اگر ائده منه سلطان طوس عطف نظر #رضویه_سعدی_زمان

خبر امّ احمد در شهادت امام رضا (ع)
گریز به وداع امام حسین
.
زبدة الاشعار
.
?: @nohe_torki
.
مرحوم سعدی زمان
.
اگر ائده منه سلطان طوس عطف نظر
نثار ائدر قلمیم دفتره دُر و گوهر
.
همیشه کج دولانوب دؤر چرخ کج رفتار
اودور تمام ائمه اولوب بلایه دچار
.
وئرولَّه بو خبری ام احمده نسبت
همنیکه دوتدیلا موسی ابن جعفری اشرار
.
بیزه معین و پرستاریدی امام رضا
اونیله اوزلرینه تسلیت وئرردی صغار
.
گئدردی روضۀ خیرالانامه وقت نماز
قیلاردی اوردا نمازین بقیّةالاخیار
.
گلوردی هر گئجه دهلیز خانه ده یالقوز
ائدردی رازو نیاز اول شه لک دربار
.
یوباندی بیر گئجه گوردوم که نصف شب اولدی
دئدیم خدا گوره سن اوغلومون باشندا نه وار؟
.
بیوک کیچیک هامی یاتدی ولی اوتوردوم من
الیم ئورکده گوزوم یولدا انتظار و فکار
.
دیردیم اوز اوزیمه هارداسان گوزوم نوری
سنی ده یوخسا آتان تک اسیر ائدوب کفار
.
خیالیله دولانوردوم صاقا صولا نگران
نگوردوم اوندا بالام گلدی یوز گوزونده غبار
.
آخور یوزه گوزینون یاشی حالی چوخ پوزولوب
یتیم لر کیمی بوینون قویوبدی چگنینه زار
.
منیمده حالیمی پوزدی او پوزقون احوالی
بدون اینکه ائدم ماجرانی استفسار
.
دئدی انا آتامین وئر منه ودیعه لرین
بو لفظی ائتدی منی داد و شیونه وادار
.
ایکی الیله ووروب باشه ایلدیم ناله
دئدیم امامی شهید ایلیوبله فرقۀ نار
.
دئدی نه بُلدون آناجان ، دئدیم دئمیشدی اؤزی
بو ماجرانی منه شهریار قطب مدار
.
اوغول منه دئ گوروم سن بس هاردا قالمشدون
بویوردی ائتمیشیدیم کاظمینده منده گذار
.
آتاما گئتمیشیدیم غسل ائدم نماز قیلام
امام امامه گرک غسل و کفن ائده ناچار
.
غریب امامی سالوب یاده آغلادوخ ایکیمیز
بیوک کیچیک یوخودان اولدی بو سسه بیدار
.
وئروبله سس سسه عورت اوشاق کنیز و حرم
اوجاتدی نالۀ واسیّدا صغار و کبار
.
وئروب تسلّی خانم قزلارا امام رضا
گوروب که اولموری آرام عترت اطهار
.
دئدی سیزی آتامین حقّینه قسم وئرورم
اوجادان آغلامیون ائتمیون فغان اظهار
.
سسوز اوجالسا گلوب اشقیا دوتالّا منی
دیه لَّه ایلوری دعویّ علم غیب بولار
.
او قدر صبر ایلیون مطلب آشکار اولسون
آتام شهادتینی ائتسون اؤزگه لر اخطار
.
دویونجا اوندا ائدون ناله ساخلیون ماتم
غریب ئولوبدی بابام ائتمیون عزاسینی خوار
.
بو نحویله گئچونوبدور تقیّه حالینده
دوزوب بلالره محبوب قادر غفّار
.
او وقت اولوب که جهیمه روان اولوب هارون
یتوب خلافته مأمون کافر و غدّار
.
گوروب که دوره ده سادات انقلاب ائدوری
خیال ائدوبدی چکه دؤر مملکتده حصار
.
ائده امام رضانی اوزینه والی عهد
شرار جنگ یاتا امن اولا تمام قطار
.
یازوب مدینیهفرمان اولشوم بی ایمان
امامه ایلدی اوز خام فکرینی اشعار
.
خزینه دار علوم و ضمایره آگاه
بلوب ندور بو ولیعهدلیقدا آخِر کار
.
یغوبدی عترتینی باشینه بویوردی بُلون
منه یتر بو سفرده اذیّت و آزار
.
منی دویونجا گورون اوخشیون دوتون ماتم (1)
ائدون دویونجا عذاره سرشک چشم نثار
.
بُلوب بو مطلبی اهل حرم چکوب ناله
یغشدی دوره سینه اول شهین خانم بالالار
.
قورولدی ئولمه میش اول شاه دینه بزم عزا
چکوب معاینه سس آغلادی در و دیوار
.
ـــــــــــــــــــــــــــ
.
#وداع
.
ایکی امامه دوتوبلار عزا حیاتینده
گلوب عیالی فغان و نوایه مثل هزار
.
بیری امام رضادور بیری امام حسین
حسینیله بو شهین لیک چوخ تفاوتی وار
.
ائدنده هجرت امام غریب یثربدن
نه تشنه کامیدی نه زخمداریدی نه نزار
.
چکیلمه میشدی بونون قلبینه اوغول داغی
سوسوزلوق ایلمه میشدی گوزینده عالمی تار
.
حسینون اکبرینی دوغرامشدی اهل جفا
یارالی دلدن عطش ایلمشدی سلب قرار
.
اوزی یارالی کمکسیز سوسوز اؤرکده الی
سرشکیله گوزی دولموشدی مثل ابر بهار
.
او حالیله دایانوب خیمه لر قباقینده
یغشدی باشینه اولاد حیدر کرّار
.
آرایه آلدیلا مظلوم امامی اهل حرم
نجه احاطه ائدر ماهی ثابت و سیار
.
دوزولدی دوره ده گوز یاشلی خرداجا بالالار
امامده آرادا مثل نقطۀ پرگار
.
مخدّراته وئروب تسلیت نوازشیله
ادوب بالالارینی رأفتیله زیب کنار
.
بویوردی زینب کبرایه باجی گئتمه لیم
من ئولَّم عترتیمه اول منیم کیمی غمخوار
.
عیالیمی سنه باجی بو چولده تاپشورورام
سنی ایلورم الله ذوالجلاله سپار
.
امام دور سیزه مندن صورا بالام سجاد
یانار اود ایچره قالا قویما عابد بیمار
.
ائشیتدی بو سوزی علیا مکرّمه زینب
ئولوم آتین گتوروب ائتدی قارداشینی سوار
.
حسین مصیبتی اولماز تمام اگر اولالار
جهان صحیفه یازان ماسوا قلم اشجار
.
گرک وقایع سلطان طوس ذکر اولنا
بیان مجملیله اهل بزمه بیر مقدار
.
او گون که عترتین ائتدی وداع یثربده
اولوب مدینه دن اول شاه مروه راهسپار
.
همینکه وئردیله مأمون بیحیایه خبر
گلور امام زمان سبط احمد مختار
.
دئدی عم اوغلوما لازمدی اولسون استقبال
هامی محبتینی ایلسون بو گون اظهار
.
چوخ عزتیله هامی خلق پیشوازه چخوب
مزیّن ایلدیلر شهری باغلانون بازار
.
اولوب امام رضا شهره داخل عزّتیله
محبت ایلدی مأمون شوم کینه شعار
.
مرتب ایلدی بیر مجلس سرور و نشاط
او بزمه حاضر اولوب صاحبان عزّ و فخار
.
امام عصری گتوردی او مجلسه مأمون
شروع ائتدی ولیعهد ائتماقا گفتار
.
او امری ایلمدی ثامن الائمه قبول
دوباره ایلدی مأمون بیحیا تکرار
.
امام شرط ائلدی عزل و نصب ایلمرم
سیاست امرینه ائتمم مداخله زینهار
.
قبول ایلدی مأمون امام شرطلرین
همین شرایطیله ثبت اولوندی بیر طومار
.
علاج سیز قالوب اولدی امام والی عهد
ز بسکه دشمن بیرحم ایلدی اصرار
.
ائدوبدی اوز قزی ام حبیبه نی تزویج
امامه ، تا آرالیقدا قرابت اولدی کرار
.
واریدی بیر قزیدا ام فضلدور لقبی
خبیث فطرتیدی نه واریدی شرم و نه عار
.
ائدوب همان قزیدا نامزد او مجلسده
امامین اوغلی جواده او شوم پست تبار
.
وورولدی سکّۀ زر ثامن الحجج آدینا
بو ماجرادن اولوب شاد سربسر ابرار
.
امام عصریله ظاهرده بیحیا مأمون
همین بو طرزیله بیر مدت ایلدی رفتار
.
او قدر کشف کرامات ظاهر ائتدی امام
که بُلدی فضلینی هم یا هم تمام اغیار
.
امامه راغب اولوب سربسر عدوّ و صدیق
رعیّت ایلدی مأمونیدن ولی ادبار
.
او بیحیانین الولاندی آتش غضبی
مرتّب ایلدی انگور زهردار و انار
.
چاقوردی محضرینه شاهِ دین اباصلتی
بویوردی قالسون امانت یانوندا بو اسرار
.
صباح اولاندا گوررسن که حاجب مأمون
گلوب ائدور منی مأمون حضورینه احضار
.
او بزمدن قیدنده اگر منی گوره سن
عبا باشیمدا دگول صورتیم اولوب گلنار
.
سوروش او وقتیده مندن نقدر اولسا سوزون
جوابیوی دیرم حقّ و باطله وئر عیار
.
باشیمدا گورسن عبا وار منی دانشدیرما
بُل ایلیوب منی مسموم دشمن خونخوار
.
صباح اولوب چاقوروب حجةاللهی مأمون
آپاردی مجلسه تشریف شاه یوم شمار
.
نوازش ایلدی مأمون یانندا یر وئردی
منوّر ایلدی اول بزمی مطلعُ الانوار
.
امامه ایلدی تکلیف میله ائده انگور(2)
منی بغشله بویوردی امام عرش وقار
.
دئدی دوباره عم اوغلی گوزل اوزومدی بولار
جواب وئردی بو نوعیله حجّة دادار
.
بهشت اوزوملری شاید گوزل اولا بوندان
منی بغشله غریبم یوخومدی یاور و یار
.
نقدر ایسته دی میل ائتمسون امام غریب
غریب امامدن ال چکمدی او بد کردار
.
دوتوب یوزین گویه عرض ائتدی شاهد اول یارب
الیمده چاره یوخ ایلور بو بیحیا اجبار
.
کمال یأسیله بیر نچّه دانه میل ایلدی
پوزولدی حالی چکوب دلدن آه آتشبار
.
دوروب ایاقه چکوب باشینه عبانی امام (3)
چخاندا سسلدی مأمون شوم او کان نقار
.
عم اوغلی ساخلا ایاق بیر گوروم هارا گئدوسن؟
بویوردی اول یره کیم گوندرورسن ای غدّار
.
خلیفه ، قابض الارواح منتظردی منه
یوزیمه باخسا بُلر حالیمی اولوالابصار
.
روایت ایلور اباصلت یولدا دورموشدوم
گلور نه گوردوم او دمده غریب دار و دیار
.
عبا باشیندا قویوب اللرین ئورک باشینا
توکور عذاره جگر قانی دیدۀ خونبار
.
دوداقی پارچالانوب قطره قطره قانی آخور
ائله سولوب دیه سن بس خزان اولوب گلزار
.
نچه قدمده دورور بیر اوغوشدورور اؤره گین
دیور دیوم کیمه من درد دل هانی دلدار؟
.
گلوب یتشدی او حالیله منزله شهِ دین
دئدی گوزیمده ئولومدن عیان اولور آثار
.
دایانما باغلا اباصلت منزلین قاپوسین
یریمی خلوت ایله فرشی ده گل ایله کنار
.
غریبه لازمه دور جان وئره قوری یرده
سوؤَر بو ئؤلماقی عالمده قادر غفّار
.
حسین ئولنده قوری توپراق اوسته جان وئردی
اؤزی یارالی سوسوز نه کمک نه خدمتکار
.
بو گون کرک تبعیت ائدم او مظلومه
قوری یر اوسته ائدم جان خدای حقّه نثار
.
بو سوزلری ائشیدوب فرشی یغدیم آهسته
سزادی یانسون او احواله شیعه لیل و نهار
.
کنار اولدوم امام غریب تک قالدی
ائدردی گه صولا گه صاقه حسرتیله نظار
ــــــــــــــ
(1) السَّلَامُ عَلَى مَنْ أَمَرَ أَوْلَادَهُ وَ عِیالَهُ بِالنِّیاحَةِ عَلَیهِ قَبْلَ وُصُولِ الْقَتْلِ إِلَیهِ ،
سلام بر کسی که فرزندان و خانواده ی خود را امر فرمود به گریه کردن برای او پیش از رسیدن شهادتش (زیارت جوادیه)
(2)تاریخ چهارده معصوم ج 2 ص 448
(3) منتهی الآمال ج 2 ص 204
.
#رضویه_شهادت
#وداع
#سعدی_زمان
#اگر_ائده_منه_سلطان_طوس_عطف_نظر
#ایکی_امامه_دوتوبلار_عزا_حیاتینده
#چاقوردی_محضرینه_شاه_دین_اباصلتی
#چهارده_معصوم_حسینی ص 285
#ترکی
.
#زبدةالاشعار
.
?: @nohe_torki