ای کلام الله ناطق نطقوه قربان حسین #کوفه_عدلی_تبریزی

کوفه و راه شام
.
.
حاج اصغر فرشچی (عدلی تبریزی)
.
.
ای کلام الله ناطق نطقوه قربان حسین
گویلونی آل زینبون بیرده اوخی قرآن حسین
.
.
زینبون اولسون فدا قارداش لب عطشانیوه
ام حَسبتَ سسلنن خوش لحنیوه قرانیوه
هم مرام و دینوه هم قوّه ایمانیوه
حیرته داودی سالموش نطق خوش الحان حسین
.
.
سن فراز نیزده عرش اوسته کامه چاتموسان
دین حق اوستونده دنیا ماسوانی آتموسان
واردی کول آثاری یوخسا کول لر اوسته یاتموسان
کول دوتوبدور مه جمالون باغریم اولدی قان حسین
.
.
نیزده ای ماه زینب گوهر کنز ولا
ای اولان چشم و دِله خاک رُخی چون توتیا
سن دانش گویلوم آچیلسون لطفوه جانیم فدا
ظلموده بو قوم کافر ایلوری طغیان حسین
.
.
وارتعجّب اهل کفره بو باشون قرآن اوخور
باش نه باش ساطعدی نوری بویری ایلوبدی طور
حیف اولا قارداش یوزونده واردی آثار تنور
جسم پاکون قالدی چولده بیکفن عریان حسین
.
.
بیر نظر قیل زینبه گلمز غمیم قارداش سانا
وار کول آثاری یوزونده دوندرور قلبی قانا
بیر باخوش باخسان بسیمدی قویماسان قلبیم یانا
مونسیم سنسن بو چولده ایت منه احسان حسین
.
.
دوتدون عمرونده مقّدم عهدیوی ایمانیوی
اگمدون دونانه باش سندیرمادون پیمانیوی
ظلم الیله کسدیلر باشون توکوبلر قانیوی
قانه باتدون تا آیولسون ملت دوران حسین
.
.
سن شهید اولدون بو دینه اهل دین آگاه اولا
عاشق جانان اولان لازمدی خاطر خواه اولا
ظلم ایدن اللر گرکدی دینیدن کوتاه اولا
سینه وه دوزدون اوخی سر نیزه و پیکان حسین
.
.
عشق جانان اوسته جانون دینه قربان ایلدون
عشقوین اندازه سین دنیایه اعلان ایلدون
اولدون اما درد دینه لیک درمان ایلدون
قویمادون غاصب لری دینه اولا سلطان حسین
.
.
انقلابینده مرام خاص وار معلوم دور
ظلم ایدوب هرکیم جهاندا حکم اولا محکوم دور
هر بنا ظلمیله قاخسا عاقبت معدوم دور
سن بنای ظلمی ایتدون تا قالا ویران حسین
.
.
دشمن دینون بولوردون وار خیانت پیشه سی
قان ایچه لازمدی گوردون نخل دینون ریشه سی
سنگ ظلمه باخمادون قارداش سنار جان شیشه سی
دین و اسلامی بو قانون ایتدی جاویدان حسین
.
.
دینون استقلالینه شش ماهه اصغر ویرموسن
اکبرون تک نوجوان شبه پیمبر ویرموسن
اوچ جوان قارداش بالاسی دورت برادر ویرموسن
هربیری دین گو لشنونده بیر گل رضوان حسین
.
.
بیر گولون واردی دوشر گلزاریده گل رشگینه
قولارین دشمن سالاندا قان قاروشدی اشگینه
نا امید اولدی دگنده اوخ اونون سو مشگینه
باشنی بولمم عدو هاردا ایدوب پنهان حسین
.
.
بیر گلون وار نیزده ممتازلر ممتازیدی
هنگ عشقه آلتی آیلیق جان فدا سربازیدی
تشنه لب اوچ شعبه پیکانی امن جانبازیدی
بحر عشق ایچره اولان بیرگوهر رخشان حسین
.
.
کفریله سالموش بوکوفه اهلی ظلمت سایه سی
آدلاری مسلم ولی اسلامه خفّت مایه سی
نطقیمیله من یتورّم یوخدی ظلمون پایه سی
خلقه آندورّام مرامون واردی تا امکان حسین
.

اصل نهضت مذهبی لازمدی من اظهار ایدم
جام جهلین مستنی بوکوفه ده هوشیار ایدم
آتشین گفتاریلن یاتموشلاری بیدار ایدم
باخماسونلارکوفه اهلی زینبم گریان حسین
.
.
بنزوری سر نیزده باشون گوزل بیر اختره
سن منای عشقیده قربان اولوبسان اکبره
نوکروزدی #عدلی قارداش ثبت نام ایت دفتره
اللی ایلدی غملرونده ایلوری افغان حسین
.
.
.
#کوفه
#راه_شام
#ای_کلام_الله_ناطق_نطقوه_قربان_حسین
#عدلی_تبریزی #راه_شام_عدلی_تبریزی
#ترکی
#زبدةالاشعار