پندیات
.
#زبدةالاشعار
.
: @nohe_torki
.
کربلایی رحیم فیضی اردبیلی
.
ای بَشَر عمرووی بیهوده تباه ایلموسن
جرمیله نامهٔ اعمالی سیاه ایلموسن
.
حیدرین حقّینی غصب ایلینه یاور اولوب
اوّل و ثانی و ثالثلری شاه ایلموسن
.
یخوب انصافین ائوین، سینهٔ وجدانی یاروب
کوهی هم شان و وقار پَرِ کاه ایلموسن
.
هم آیی ردّ ائلیوب هم گونی انکار ائلدون
ئوزووه قاره داشی مِهریله ماه ایلموسن
.
یوخدی انکار یولی ایلدیگون معصیته
بوتون اعضالری هر امره گواه ایلموسن
.
خالقی گوزدن آتوبسان داخی دنیایه گوره
بو فنا دهریده شیطانه نگاه ایلموسن
.
گرچه ابلیس قازوب چاله که انسانی یخا
سن رذیلانه همان چاله نی چاه ایلموسن
.
ئولومی، آخرتی، دوزخی یاددان چخادوب
عالمی چاپماقا سن شال و کلاه ایلموسن
.
نَقَدَر خط چکیله جرم و جنایتلرووه
گئنه ده یانمالیسان بسکه گناه ایلموسن
.
خواب غفلتدن اویان نامهٔ اعمالووه باخ
توشهٔ آخرتون حسرت و آه ایلموسن
.
ایتیروب دوز یولی جنّتدن اوزاخلاشماقیلا
طیّ ائدوب اَیری یولی دوزخه راه ایلموسن
.
نه خشوعیله نمازه دایانوبسان دل شب
نه خضوعیله مناجات پگاه ایلموسن
.
«فیضیا» شکر ائله اللهه علی شیعه سی سن
سایهٔ شاه ولایتده پناه ایلموسن
.
.
#پندیات_فیضی_اردبیلی
#ختم_خوانی
#ای_بشر_عمرووی_بیهوده_تباه_ایلموسن
#ترکی
.
#زبدةالاشعار
.
: @nohe_torki
نظر دهید