زبانحال جناب زینب کبری (س) در مصیبت حضرت فاطمه زهرا (س)
.
.
مرحوم صحاف تبریزی
.
.
ای خوش گونه زمانه ده حسرت قالان آنا
بار غمیله قامتی خم باغرى قان آنا
.
سالدوقجا یاده غملرون آرتار مصیبتم
ایلر ئولونجه زینبون آه و فغان آنا
.
گولمز زمانه ده آناسیز قزلارون یوزی
بو رسم روزگار دور ای مهربان آنا
.
سندن صورا محالدی بیر آن یوزوم گوله
هیهات بیرده قلبیم اولا شادمان آنا
.
نسگلرون قیامته جان یاندورور منی
بی اختیار اولور یوزه اشگیم روان آنا
.
قویدون فنا جهانه او گوندن که سن قدم
اولدون خدنگ محنت و درده نشان آنا
.
اون سگّیز ایل جهاندا مصیبتله عمر ایدوب
آسوده غمدن اولمادی قلبون بیر آن آنا
.
أوچگونلریله آج قالوب عالمده دردوی
حتّى آتام علیدن ایدردون نهان آنا
.
مزدور اولوب یهودیه ال داشی چکماقون
سرمایۀ بُکادی منه هر زمان آنا
.
دائم خیال وصلۀ چادر شبونله من
یانّام شرارۀ غمه تا وار جهان آنا
.
سالم وجودیله سنى تاپشوردی امّته
رحلت ایدنده خاتم پیغمبران آنا
.
أوچ گون گچینجه ساخلامادی حرمتون سنون
اونلار ایدن جفا و ستمدن امان آنا
.
یاندی قاپون سنوبدی قولون ئولدى محسنون
اوج ایتدی عرشه آه نهانون عیان آنا
.
زلفون آغاردی خاطرون اودلاندی غصه دن
غمدن کشیده قامتون اولدی کمان آنا
.
رحلت ایدنده دار فنادن بقایه سن
پهلو شکسته ایلدون عزم جنان آنا
.
قالدی یرونده نائبه بیچاره زینبون
درد و غم فراقویله مو کنان آنا
.
سندن صورا بلالی باشیم چوخ بلا چکر
یوخدور دلیمده شرحینه تاب و توان آنا
.
باشدان قلجلانور باشی اوز قانینه باتار
ظلمیله سجده گهده شه مؤمنان آنا
.
مظلوم اولور گوزوم ایشقی قارداشیم حسن
زهر جفائیله ویرور آخرده جان آنا
.
بو سوگلون حسینی که نازیله بسلدون
سیننده صبح و شام اونا ویردون مکان آنا
.
مهمان آدیله کرب و بلایه مدینه دن
چوخ نامه لر یازوب آپارور کوفیان آنا
.
اوّلده سو یولین یوزینه باغلار اشقیا
عطشان قالور عیال شه انس و جان آنا
.
منده سنی بو گون او گونه دعوت ایلورم
یعنی ویرن گون اوغلون حسین امتحان آنا
.
آتدان یره یخاندا یارالی حسینوی
واردور یری یره توکوله آسمان آنا
.
ایلر هجوم او شاهه اوتوز مین قوشون هامی
الده خدنگ و خنجر و تیغ و سنان آنا
.
ایله لَّه لحم و عظمنی ممزوج بیر بیره
غمدن گلولّه ضجّیه کرّوبیان آنا
.
محبوب ذات خالق عالم حسینوه
آد خارجى قویالّا او گون شامیان آنا
.
دوغرالّا قطعه قطعه سوسوز نوجوانلارین
قان یاش توکر او حالینه قدّوسیان آنا
.
شمر لعین کسنده قفادن سوسوز باشین
باشی آچوق گلور یره لاهوتیان آنا
.
کرب و بلادن اوج ایدر افلاکه غلغله
ایلر تزلزل عرش حق مستعان آنا
.
قرآن اوخور جداده یارالی کسوک باشی
ای کاش او گون خراب اولا کون و مکان آنا
.
بی رحم اشقیا توکلور خیمگاهینه
غارت الین آچار بیزه شمر و سنان آنا
.
بیر نحویله سویالّا حیالی حرملری
باشدا قالور نه معجر و نه سایبان آنا
.
قول باغلى دستگیر اولى شمره مخدّرات
اولماز او گونده حالیمیزه بیر یانان آنا
.
غش ایله سن ایشیدسن اگر بو مصیبتی
ایتدی نه ظلم حسین الینه ساربان آنا
.
«صحّافه» لطف اوزیله اوزون ایله بیر نظر
بو غم فزا غمی ایده شرح و بیان آنا
.
پیک اجل گلنده باشی اوسته سنده گل
آخر نفسده ویر نفس اول همزبان آنا
.
.
#فاطمیه #صحاف_تبریزی #فاطمیه_شهادت #ترکی #زبدةالاشعار
نظر دهید