن
ولیک اوغلونا غم غصّه فتح باب اولدی
.
معاویه اوزین ایتدی خلیفۀ اسلام
عجبدی دشمن اسلام کامیاب اولدی
.
اوجالدی سس هامودان لااله الاالله
چخوب گیدور یر اوزوندن علی ولی الله
.
.
.
#حیدریه_علومی_تبریزی
#حیدریه_شهادت
#او_کسکه_ایستری_تاپسین_حقیقتین_قاپوسین
#ترکی
.
#زبدةالاشعار
.
: @nohe_torki