زبانحال امام حسین (ع) به خدا
بعد از شهادت علی اکبر (ع)
.
✍️ #زبدةالاشعار ✍️
.
🆔: @nohe_torki
.
مرحوم ماهر
.
ای خدا اؤزون شاهد اول بو گون
دوغرانوب علی اکبریم منیم
مرتضی باشی تک قلجلانوب
فرق مصطفی منظریم منیم
.
.
.
ضعف ایدوب دوشوب اختیاریدن
سرنگون اولوب سرو قامتی
شدت عطش، تابش گونش
پیکرینده وار چوخ جراحتی
زخمدار اولوب رأس اطیبی
قانی چوخ آخوب یوخدی طاقتی
جان نثار ایدوب شوق و ذوقیله
تشنه لب مه انوریم منیم
.
.
.
بسکه اوخ وروب جسم پاکینه
ظلم الیله بو اشقیای شام
شبه مصطفی نعشی دوغرانوب
بند بندیدن آیریلوب تمام
ایلدوقجه من حالینه نظر
حالیمی ایدر حالی تلخکام
بحر تک گلور موجه غملریم
اودلانور دل مضطریم منیم
.
.
.
گیدوروب کفن سرو قدینه
یولادیم بونی کار زاره من
ایمدی بس نجه خاک و خونیده
نعشنی گوروم پاره پاره من
وار یری اگر ناله ایلیم
حشره دین گلم آه و زاره من
صبریمی آلوب هجری اکبرون
موج ایدوب هامی غملریم منیم
.
.
.
هانسی بیر آتا اوغلونی خدا
تاب ایدر گوره یرده زیب خاک
تیغ خنجر و تیریله بیله
جسم اطیبی اولسا چاک چاک
من سنه فدا ایتدیم اکبری
شاهد اول بو قوم ایلدی هلاک
ایله سن قبول اکبری اگر
وار تفاخری اکبریم منیم
.
.
.
مظهر رخ اشرف رُسل
خلق و خلقده مصطفادی بو
هم آنامدی هم جدّ اطهریم
شبه صولت مرتضادی بو
جان ویروب سوسوز بو دیاریده
ای خدا سنه بیر فدادی بو
ترک جان ایدوب باش و جانیله
درگهونده بو یاوریم منیم
.
.
.
ایتمشم بونی من فدا ولی
اهل شام ایدوب ظلمنی بروز
چوللره آخوب بحر تک فرات
اکبری بو قوم ئولدوروب سوسوز
خیمه گاهیده گوزلوری یولون
باجیسی چکر آه سینه سوز
نالیه گلوب آغلاشور تمام
اهلبیت غم پروریم منیم
.
.
.
جدّیمه زبس چوخ شبیهیدی
بو جوانیمون هر علامتی
ایمدی سرو تک من گورنمرم
سرنگون بیله سرو قامتی
قلبیم اود دوتوب اودلانور منیم
صبریمی آلوب چوخ بو حالتی
تیترری دیزیم گلموری بلیم
دوغرانوب بو مه پیکریم منیم
.
.
.
هم شبیهیدی جدّیمه منیم
هم آتامیدی بو جوان منه
ئلدوروب بونی تشنه لب بو گون
ایتدی ظلم بو کوفیان منه
گیتدی اکبریم الدن ای خدا
صعب اولور یقین روح و جان منه
دویموشام داخی من بو جانیدن
خنجر آختارور حنجریم منیم
.
.
.
«ماهرم » شها درگھونده من
آغلارام سنه با فغان و آه
کافی دور منه روز حشریده
لطف اوزیله بیر ایلسن نگاه
صبح و شامده ماه و سالیده
ذاکرم سنه ایسته سن گواه
یازمیشام زبس نوحه یا حسین
سربسر دولوب دفتریم منیم
.
.
.
.
.
#اکبریه_ماهر
#اکبریه_شهادت
#ای_خدا_اؤزون_شاهد_اول_بو_گون_دوغرانوب_علی_اکبریم_منیم
#ترکی
.
✍️ #زبدةالاشعار ✍️
.
🆔: @nohe_torki
نظر دهید