بازگشت به مدینه
زبانحال حضرت زینب (س)
.
✍️ #زبدةالاشعار ✍️
.
🆔: @nohe_torki
.
حاج علی نعمت زاده
.
گوردوم نچه مدت غم هجران ننه گلدیم
قلبیمده واریم درد فراوان ننه گلدیم
.
قول باغلی دوشوب چوللره آواره دولاندیم
ظلمین اثری منده نمایان ننه گلدیم
.
قدّیم خم اولوب باخ منه وار قاره باشمدا
سالمش قره نی باشیمه دوران ننه گلدیم
.
بوردان حرکت وقتی جلالیله گئدیردوم
اجلالیم اولوب طعمۀ نیسان ننه گلدیم
.
عبّاسیله اکبر منه اولموشدی جلودار
حشمتله گئدردیم یولی خندان ننه گلدیم
.
قارداشلاریمون نازینی هر گونده چکردیم
گوزلردی منی خسرو خوبان ننه گلدیم
.
دوشسیدی اگر قافله بیر منزله گاها
عباس ورردی منه سامان ننه گلدیم
.
آز اولدی ولی زینبوون خوش گونی باری
هاردان ائلیوم دردیمی عنوان ننه گلدیم
.
دورد آی بیزی اللهون ائوی ساخلیا بیلدی
توش اولدی گنه دشت و بیابان ننه گلدیم
.
یول سالدی بیزیم قافلیه میز دشت عراقه
گزدیم او بیابانلری ویلان ننه گلدیم
.
بیر یئرده خبر گلدی باتوب قانینه مسلم
باشلاندی بیزه کینه ی عدوان ننه گلدیم
.
ایستیردی محرم اولا دشمن بیزی تاپدی
تنگ ایلدیلر عرصه میدان ننه گلدیم
.
غم قافله سی کرب و بلایه یولی دوشدی
اطرافیمیزی آلدیلا دونان ننه گلدیم
.
یول ورمدیلر قافله میز کوفیه گتسون
تاپدوق او بیابانیده اسکان ننه گلدیم
.
لشکر گونی گوندن چوخالوب ایتدی حسابی
کافر یوخیدی هامی مسلمان ننه گلدیم
.
سویوللارینی باغلادولار خیمیه ساری
سعد اوغلی ائدیب ظلمیده طغیان ننه گلدیم
.
هر قیز اله بیر کاسه دوتوب صبریمی آلدی
سسلر دیله یاندوق بی بی عطشان ننه گلدیم
.
بیچاره ربابون غمینه هامی ملردی
آغلاردی علی اصغره هر آن ننه گلدیم
.
عاشور بلا چائتدی الیم الدن اوزولدی
سعد اوغلی وئروب لشگره فرمان ننه گلدیم
.
یول سالدیلا اخیامه طرف دشمن بی رحم
خیردا بالالار ایلدی افغان ننه گلدیم
.
باشلاندی جدل قانه باتوب جنگه گئدنلر
دوغراندیلا اعضالری یاران ننه گلدیم
.
اصحابیلر اوّلده ائدیب جنگه رقابت
یان یانه یاتوب جمله عزیزان ننه گلدیم
.
نوبت یتشوب هاشمی اولادینه آخر
اوّل یتشوب اکبره میدان ننه گلدیم
.
هیچ من دئمورم قارداشمون حالی نجیدی
اسماعلینیه سُولدی گلستان ننه گلدیم
.
قاسمده گئدوب عونیله جعفرده یخلدی
عبّاسه چاتوب ایلیه جولان ننه گلدیم
.
ایستیردی گئده قارداشمون رنگی سارالدی
قوللارین اوپوب دیده سی گریان ننه گلدیم
.
امر ائتدی سو آل جنگ ائلمه اصغره خاطر
قوی جنگ قالا ئولدی بو جیران ننه گلدیم
.
سو عشقینه بیر جوت قولینی بیر گوزی وردی
شرمنده قالوب اولدی پریشان ننه گلدیم
.
سومشگینه اوخ دگدی چخوب جانی بدندن
نهر اوسته یاتوب اولدی نگهبان ننه گلدیم
.
عبّاسیم ئولن لحظه حسینون بئلی سندی
دشمن ائلدی عرصه ده طوفان ننه گلدیم
.
تک قالدی حسین بیرده کی گهواره ده اصغر
قان ایچره یاتوب سئومَلی طرلان ننه گلدیم
.
قالخزدی قوجاقینده کی شرم ایلیه دشمن
اوچ پر اوخ ائدیب حلقینی شان شان ننه گلدیم
.
اوخ دگدی علی اصغری حالدان حالا سالدی
مظلوم آتانی ائتدی نوا خوان ننه گلدیم
.
عزم ائتدی وداع ایلیه اخیامی حسینیم
آغلاشدولا اخیامیده طفلان ننه گلدیم
.
چوخ زحمته آرام ائلدیم عورت اوشاقی
ئوپدیم قوریان لبلری جان جان ننه گلدیم
.
تل اوستینه جن اولدوم او مولایه جلودار
زینب نجه گور اولدی خروشان ننه گلدیم
.
جنگ ائتدی حسین من اونا تکبیر دییردیم
سسلردیم حسین اللره قربان ننه گلدیم
.
آخر یخلوب قتلگهه قانینه بائتدی
قاچدیم او چوخور یئرده شتابان ننه گلدیم
.
شمریله دوروب عرصه ده هنگامه اوجالدی
من باخدوم او نامرده هراسان ننه گلدیم
.
ایستردی کسه قارداشمون باشینی تندن
دوتدوم کسرین باغلانا پیمان ننه گلدیم
.
چوخ سعی ائلدیم قارداشمون کسمیه باشین
چارم کسلوب اولمادی امکان ننه گلدیم
.
دشمن توکولوب مقتله آرامیمی آلدی
کین اهلی ائدیب جسمینی عریان ننه گلدیم
.
اخیامه طرف حمله ائدیب لشگر کافر
اخیامیم اولوب اوددا فروزان ننه گلدیم
.
قاچدی بالالار دشت و بیابانه داغلدی
یغدوم اولاری باشیمه نالان ننه گلدیم
.
قولاریمیزه دوشدی بیزیم بند اسارت
قسمت اولوب آخر بیزه زندان ننه گلدیم
.
بیرشهر یکی بش ایل اولارا درس دئموشدوم
گِتدیم اورا من اوخشاما گویان ننه گلدیم
.
کول توکدوله باشلار میزه کوفه نین اهلی
شرم ایلمدی کوفه ده نسوان ننه گلدیم
.
داش وردی او مأواده حسین باشینه عورت
باش سندی آخوب صورتینه قان ننه گلدیم
.
من محمله وردیم باشیمی قانه بویاندوم
اولدوم یارالی باش کیمی الوان ننه گلدیم
.
باخدی منه باش کوفه لیلر شاید اوتانسون
سرنیزه ده تز باشلادی قرآن ننه گلدیم
.
مرجانه نین اوغلی بیزی زندانه سالوبدی
رحم ایلمدی زاده شیطان ننه گلدیم
.
اورداندا ننه شامه طرف بیز سفر اتدوک
ای کاش کی شام تِز اولا ویران ننه گلدیم
.
چوخ ظلمی بیزه شامیده کین اهلی ائدیبلر
ناظردی فقط قادر سبحان ننه گلدیم
.
ویرانه اولوب مسکن اولاد پیمبر
بو چرخ فلک اولمادی تالان ننه گلدیم
.
قالدوخ نچه مدتده او ویرانه مکاندا
لشگر منه اولموشدی یتیمان ننه گلدیم
.
ویرانه ده بیر غمزه لی جیرانیم ئولوبدی
او منزلی ایتمیشدی گلستان ننه گلدیم
.
جان ویردی رقیه منی حالدان حالا سالدی
اوللام اونا بودهریده مهمان ننه گلدیم
.
آزاد ائلدی قافله نی زاده سفیان
یثربده ائدم سینه می سوزان ننه گلدیم
.
سن بیل ننه اوز عصمتووه اصغره خاطر
غملیده گزور دردینه درمان ننه گلدیم
.
قسمت ائله تا اوغلوا زوار اولا بیلسون
چوخداندی ملیر دیده سی گریان ننه گلدیم
.
.
#ورود_مدینه_علی_نعمت_زاده
#گوردوم_نچه_مدت_غم_هجران_ننه_گلدیم
#ترکی
.
✍️ #زبدةالاشعار ✍️
.
🆔: @nohe_torki
نظر دهید