حالات حضرت زهرا سلام الله علیها
.
.
مرحوم #شهاب_تبریزی
.
.
او گون که گیتدی الیندن آتاسی زهرانون
دایاندی عرشه فغان و نواسی زهرانون
.
.
باخوب آتا یرینی بوش گورردی آغلاردی
عذاره چشمه ی اشکین همیشه باغلاردی
بابا دیردی یاناردی جهانی داغلاردی
مزید اولوردی دمادم بلاسی زهرانون
.
.
ازل آنا طرفیندن خانم یتیم اولدی
تک ایوده اولمادی مونس، ئورک غمه دولدی
آنا غمین ئورگه سالدی گون به گون سولدی
سارالدی گول یوزی، گئتدی صفاسی زهرانون
.
.
تصور ایلیه هر کیمسه حال زهرانی
سزادی آغلیا گوزدن توکه جگر قانی
یتوردی زحمتیله باشه عمر دنیانی
ایله حیات دگلدی سزاسی زهرانون
.
.
بو بیر خانمدی که مانندی یوخدی عصمتده
نظیری یر یوزونه گلمیوبدی عفتده
بو عصمتیله بو عفتده بو جلالتده
یاراتمیوبدی بیر عورت خداسی زهرانون
.
.
گورنده جدی که زهرا گلور دوروب فی الحال
ایدردی نچه قدم سرعتیله استقبال
دوتوب الیندن ئوپردی اولوردی چوخ خوشحال
دیردی اولسون آتاسی فداسی زهرانون
.
.
آتاسینون ئولومی ایله پوزدی پرگارین
شب فراق کیمی تیره ائتدی اسحارین
آپاردی رنگ رخوندن جوانلیق آثارین
خمیده لندی قد دلرباسی زهرانون
.
.
بیر عورت عمر ایده اون سگیز ایل که دنیاده
نجه اولور اولا قدی خمیده افتاده
او سنیله قوجالوق گورسنوردی زهراده
دگل بیانه گلن ماجراسی زهرانون
.
.
حسن حسین تک اوغول، مرتضی کیمی همسر
اوزی جوانه و ریحانه و ملک منظر
گورون نقدر مصیبت چکوب ئولوم ایستر
دیر حیاته خدا یوخ رضاسی زهرانون
.
.
او آز حیاتیله دویماز نه نوعی دنیادن
او قدر گوردی اذیت گروه اعدادن
اولوب ایشیق گونوزی تیره لیل یلدادن
گیدوب توانی او غم مبتلاسی زهرانون
.
.
فدک گیدوب حسنینون گل اوزلری سارالوب
خانم اوزی سن اوزون فکر ایله نه حاله قالوب
قاپی یانوب، بالاسی سقط اولوب، قولی قرالوب
ئولونجه قالدی قولوندا یاراسی زهرانون
.
.
بیر اهل دل تاپا بولمور خانم دیه دردین
آتا گیدوبدی، عم اوغلی اولوبدی خانه نشین
سالوب خیاله گیچن گونلرین اولوب غمگین
شریک اولا غمینه یوخ آناسی زهرانون
.
.
دوتوب یوزین حسنینه چکردی دلدن آه
دیردی هاردا قالوب بس باباز رسول الله
نولوبدی گلموری، حالوزدن اولموری آگاه
رئوفیدی سیزه آخر آتاسی زهرانون
.
.
« شهاب » اگر چه سراپا غریق عصیان سان
بیر عمر واردی که جرم و خطاده حیران سان
غم ائتمه حضرت زهرایه سن که گریان سان
یتر جزاده سنه چوخ عطاسی زهرانون
.
.
.
#فاطمیه_شهادت
#او_گون_که_گیتدی_الیندن_آتاسی_زهرانون
#ترکی
#زبدةالاشعار
نظر دهید