مدح و شهادت حضرت علی علیه السلام
#گریز به #قتلگاه
..
مرحوم حاج داود بیدق داری
..
ای جمالی آینه انوار حیّ داوره
ای سالان شور قیامت عرصه گاه محشره
..
یاعلی سنسن هدایت ائلین افکاریمی
گرعنایت اولماسا مدحون یازیلماز دفتره
..
اولماسا هرباشدا عشقون چاتمازآخرده باشا
مات اولارنقش عرض ده پی آپارماز جوهره
..
جام عشقون باده سیندن آفرینش مست اولوب
آدیوی کلک ازل ساقی یازوبدور کوثره
..
صادراولسا هرفضیلت یا کمال معرفت
متصلدور سنکیمی معناده اعلا مصدره
..
یوخدور اوخشارون بلاغت ملکینین سلطانی سن
سوزلرون قرآنه قارداشدور ئوزون پیغمبره
..
محضر عشقونده کیم جان الده اولدی زائرون
جان حجابین رد ایدوبدورتایتوب جان پروره
..
اونداکی کهف الامان اولدون بوتون سائللره
گون سیاقی قلبلرده تاپدی عشقون سیطره
..
عالم غیب وشهودین حکمرانی یئرده سن
مستمع جبریل اولوبدور سن چخاندا منبره
..
گلمه میشدی احمده ایاک نعبد نستعین
قبله قلبینده دلیل اولدون ثبوت داوره
..
آستانونده یئریم واردی بهشتی نیلورم
ساتمارام درگاهیوی مولا بهشت دیگره
..
ابن ملجم یوخ سنی ئوز عدلون ئولدوردی علی
ابن ملجم عامل اولدی ضربت غم گستره
..
باش بولوندی گوئیا منشق اولوب آی کوفه ده
آیدا گویده آغلادی مظلوم عالم حیدره
..
گوئیا کهنه گلیم اوسته قویوبلار پیکرین
تا یتوبلر منزله مولا باخوب دور و بره
..
قیلدی فرمایش بوحالدا گورمسون زینب منی
ایندیدن تئزدور یانا غمدن اوجالمیش آذره
..
گوردی بیر یول فاطمه پهلوسینی بسدور اونا
اولمارام راضی بویانسون صورتی اشک تره
..
اولمادون راضی گوره زینب علیجان یاره وی
بیراشاره ایلورم کرب وبلاده محشره
..
دوشدی گوداله حسین زینبده تل اوستن باخور
مین سواره یاغدیرور هی اوخ اوخ اوستن بیریئره
..
لرزیه دوشدی بدن دیزلرده طاقت قالمادی
یاره نین اوستن یارا دگدی یارالی پیکره
..
اوخ ووران گوردی ایشین نوبت یتشدی نیزیه
وردیلار ازبسکه پیکر گوزگوز اولدی یکسره
..
عفو ائله یابن الحسن یاندیردی بو سوز قلبیمی
قانیلن توپراق چوخور یرده قاریشدی بیر بیره
..
کاش بوردا قورتاریدی جدووین غم صحبتی
نعشینه آت چاپدیرا فرمان گلوبدورلشگره
..
سندیروب آت دیرناقی اوخدان سوکولموش سینه نی
گون داغیلدی گوئیا تبدیل اولوب یوز اختره
..
قالدی بیرحاله باجی قارداشینی گوردی ولی
بهت آپاردی زینبی تاباخدی قانلی پیکره
..
سسلدی آیا حسینیم سنسن آی باشسیز بدن؟
ناامید ائتمه منی رد جواب ائت خواهره
..
تللین اوستن مقتله آز یولدی اما یاحسین
چوخ وریلدیم تا یتشدیم قتلگهده محضره
..
وای منه بیرصاف یرون پیکرده یوخدور تا ئوپوم
بیرگلستان گولدی گویا پخش اولوبدی معبره
..
#حیدریه_مدح #حیدریه
#حیدریه_شهادت
#ای_جمالی_آینه_انوار_حی_داوره
#بیدقداری
#ترکی
#زبدةالاشعار
نظر دهید