در مقام امام حسین (ع)
گریز به زبانحال حضرت در قتلگاه
..
..
..
..
مرحوم کریمی مراغه ای
..
..
..
..
او گلشنی که معطردی گلستان حسیندی
همیشه خرم و شاداب بوستان حسیندی
او که جماعته ازبردی داستان حسیندی
پناهگاه پسندیده آستان حسیندی
ایکی جهاندا سرافراز دوستان حسیندی
..
..
..
..
او عارفی که دعاسی تانتدیروب عرفاتی
او شخصی که عرفات ایلیوب قانی فلواتی
او عاشقی که ایدوب زمزمه بدیل فراتی
تانتدیران هامی دنیایه صاحب صلواتی
که نام نامی زیبا و جاودان حسیندی
..
..
..
..
حسین معرف بیت الحرام و مرو و صفادی
حسین متمّم عشق و صفا و عهد وفادی
حسین منای وفاده قتیل اهل جفادی
حسین شهید الهى حسین ذبیح قفادى
جهان حق و حقیقت فقط جهان حسیندی
..
..
..
..
حسین حبیب خدادی حسین شه شهدادی
حسین قتیل عدادی حسین سراج هدادی
امیر ملک وفادی منای عشقه فدادی
او خمسة النجبادی عزیز اهل کسادی
قسیم نار و جنان باب مهربان حسیندی
..
..
..
..
دوغولدی سوم شعباندا فاطمه آناسندان
جمالی حسنی آلوب صبر و اختیار آتاسندان
آلوب قوجاقه هَوَسلندی نازنین بالاسندان
امامتی آتاسندان رسالتی باباسندان
امامتیله رسالت مزید شأن حسیندی
..
..
..
..
حسیندی رکن عبادت حسیندی روح نمازه
ولایت اولماسا فیض نمازه یوخدی اجازه
حسینون عشقیدی تثبیت ایدن نمازی جوازه
هامی نماز قیلانلار فدا او میر حجازه
نمازی ساخلیان اخلاص امتحان حسیندی
..
..
..
..
نماز قیلانلارین عالمده مقتداسی حسیندی
نقدری مسجد و محراب اولا صفاسی حسیندی
جهان عشقده عاشقلرین آقاسی حسیندی
گناهکارلرین دردینون دواسی حسیندی
جهیم دن اولاری قورتاران امان حسیندی
..
..
..
..
حسینون عشقی دولان سینه سوز سازسیز اولماز
بو باب رحمته کشکول آسان نیازسیز اولماز
حسینه سینه وران دست دستمازسیز اولماز
نمازین اوسته ئولوب شیعه سی نمازسیز اولماز
نماز علامت تشخیص پیروان حسیندی
..
..
..
..
نولیدی دعوت ایدیدی بوجمعی اوز کرمیندن
بهشتین عطرین آلیدوخ او باصفا حرمیندن
خوشا او شخصه برات اخذ ایده حسین قلمیندن
نقدری زنده یوخ ال چکمروخ حسین علمیندن
قرا علم بیزه محشرده سایبان حسیندی
..
..
..
..
ایدوبله غبطه هامی انبیا مقام حسینه
باخاندا آغلادی آدم فلکده نام حسینه
خلیل بت شکن احسن دیوب قیام حسینه
آتام آنام هامی قربان اولاخ مرام حسینه
سالان تحیّره ایوبی امتحان حسیندی
..
..
..
..
بهشت روضه سیدی مجلس عزاسی حسینون
محرمی صفری زینتیم قراسی حسینون
الهی کاش آچیلا راه کربلاسی حسینون
دیولَّه گورمه لیدی صحن باصفاسی حسینون
نه کربلا که گلستان بی خزان حسیندی
..
..
..
..
نجات ویرماقا دینه معاندین خطریندن
یزیدی ایتماقا آگه خیانت و ضرریندن
گوز اؤرتدی ماملکیندن ال اوزدی ما حضریندن
ویروب جوانلارین حتى ال اوزدی سود امریندن
دیدی خدا بو سولان غنچه ارمغان حسیندی
..
..
..
..
الهى امر حسینون تمامی زینبیلندی
بو نهضتین بولوسن که دوامی زینبیلندی
حسینون اصل اساس قیامی زینبیلندی
ئولن جوانلاریمون انتقامی زینبیلندی
امامت اولماسا زینب باجیم بسان حسیندی
..
..
..
..
الهى شرط وفاده باجمدان ایله حمایت
موفق ایله اونی یورماسین جفای اسارت
اسارت اولماسا کتمان اولار بو امر شهادت
باجیم گرک آچا شاماتده لوای شهامت
او بیر سفیر سخنگوی خوش بیان حسیندی
..
..
..
..
یزید بدمنش آدین قویوب خلیفۀ اسلام
حرام شرعی حلال ایلیوب او دشمن احکام
شراب ایچور قمار اوینور نمازه مست ایدیر اقدام
صباح شامی گرک تیره ایلیم اونا چون شام
بساط شیطنتی یغماق آرمان حسیندی
..
..
..
..
غریق بحر بلایم منه سفینه نه لازم
ایاقلار آتدا قالان گوهره خزینه نه لازم
منه رقیه رباب عاتکه سکینه نه لازم
من اهل کرببلایم منه مدینه نه لازم
مقام جلوه گه لامکان مکان حسیندی
..
..
..
..
الهى عشق سنون جان سنون باشمدا سنوندی
سنون یولوندی یولوم یار و یولداشمدا سنوندی
باجیم سنون قزیم اوغلومدا قارداشمدا سنوندی
بوگوزلریمدن آخان قانلی گوزیاشمدا سنوندی
جواز نطق سنوندی زبان زبان حسیندی
..
..
..
..
اگرچه لطف ازلدن زجاجم آیۀ نوره
کتاب حقده بیزه وار اشاره سوره به سوره
گرک باشیم گیده مطبخ سراده کنج تنوره
گوروم شبیه ایده بوللم جدانی نخلۀ طوره
گوره زمانه همیشه زمان زمان حسیندی
..
..
..
..
کومکلیق ایله الهی گیچوم هامی کومکیمدن
سنیله تازه لیوم عهدی قان آخان بیلکیمدن
سنون یولوندا گرک اوچ پراوخ دگه اوره گیمدن
یارالی قلبی یاروب باش ویروب چخا کوره گیمدن
نثار مقدم جانان بو خسته جان حسیندی
..
..
..
..
مقام عشقده هر شرطه من دیدیم گوزوم اوسته
گنه نقدری جهان واردی من وارام سوزوم اوسته
رکابدن دوشرم قانلی مقتله یوزوم اوسته
گلنده اوخ گیده رم پیشوازینه دیزیم اوسته
همان اوخ آخر عمریمده جانستان حسیندی
..
..
..
..
شریح قاضیدی دیناری دینه دوتدی مقدم
یازوبدی قتلمه فتوا منیم او مفتی اعظم
گرک حسین ایده قرآنی اوز قانیلا مترجم
مقام و منصبی ویردیم یزیدیانه مسلّم
مظفرم بولورم فتح هم عنان حسیندی
..
..
..
..
گرک فراتی قزاردام سواوسته کشمکشیمدن
گله تموّجه زمزم صدای العطشیمدن
شاخاندا گون چکه خجلت بو جلد منکمشیمدن
چخاندا کلمۀ یاربّ لعل غنچه و شیمدن
صدا گله هامی انهار رایگان حسیندی
..
..
..
..
الهى لطف ایلیوبسن حسینه عالی مقامات
منیم قاپومدی سلاطین دهره قبلۀ حاجات
منیم سیادتیمه آفرین دیر هامی سادات
گلنده قتلگهیمده بروزه کشف کرامات
گورلَّه بجدل قاتلده میهمان حسیندی
..
..
..
..
کریمی یم دوغولاندان بو پاک عشقله مستم
غلام ساقی کوثر خمار جام الستم
قلندرم گزرم لااُبالی باده پرستم
قوجالمشام بو گوزل آستاندا بازنشستم
مدال فخر دوشومده فقط نشان حسیندی
..
..
..
..
حسینه نوحه دیم من چخار یوخومدی سسیمده
توجه ایلیوب الله اثر قویوب نفسیمده
بو آرزوده وارام چرپناندا جان قفسیمده
آلاندا نعشیمی دوسلار آرایه پیش و پسیمده
دیلله رحم ایله الله بو نوحه خوان حسیندی
..
..
..
..
من آتمش آلتی محرم صفر گوروب یولا سالدیم
بو آتمش آلتی ایلی شکرلله عشقله قالدیم
او آلتی گوشه لی قبرین محبّتینده قوجالدیم
اگر گورم آقادان اربعین زیارتین آلدیم
نثار جان و تن البته مژدگان حسیندی
..
..
..
..
تحمّل ایلدی زینب نقدری محنت و جبره
یتشدی دایرۀ عشقده نهایت صبره
اوزین نه نوعیله سالدی او آلتی گوشه لی قبره
حسین حسین دیدی دوندردی اشگی بارش ابره
دیدی حسین بو گلن میر کاروان حسیندی
..
..
..
..
یارالی جسموی گورسم بو خاک و خون آراسندان
آریتدارام او گل اندامی اوخ قلج یاراسندان
اوزی بولر باجون اؤپسین او پیکرین هاراسندان
اوره گیمون باشی یاندی اوره گووین یاراسندان
بو جان او یاریه قربان که جانستان حسیندی
..
..
..
..
یارالی گوزلرون آچ زینبم عیادته گلدیم
اورک یاراسنا مرهم سالام طبابته گلدیم
بو آلتی گوشه گوزل قبریوه زیارته گلدیم
جفائیله پوزولان گلشنه سیاحته گلدیم
باجون بو غملی گلستاندا نغمه خوان حسیندی
..
..
..
..
#حسینیه #کریمی_مراغه_ای #حسینیه_مدح #حسینیه_شهادت #قتلگاه #ورود_محرم #ترکی #زبدةالاشعار
نظر دهید