دفن حضرت زهرا علیها سلام
#گریز به #کوفه
..
..
..
..
مرحوم کریمی مراغه ای
..
..
..
..
ای خاک تیره ساخلا علینون امانتین
اینجیتمه احترامینون ایله رعایتین
..
بیر گوهر نفیس علی تاپشیرور سنه
صرّاف دهر بولمدی معیار قیمتین
..
مخلوقدور خلایق اونون خلقینه طفیل
خلّاقه خلقدن بودی معناسی خلقتین
..
بیر صنعدور صنایع پروردگاردن
صانع تمام ایدوبدی بو صنعتده صنعتین
..
ام الائمه ام ابیهایه ترجمه
یاددان چیخاتما بضعةُ منّى عبارتین
..
کوثر ویروب لقب بونا قرآندا ذو الجلال
خیر کثیر دشمنی کسر ایتدی کثرتین
..
ای خاک تیره ویرمه بوگل جسمه چوخ فشار
درک ایله قولدا سینه ده کاری جراحتین
..
بیر دسته گل دوتوب منه ویرمیشدى مصطفا
سولمازدی گر اولیدی چکن ناز و عزّتین
..
دوقّوز ایل عطری منزلیمی ایلدی بهشت
قالمازدی منده غصّه گورنده طراوتین
..
رد ایلورم پیمبره اما خجالتم
باد مخالف الدن آلوبدور لطافتین
..
صدّیقه دی زکیّه دی مرضیه راضیه
معصومه دی خزینه سی ناموس و عفّتین
..
دنیا بو درّ باهره نی ساخلیانمادی
گوستردی هر زمان بونا بغض و عداوتین
..
سیندی قولی قابورقاسی سقط اولدی محسنی
ابر ستم خسوفه سالوب ماه صورتین
..
سیلی یرین آتاسینا گتدی نشان ویره
عرض ایلیه بابا بودی اجری رسالتین
..
زهرا حسینه زینبه ویررم سنی قسم
ویرمه اشاره جدّیوه سیلی حکایتین
..
قلبونده ساخلادون دیمدون دردیوی منه
گیزلت آتاندان اهل جفانین جنایتین
..
گورسه یوزونده سیلی یرین ختم الانبیا
فردوسده توکر یوزینه اشک حسرتین
..
بیرگون منیم ایویمده یوزون گولمدی سنون
ویردون رضا قضاسینه امر مشیّتین
..
سن آسمان معرفته آفتابدون
عرفاندا سر مقاله سی اهل طریقتین
..
نفس زکیّه من عرفه نفسدن مراد
سنسن که سنده ثبتدى اثباته وحدتین
..
اولدی سنه علینون ایوی خانقاه عشق
حق حق دیوب صفاسینی تاپدون حقیقتین
..
دست آسیابی سنگ قناعت حساب ایدوب
مرتاض اولوب فناسینه چاتدون ریاضتین
..
ایتدون ایویمی صومعه صوم و صلواتله
اهل سلوکه درسینی ویردون عبادتین
..
دولدی بوشالدی درّیله کشکول گوزلرون
درویش وار کُنهنه چاتدون ارداتین
..
مرشد مثال الونده کی دوک اولدی منتشاء
چلتار اولوب باشوندا کی چلتاری چرقتین
..
هو هو چکوب حسینی یاتیرداردون هر گیجه
حق حق دیوب اوپردون اونون ماه طلعتین
..
پیر جواندن هامی پیرانه پیره سن
جلب ایلدون مراد و مریدین رضایتین
..
سیر سلوکی وصل به حقّیله قورتاروب
فانی اولوب بقاسینه چاتدون سعادتین
..
زینب کیمی رشیده قز ارشاد ایلدون
قویدون یرونده مرشدین اهل رشادتین
..
زهرایه قالدی زینب مظلومه جانشین
دؤزسون گرک فشارینه هر بار محنتین
..
اهل قلم اگر اوتوروب یازسالار مدام
کیمدور یتیرسین آخره زینب مصیبتین
..
زینبدی کربلا علمین شامه نصب ایدن
محکوم ایدن یزید پلیدین خیانتین
..
بیرگون گورر جداده حسینون کسیک باشین
خاکستریله خون ایتیروب داش علامتین
..
زینب یاراندا باشینی محملده کوفه ده
زهرا یتیش هراینه باغلا جراحتین
..
#گریز #کوفه
..
ایللر دولاندی گون باتوب آی چیخدی وقت اولوب
زینب دیار کوفه ده گوردی اسارتین
..
شمس حیا حجابینی آتدی شتابدن
آگاه اولوب غروبینه شمس امامتین
..
عرض ایلدی حسین قوروسون داش آتان الی
کیم ووردی سجده گاهوه سنگ قساوتین
..
من آغلیوم رقیّه وه یا آغلیوم سنه
یا آغلیوم جفاسینه قوم رذالتین
..
قرآن سسون آلوب بئله بولدوم وطنده یم
یاددان چیخاتدیم اهل عراقین شماتتین
..
فکر ایلدیم مدینه ده یم ساغدی ائللریم
سالدیم خیاله عمریمون عزّتلى ساعتین
..
کیمدور بو شهر کوفه ده قرآنه مشتری
داشدی آغاجدی بوردا جزاسی تلاوتین
..
ئولدیردیلر علینی نماز اوسته کوفیان
قرآنی ئولدیرن بیزه خاطر قویا چتین
..
خولی تنور ایچینده ویروب یر قوناقینه
مطبخده کوللر اوسته قویوب عرش زینتین
..
اکرام ضیف یاخشیدی امّا کریمدن
بولمز دنی صفت ندی رسمی ضیافتین
..
گلمز جهانه خولی کیمی پست میزبان
الله الیندن آلسین اونون استراحتین
..
زهرا قوجاقی سن هارا مطبخ سرا هارا
گویا جهاندا آخری ذلّتدی عزّتین
..
دنیایه باخ فلکده نشیب و فرازی گور
پوزدی عجب تفاقینی آل رسالتین
..
من بو دیاره قارداش ایکی دفعه گلمیشم
چوخ واردی فرقی بو ایکی سیر و سیاحتین
..
اوندا گلنده باشیمه گللر سپردیلر
ایمدی توکولَّه کول سوروشان یوخدی علّتین
..
نوحه یازوب کریمی ایدر دائم آرزو
دنیاده شه زیارتین عُقبا شفاعتین
..
جان اوسته گلسه باشیمون اوسته آقام حسین
جان ویرماقین دگیشمرم عمریله زحمتین
..
نکرین منله یاخشی مدارا ایدر اگر
آننیمدا گورسه لر آقامین پاک تربتین
..
ئولسم بو قاره کوینگیلن دفن ایدون منی
احرام باغلیوم آقامین قاره خلعتین
..
..
ای خاک تیره ساخلا علینون امانتین #فاطمیه_کریمی_مراغه_ای
نظر دهید