ای بشر فکریوی محکوم اسارت ائله مه #پندیات #امانی_اردبیلی

پندیات
.
زبدة الاشعار
.
: @nohe_torki
.
حاج علیرضا امانی مجد اردبیلی
.
ای بشر فکریوی محکوم اسارت ائله مه
روحون آزادیه مایلدی ملامت ائله مه
.
بشرین ارزشی حیثیت و شخصیتی دی
ساخلا حیثیتو وی ، غرق کراهت ائله مه
.
الله ئوز روحینی جسمونده امانت قویدی
شرفون اولسا امانتده خیانت ائله مه
.
ساتما وجدانو وی هئچ منصبه هئچ مرتبیه
عزت نفسیوی آماج ذلالت ائله مه
.
حق یئمه حقیوی ده قویما یئییه هئچ بیر کس
بیرده کی آل محمدله عداوت ائله مه
.
مکتب رحمت و عزتدی بیزیم مذهبیمیز
عمدی یا سهوی بو مکتبده شرارت ائله مه
.
دین اسلامی پیمبر بیزه شفّاف ائلیوب
حکم شفّاف شریعتده نیابت ائله مه
.
شکلیدن شکله سالوب حکم رسول اللهی
تازه احکامووی ، بو خلقه ، قداست ائله مه
.
هری بیر سَمته چکور فکرلرین قافله سین
وعظه باور ائلیوب وعدیه عادت ائله مه
.
دوزدی بیر جرمیدی بو دوره ده روشن فکری
ولی جاهل کیمی ترویج جهالت ائله مه
.
ایسته سون انجمن فکری قوراق بیر ساعت
زاهدا فکری قویوب ذکری قرائت ائله مه
.
عمل ائیله اول احکامه سورا ائیله دعا
قوری بیر راز و نیازیله ریاضت ائله مه
.
متن قرآنه عمل اِئتسون اگر عابدسن
هی یالانان منه قرآنی تلاوت ائله مه
.
سن خلوصیله ایکی رکعت اوخی گونده نماز
یئتمیش ایل ریب و ریائیله عبادت ائله مه
.
جبریلن جنّته داخل ائله مه بنده لری
ذات قدوسین امورینده وکالت ائله مه
.
الله ئوز بنده سینین ائتدیگینه ناظردی
سن نماینده اولوب ، دینه دخالت دائله مه
.
سمت اسلامه محبّتله گلر نسل جوان
زور بازوییله بو نسلی هدایت ائله مه
.
کربلا درسیدی آراده اولان فکریلره
گونده بیر جور منه بو درسی روایت ائله مه
.
دشمن جهل و خرافات و فساد اولدی حسین
آیری سوز ، وارد فرهنگ شهادت ائله مه
.
اگسه باش ظالمه هر کیم ئوزونه ظلم ائلیوب
یعنی راضی سن اگر ظلمه … شکایت ائله مه
.
ایسته سون گورمیه سن دهریده مظلومیت
ظالمین وئردیگی دستوره اطاعت ائله مه
.
نام نامی حسینی ائله مه ، منبعِ کسب
دامن عاطفه نی غرق قباحت ائله مه
.
کونگین رنگینه باخما، ئوزوون رنگووه باخ
قاره بیر کوینگی اگنونده علامت ائله مه
.
نوکر فاطمه بی رنگ و ریا اولمالیدی
طلب رتبه تمنّای جلالت ائله مه
.
اولا بیلمورسن اگر نوکر بی رنگ و ریا
ساحت فاطمیه عرض ارادت ائله مه
.
چوخ دئیوبلر بیزه هر حالدا قناعت ائلیون
یعنی هئچ بیر کسی اِفراطه دلالت ائله مه
.
ولی بو حکمی منیم فکریمه غیرت وئردی
دئدی عشق عالمی محدوده رعایت ائله مه
.
هر نه ده یعنی قناعت نظرون اولسا ائله
فاطمه اوغلونون عشقینده قناعت ائله مه
.
سینه ی سرخ شهادتده یازوبلار بیر سوز
کیم دئیوب بو سوزی تفسیر شرافت ائله مه ؟
.
کیم حسین اولماسا دنیاده یزید اولمالیدی
بیر جگر خواره نین اوغلونان حمایت ائله مه
.
زینبین خطبه سی تاریخه گرگ درس اولسون
دئدی ای غیرتیم احساس اِسارت ائله مه
.
دئیورم بو سوزی تا آنلیا امثال یزید
تکیه هر یئرده ائله… جای امامت ائله مه
.
هر کیم عباس اولا بیلمز ، ولی حر اولماق اولار
غیرتی سعی ائله دنیاده تجارت ائله مه
.
ای اوکی ضد علی ابن ابی طالب سن
بو خصومتده خطر واردی ، حماقت ائله مه
.
ساحت پاک ائمه ، بیزه دانشگه دی
سنون ایمانون اگر یوخدی ، لجاجت ائله مه
.
چوخ گلیمونن اوزاتما ایاقون بیچاره
ساخلا قلادووی بوینوندا ،سماجت ائله مه
.
دودمانون داغیدار بیر گون علی شیعه لری
محضر حضرت عباسه جسارت ائله مه
.
ندن آیا بو جسارت بو قباحتده اولور
اعتقاداته شعورون وار اهانت ائله مه
.
نه دلیله گورگ تنگه دوشوب جامعه میز
خلق مستضعفی بو قدری سیاست ائله مه
.
آقادان چوخ آقازاده بیزی آزار ائلیور
آقا … لطف ائیله عنایاتی عنایت ائله مه
.
بوشلا بو مردمی قوی دردیمیزه چاره تاپاق
گورجه گین آب گل آلودی ، خباثت ائله مه
.
باغلیاق قوی هله میز اوسته کی پرونده لری
آیری پرونده ایلن ملتی غارت ائله مه
.
#پندیات
#ای_بشر_فکریوی_محکوم_اسارت_ائله_مه
#امانی_ردبیلی
#ترکی
.
#زبدةالاشعار
.
: @nohe_torki