اَعیادیدَه قویدوم گِنه دَه فِطرَه قَدَم من #عید_فطر_نادربابایی

عید فطر

.

.
حاج نادر بابایی
.
اَعیادیدَه قویدوم گِنه دَه فِطرَه قَدَم من
بو بایرامی بیلَّم حَقِ والایه حَرَم من
.
بیرآی گجه گوندوز سنه مهمانیدیم الله
قورتاردی قوناقلیق گَزورم باب کَرم من
.
من سَن دِیَنَه چاتمادیم امّا بیلورم سَن
اونناندا بویوکسَن که دیلیمدَه دِیَرَم من
.
چارَم نَدی یارَب قَرَه تُپراقلارین آلتدا
اَعمالیده گَر گورسَم اوگون مُهرِ عَدَم من
.
من عَبدِ ذَلیلَم ، ولی سن خالق سَتّار
کِئچمیشلَره گَل پَرده چَکک هَم سن وهَم من
.
پَس سال یولا ئوز شَاَنووَه لایق بو قوناقی
قویما اَلی بوش بیردَه یازام اَلده قَلَم من
.
ای مین بیرآدین صاحبی سن بیرکَرم اِئتسون
بیر قَطرِیَم امّا اولارام داخلِ یَم من
.
دنیاده صَفا هاردا ، حُسینون یاسی اوردا
آختارمارام هِچ سِیر لواسان و فَشَم من
.
دنیا گُلونَه ناز اِئدوری تُربت پاکی
اولماز غَمیم اولسام بِله سلطانه خَدَم من
.
تاپشیر منی ئوز حُجَّت بَر حَقّووَه یارب
تا سائل اولوم دَرگَه مولایه بو دَم من
.
بیر لحظه منه اِئتسَه نظر یوسف زهرا
حَتماً او باخیشدان تاپارام جامیلَه جَم من
.
عَرض ایلیورم (نادرم) ای فاطمه اوغلی
فِطریَّه منه وئرسون آقا مُستَحقَم من
.
.
#عید_فطر #نادربابایی
#اعیادیده_قویدوم_گنه_ده_فطره_قدم_من
#ترکی

 #زبدةالاشعار