اکبریم آتدان دوشوب چون دوشدی طاقتدن باجی #اکبریه_طوری_تبریزی

شهادت حضرت علی اکبر (ع)
زبان حال حضرت سیدالشهداء (ع) به زینب کبری (س)
.
✍️ #زبدةالاشعار ✍️
.
🆔: @nohe_torki
.
مرحوم طوری تبریزی
.
اکبریم آتدان دوشوب چون دوشدی طاقتدن باجی
اولدوم آسوده داخی امر شهادتدن باجی
.
.
لوح تقدیره بو امری ثبت ایدوب کلک قضا
واردی تقدیره ولی حکمتده تغییر بدا
اکبرین باشیله ختم اولدی اساس کربلا
مطمئن اولدوم خیالات رضایتدن باجی
.
.
اولدی طومار بلا چون اهل عشقه انتشار
اولمادی مندن سواده ماسواده اقتدار
ایلدی جلوه بو وجه اکبریله حسن یار
انبیا مبهوت اولوب بو استقامتدن باجی
.
.
بیرقلج ووردی علینون باشنه بیر بدگهر
باش آچوق گلدی باشی أوسته بابام خیرالبشر
مظهر حسننده گوردی آیت شق القمر
باغریقان اولدی پیمبر بو شباهتدن باجی
.
.
باش قلجلاندی بویاندی زلف کاکل قاننه
خنجر ظلمیله جان بذل ایلدی جاناننه
دلخوشام بو حالته آند اولسون اکبر جاننه
چونکه مقصودیم اولور حاصل بو حالتدن باجی
.
.
زخمله جسمی اولوب صد چاک برگ گل کیمی
سینه سنده باش باشا اوخلار چاتوب سنبل کیمی
وار یری گلسون سکینه نالیه بلبل کیمی
سوز آهی گللری سالسون طراوتدن باجی
.
.
ایلدی اهل جفا بیز اهل بیته چوخ ستم
هر ستمدن آل طاهایه اشدّ اولدی بو غم
آز قالوب میدانه گیتسون باش آچوق اهل حرم
چون حرم صیدی دوشوب دلسیز جراحتدن باجی
.
.
ایلسیدی اقتضا حکمت مشیّتده اگر
ملّت اسلام چون اولسون امام اون اوچ نفر
نور حق سیمای اکبرده اولوردی جلوه گر
واردی ارثی هم امامت هم رسالتدن باجی
.
.
یوخ رعیّتده اولان بیر نوجوان اکبر کیمی
خَلقی خُلقی منطقی اوز جدّی پیغمبر کیمی
کیم گیچر بیله جواندان لیلی مضطر کیمی
حجّة اللهه ایدر شرکت بو بابتدن باجی
.
.
مژده ویر لیلایه مندن اولماسون قلبی ملول
ذبح اولاندا سو سوسوز قرباننه ویردی رسول
اولدی قربانی منای عشقده یاره قبول
هاجره وار افتخاری بو اجابتدن باجی
.
.
گون قباقینده منیم جدّیم شبیهی جان ویرور
پیکرینده چشمه چشمه هر جراحت قان ویرور
بیر بیله وقته منه سعد اوغلی اوغلین سان ویرور
آه بیله ظلمدن بیله شماتتدن باجی
.
.
کلمۀ حقّه ایدوب حق چونکه « طوری» اوز یری
باطن « طورین» سوزینده یوخدی کلمه سوز یری
هر کیمون قلبی گوزی اولسا حسینه گوز یری
نا امید اولماز قیامتده شفاعتدن باجی
.
.
.
.
#اکبریه_طوری_تبریزی
#اکبریه_شهادت
#اکبریم_آتدان_دوشوب_چون_دوشدی_طاقتدن_باجی
#ترکی
.
✍️ #زبدةالاشعار ✍️
.
🆔: @nohe_torki