ای تاجدار زینب گلدیم فغانه سن سیز #مصیبی_تبریزی

زبانحال زینب کبری(س)درقتلگاه»
((ایوای یارالی قارداش))
.
زبدة الاشعار

?: @nohe_torki
.
محمد علی مصیبی تبریزی
.

ای تاجدار زینب گلدیم فغانه سن سیز
اولدوم خدنگ ظلمه قارداش نشانه سن سیز
.
گور قالمیشام نه حاله طوفان ابتلاده
گوز، قانیلن لبالب دیل یانه یانه سن سیز
.
ظنـّیم یوخیدی قارداش بیر بیله ابتلایه
آخر دۆزوم نه نوعی بو امتحانه سن سیز
.
صد پاره پیکرینده نه ال قالور نه باش وار
سویله نئدوم بو حاله گلمور گمانه سن سیز
.
اسلام آدیله قارداش قرآنی دوغریوبلر
اولدوق نشان ، خدنگ اسلامیانه سن سیز
.
هم سینه لر چاپیلمیش هم خیمه لر تالانمیش
یانمیش بلا اودوندا هر آشیانه سن سیز
.
تا سن هله صاغیدون زینب او حاله قالدی
گور شامیان نئدللر بو باغریقانه سن سیز
.
گلزاریوین گئدوبدور سندن صورا صفاسی
دورگور نئدور مغیلان بو گل ستانه سن سیز
.
بیلمور بو هرزه لشکر قرآن ناطقوخ بیز
قرآنی ئورگدوللر قرآنیانه سن سیز
.
سن یوخ بابام علیدن وار سینه لرده کینه
ایندی بوقومه زینب اولموش بهانه سن سیز
.
دار فنانی آتدون سیر علایه چاتدون
هئچ بولمدون دونوبدی قدّیم کمانه سن سیز
.
شور ولانی آلدون قارداش بابام علیدن
منده او شوری ساللام کلّ جهانه سن سیز
.
تاپشورمیسان حسینیم بیر نئچه قاره معجر
احوالی نی سوروشما گلمز بیانه سن سیز
.
سندنصورا رقیّن باخ گور قالوب نه حاله
آه و نواسی چاتمیش هفت آسمانه سن سیز
.
هردم دیور؛بابامدان عمّه ، خبر یوخوندی؟
آخر او گئتمزیدی بیر آیری یانه سن سیز
.
سندندی عرش و فرشین وار هرنه آبروسی
اولماز بها مسلّم حتی جنانه سن سیز
.
هرچند بی معینم امّا بو قولی وئرّم
تا اود سالام بساط سفیانیانه سن سیز
.
قوررام بساط محشر وادیّ کوفه ده من
حتی بو باشی وُررام تخت روانه سن سیز
.
سرخطّ درس عشقی چون آلمیشام بابامدان
شاماتیده علی تک گللم بیانه سن سیز
.
بوردان نئجه گئدوم من غسل ائتممیش وجودون
باخ گوربوگوزده قانیاش حقّیمدی یا نه سن سیز
.
گوزیاشیمیله غسلون قارداش یره یتوررم
عشقیم سنه یازیلسون لوح زمانه سن سیز
.
تا وار«مُصَیـّبی» تک هجران سوزون یازانلار
دین پرچمی یخیلماز دوشمز تکانه سن سیز
.

#قتلگاه #کوچ_کربلا
#ای_تاجدار_زینب_گلدیم_فغانه_سن_سیز
#مصیبی_تبریزی
#ترکی
.
#زبدةالاشعار

?: @nohe_torki