شهادت حضرت مسلم (ع)
..
..
#سبک_ای_شاه_مظلومان_حسین (5 سبک …. سینه و زنجیر و … )
مشابه
..
..
مرحوم محمدتقی فرهادی تبریزی (غمناک)
..
..
ای چرخ کج رفتار عجب ایتدون سن اؤز ظلمون عیان
قیلدون جناب مسلمی گور بیر نجه بی خانمان
غربتده یالقوز ویردی جان
..
..
آل رسولیله فلک سن گلمدون بیر سازگار
ایتدون ملال و غصه و غمدن همیشه دل فکار
اوز خانمانیندن دوشوب آیری تماماً هر نه وار
حسرتله غربت ئولکه ده بی کس قالوب ویردیله جان
..
..
بیر نوعیله تا هر بیری اولدی وطندن بی نصیب
جمله ویروب غربت ده جان یالقوز نه یار و نه حبیب
اولموبدور اما هیچ بیری عالمده مسلم تک غریب
منزل غریب ئولکه غریب بی کس قالوب آغلاردی قان
..
..
کوفه ایچینده مسلمون امرى یتیشدى بیر یره
یالقوز قالوب کسدی هامی چیخدی فغانی گوگلره
سندیردی بیعت کوفیان دشمن اولوب اول سروره
کثرت ایدوبلر قتلینه کلاً چکوب تیغ و سنان
..
..
چون بو خبر یتدی اونا تغییر تاپدی حالتی
بیلدى یتوبدور آخره عمری کسیلدی طاقتی
گلمیش اجل قاصدلری ویرسون پیام رحلتی
گسون گرک بزم وصال یاره مهمان اُول زمان
..
..
طوعه ایویندن دیشره چون اول بی کس نالان اولوب
برج اسددن گوئیا ظاهر خور رخشان اولوب
اول قومه موسی قومی تک بیر آیت نیران اولوب
برق قلینجی دشمنه اولدی بلای ناگهان
..
..
جان عدویه بیر شرر سالدی که گوزلر گورمیوب
لشکر ایتوردی اؤز اؤزین بیر کس اؤزینی بیلمیوب
دوشدی هامی خوفه قاچوب هیچکس قباقدا دورمیوب
باد خزان تک هر کسه یتدی ایدوب عمرین خزان
..
..
پی در پی اهل کوفه نون اما گلوردی یاوری
یالقوزلوقین یاده سالوب آرتوب او دمده غملری
دوندی مدینه سمتینه باخدی یاشالدی گوزلری
سسلندی بیر گل یاحسین هاردا قالوبسان الأمان
..
..
تنگه دوشوب ایندی ایشیم یوخ بیر پناهیم یاحسین
دشمن فزون نه بیر کومک نه دادخواهیم یاحسین
گل گور نجه عرشه چیخار افغان و آهیم یاحسین
یالقوزلیوبلار کوفه ده من بی کسی بو کوفیان
..
..
القصه بس که فرقۀ اشراریلن ایلوبدی جنگ
بیحد دگوب گل جسمینه زخم سنان هم خدنگ
صدپاره اولدی پیکری قانیله اولدی لاله رنگ
قان چشمه چشمه جوش ایدوب اولدی یاراسیندان روان
..
..
اثنای دعواده اونا بیر داش آتوب بیر بیحیا
دگدی جبینیندن او داش قان آخماقا قویدی بنا
شقّ القمر سرّی اولوب قانلو جینیندن نما
مِثل و بِلا مثلی اولوب تا ظاهراً حیدر نشان
..
..
آخدی جینیندن او دم قانی بویاندی رنگ رو
کیپریک لرینده شدّۀ مرجان کیمی قان مو به مو
یتدی او حالتده ویروب تا بیر قلج بیر کینه جو
دگدی دیشیندن دیشلری سندی دولوب آغزینه قان
..
..
باطنده قلبینده بو سوز ایندى مقام حقّدور
یا مصطفی مسلم سنه هرباره ده ملحقّ دور
دندانیمون سینماقلوقی سندن منه سرمشق دور
بیر وجهی اولدوم وارثون وار منده تاب امتحان
..
..
ضرب جراحت دن ولی قالموبدو اول سرورده تاب
گون ایسی سی لب تشنه لوق اولدی سوسوزدان دل کباب
تا ایتدی اظهار عطش گتدی بیری بیر کاسه آب
ایستوب ایچه اولموب اونا قسمت او سو آخر زمان
..
..
چون آغزینه آلدی سوئی ممزوج اولدی قانیلن
دردانه سی تک دیشلری دوشدی سویا افغانیلن
دندان گوهر مشربی همرنگ اولوب مرجانیلن
کان عقیق لعل اولوب قانیله یاقوت دهان
..
..
«غمناک» اگر مسلم اؤزین وارث ایدوب پیغمبره
سنده تولّا ایت گیلن بو غده آل حیدره
گوز یاشی توک آغلا بوگون بو سرور بی یاوره
واجب سنه اولسون جنان مونس لرون حور جنان
..
..
..
#مسلمیه #غمناک_تبریزی #ترکی #زبدةالاشعار
نظر دهید