در مدح حضرت معصومه (س)
.
.
حاج مجید امینی تبریزی
.
.
ای ائدن شهر قمی باغ جنان معصومه
سنله مشهور اولونوبدی او مکان معصومه
.
.
بارگاهون قاپوسی دائم آچیخدور هامیه
سنی لازمدی هامی باب کرامت تانیه
ائتمیسن قبریوه دعوت منی مدّتدی نیه؟
بید تک قلبیم اسر وقت اذان معصومه
.
.
ای یگانه گهر کنز ادب حور سرشت
قبریوه وار یری گر غبطه ائده باغ بهشت
گر ئولم توپراق اولام، توپراقیمی ائتسه له خشت
گینه لطفونده گوزوم واردی هر آن معصومه
.
.
ای اولان دردی دئمم دردیوی گئت اوزگیه دی
اَوَل اللهه سوزون اولسا گلوب نالیه دی
سال صورا یول قما، حاجاتیوی معصومیه دی
دردیوی آل نظره دئ اوجادان معصومه
.
.
چوخدی الطافی، دئمه من هارا معصومه هارا
نسگلین یاد ایلینده ووروری قلبه یارا
بو باجی قارداشی الله ویروب ایرانلی لارا
چوخ خراسانی سُوَر قُمدا یاتان معصومه
.
.
ای #امینی دئنه معصومیه هر دردون اولا
بوندان آرتوخ اورگون قویما ملالیله دولا
عمر سرعتله گیچور، دور قما دوش سنده یولا
سسله قارداشینا حسرتده قالان معصومه
.
.
هر او کس بو خانیما زائر اولا واردی دادی
یارالی قوش کیمی سینماز او کسین قول قانادی
چون صفابخشدی هر قلب اولا معصومه آدی
واردی دردون دینه ای مشکل آچان معصومه
.
.
ساوه شهرینده مرض سندن آلوب صبر و قرار
یتدی گون ساوه ده قالدون ولی افسرده و زار
فکره دوشدون اولاسان شهر قمه راهسپار
دردیوین بلکه علاجین تاپاسان معصومه
.
.
گرچه سن ناخوشیدون دوره وی آلموشدی زنان
سنی قویموبلا سالا نطقیدن اُول درد گران
قویمیوبلا سنی بیکس قالاسان پیر و جوان
دوره وه جمعیدیلر ناله کنان معصومه
.
.
دائم اولموشدی رضا آدی سنه ورد زبان
هی دیردون سنه قربان اولوم ای روح و روان
گلشن عمرون اولا قالموری اول قدر خزان
دیدیوه ایلمور عالمده گمان معصومه
.
.
اهل #قم ایلدی هر خدمت شایسته سنه
قویمیوبلار باتاسان هجر رضاده مُحنه
قالدون حسرتده ئولن وقتیده گرچه وطنه
هر گلن یانیوه سسلردی اویان معصومه
.
.
گتیرور بو غم و اندوه منی درده خانم
توکولردی گوزیوین یاشی رخ زرده خانم
ناگهان گوردوله یومدون گوزون آهسته خانم
توکدولر خلق یوزه اشک روان معصومه
.
.
گوتدی معناده آتان باشیدن عمّامه سینی
شیعه لرده هامیسی گیدی قرا جامه سینی
گوردولر سینه ده تا قارداشیوین نامه سینی
شور محشر او زمان اولدی عیان معصومه
.
.
بیرده زینب قویوب ال سینه سینه جان ویردی
اودا اوز قارداشینا عشقینی اعلان ویردی
سینه ده ثوب حسین عمرینه پایان ویردی
کیمدی ویرسون بیله مظلومه نشان معصومه
.
.
#حضرت_معصومه_مدح
#ای_ایدن_شهر_قمی_باغ_جنان_معصومه
#مجید_امینی #حضرت_معصومه
#ترکی
#زبدةالاشعار
نظر دهید