در اوصاف و میلاد و مظلومیّت کریم اهلبیت حضرت امام حسن مجتبی (ع)
.
.
.
ستار رزاقی تبریزی
.
ای مَعدن کَرامت و عشق وصَفا حسن
وی بَحر استقامت و حِلم و سَخا حسن
.
ای آدلانان جهاندا کَریم اَهلبیتیدن
هر دردمند و سائله مُشگل گُشا حسن
.
ای حُجّت و وَلی خداوند ذوالجَلال
وی جاده حَقیقته نور هُدا حسن
.
ای نور چشم فاطمه دلبند مُصطفا
وی یادگار اَرشد شیر خُدا حسن
.
ای پادشاه کشور دل هادی بَشر
وی مُقتدا و سرور اهل وَلا حسن
.
سِبط نَبیّ و زاده زهرا و مُرتضا
آرام جان پادشه کربلا حسن
.
ای جلوه جمالی سالان عالمه شَفَق
رَشگ ایلییَن جمالینه بَدرُالدُّجا حسن
.
ماه صیامین اون بِشی دنیا ایشقلانوب
نور جَمالیویله چو شَمسُ الضُّحا حسن
.
خُلقا حَسَن،خِصال حَسَن،صورتون حَسن
خَلق ایلیوبدی حَق سنی اَلحَق خدا حَسن
.
بَنزَردی مُصطفایه جمالون، گورن دئیوب
گورنه گوزلدی چون باباسی مُصطَفا حَسن
.
دویمازدی کیم باخیدی دل آرا جَمالیوه
خلّاقیوه دئیَردی اولا مَرحَبا حسن
.
اَهل کَرم کَرامتیوه گوز تیکوب تمام
صُبح و مَسا ایدولّه سَنه اِلتجا حسن
.
چون سَن کریم اوغلی کریمُ الکِرامسَن
آچموش قاپوندا اَل اودی شاه و گَدا حسن
.
بیر کیمسه نا امید قاپوزدان قییدمیوب
چون ایتمیسوز او کیمسه نی حاجَت رَوا حَسن
.
هَر دَردمَند دَردینه اولدون ائوزون طَبیب
اُئوز دَردیوه تاپیلمادی لاکن دَوا حسن
.
صَبر ایلدون همیشه مُصیبات عالمه
اولدون تمام عُمر قَضایه رضا حسن
.
صُلحی بَقای دینه گوره ایلدون قَبول
گوردون رضای حَقدن اوتور اِبتلا حسن
.
اولدی بو ایش قیام حُسینه مقدّمه
ایجاده گلدی واقعه کَربلا حسن
.
سَن حَق دیدون بیر عده لَر امّا عِناد اِیدوب
تَک قویدولار سَنی ،دیدیلر نارَوا حسن
.
تا دوندَروبدی چَرخ دَنی سَنله گَردشون
دُنیانی تَنگ ایدوبدی سَنه اَشقیا حَسَن
.
ایمانلارین ساتوبدیلا دینارو درهمه
دُنیایه خاطر اولدولا حَقدن جُدا حسن
.
سَن تَک امامی قویدولا یالقیز سپاهسیز
یولدان چیخوب اولوبلا سَنه بی وفا حسن
.
اولدون غَریب و بیکس و تَنها مدینه ده
قالدون تمام عَرصه ده بی اَقربا حسن
.
باغلاندی دست کینیله دست کرامتون
ویرموبدی اَهل کین سَنه قَدر و بَها حَسَن
.
هَر غم گَلوبدی صَبر ایلَدون خون دل یِدون
اولدی ایشون زمانه ده آه و نَوا حسن
.
صَبر و تَحَمّلون اِلَدی صَبری بی قرار
ایچدیردی عاقبت سَنه جام بَلا حسن
.
چَکدون نَلَر فَراز و نَشیب زَمانه دَن
اولدون هَمیشه دَرد و غَمه مُبتلا حسن
.
مَعلومیدور بَصیرت اَگر کیمده اولماسا
هَر عَصریده امامینی ایلر رَها حسن
.
لُطف اِیت بیزه کُمَکلیق ایله تا بو عرصَه ده
دائم اولاق وَظیفه میزه آشنا حسن
.
روز ولادتوندی گَلیبدور مُحبّلَر
اَل سینه ده بو بَزمیده سَسلوله یا حسن
.
رزّاقی دا قویوبدی یوزون آستانیوه
ایستور گوره بو جَمعیله سَندَن عَطا حسن
.
ایسته خُدای حَق بیزی نومید ایتمَسین
تا اِستجابَته یِته بیزدَن دُعا حسن
.
.
#حسنیه_مدح #حسنیه_میلادیه #حسنیه #ستار_رزاقی
#ای_معدن_کرامت_و_عشق_و_صفا_حسن
#ترکی
.
.
نظر دهید