زبانحال حضرت زهرا (س) با حضرت علی (ع)
.
.
مرحوم شعاع تبریزی
.
.
ای سرّ یاره محرم اسرار عم اوغلی جان
گل قالدى برده محشره دیدار عم اوغلی جان
.
گل باشیم آل دیز اوسته بیر آز درد دل ایداخ
ای دردمند و مضطره غمخوار عم اوغلی جان
.
چوخ حسرتیله باخما منه پوزما حالوی
حالون پوزولسا سینمى داغلار عم اوغلی جان
قوی گوز یاشون سیلوم باخور اطفالیم آغلاما
سن آغلاسان بالالاریم آغلار عم اوغلی جان
.
سن آغلاما که آغلاماقون حالیمی پوزور
قوی آغلاسون سنه بو دل افکار عم اوغلی جان
.
زهرادن آرتق اولدی سنون نسگلون یقین
نسگللرون اودی بو قلبیمی اودلار عم اوغلی جان
گر داغلارا گلیدى یقین غملرون سنین
داغلار اریردی ای شه ابرار عم اوغلی جان
.
مظلوم اولموسان سنه قربان اولوم اؤزوم
غصب ایلیوبدی حقّووی اشرار عم اوغلی جان
.
قویدی یتیم بالالاریمی ایمدیدن منیم
جور و جفای ثانی بی عار عم اوغلی جان
.
یاندی قاپوم قابورقالاریم سندی دینمدیم
دؤزدوم دیدیم دیسم غمون آرتار عم اوغلی جان
.
سقط اولدی درگهیم یاناندا بالام سهلدور منه
بیر یاره ووردی دشمن غدّار عم اوغلی جان
.
ال ظلمی دل یاراسی ایاق ظلمی ایلدی
روشن گونی گوزومده شب تار عم اوغلی جان
.
بو قدر وار قاپو دالسندا قالاندا من
آغلاردی حالیمه در و دیوار عم اوغلی جان
.
آلدى توان و طاقت و صبر و قراریمی
سینمده کی جراحت مسمار عم اوغلی جان
.
پهلوده زخم خنجری یوزده ال آیتین
گیزلتدیم ایتمدیم سنه اظهار عم اوغلی جان
.
گور اجنبی الی هارا زهرا یوزی هارا
او ظلمودن اثر یوزومده گینه وار عم اوغلی جان
.
گرچه بو ظلملر منی دلدن سالوب ولی
بیر اوزگه درد ایدوب منی بیمار عم اوغلی جان
.
ثانی او گون که آلدى الیمدن قباله می
ووردی یخیلدیم ایتدی منی خوار عم اوغلی جان
.
نامحرم ایچره دوشدی باشمدان عبا یره
سولدی او غمدن عارض گلنار عم اوغلی جان
.
بو دردی حلّ ایلیه بلمزدی فاطمه
باشی آچیق گوره اونی اغیار عم اوغلی جان
.
بیر سونمز اود ، ستمله سالوب تار عمرومی
یاندیردی قیردی ایتدی تلف نار عم اوغلی جان
.
نه چکمیشم باشیم آچلاندا اونی یقین
اهل حجاب اولان بولر آنلار عم اوغلی جان
.
زهرانی سر برهنه گورمه دی بیر لحظه عمروده
نه آی نه گون نه گنبد دوّار عم اوغلی جان
.
اولدی او درد عمده سبب مرگیمه منیم
یغمایه گئتدی عمر ثمن بار عم اوغلی جان
.
زهرایه خاطر اولما رضا خوار اولا شعاع
من اولمار ام رضا ایتیم قالا ناچار عم اوغلی جان
.
.
#فاطمیه #شعاع_تبریزی #فاطمیه_شهادت #ترکی #زبدةالاشعار
نظر دهید