معجزه حضرت رقیّه (س)
.
✍️ زبدة الاشعار ✍️
.
?: @nohe_torki
.
مرحوم معزی اردبیلی
.
.
کیمدی دردانه رقیّه گل زیبای حسین
بنذیوب فاطمیه ماه دل آرای حسین
عالی اجلالینه فخر ایتدی صبایای حسین
دردمندانینه هر دوره دواخانه سی وار
شهر شاماتیده امراضه شفاخانه شی وار
.
.
چاریه محضر پر نورینه بیچاره گیدور
یتیشن مطلبه الده ایکی گوشواره گیدور
قویولا قبرینون اطرافینه گهواره گیدور
شیعه لر مرقدینه تازه ضریحی آپارور
یتیشوب مقصده قالیچه مسیحی آپارور
.
.
زن مغمومه مسیحی واریمیش لبناندا
فلجیمیش قیری اوچ یاشدا همان دوراندا
آپارور حاذق اَطِبّا واریمیش هریاندا
یانمیور بیرگون اونون خانه بختینده سراج
تاپا بیلمور قیزنون دردینه لبناندا علاج
.
.
عرض ائدور رحم ائله ای خالق یکتا بالاما
تنگ اولوب کشور لبنانیده دنیا بالاما
شامه من عازم اولوم باخسون اَطِبّا بالاما
اوستومه بادمخالف اسیلوب هریردن
بیلوسن یارب علا جیم کسیلوب هریردن
.
.
عزم ائدورکشورسورییه مأیوسانه
هرباخاندا قیزینا دلده گلوب افغانه
شام شهرینده گئدوب دوتدی مسافرخانه
دربدر قوش کیمی تاپدی اودا مأوا اوزونه
گورسنوردی حرم پاک رقیّه گوزونه
.
.
بیرگونی گوردی عزا بزم لری برپادی
بیرنفردن خبرآلدی نه ئولوب غوغادی
دئدی قاره چکلوب گوگلره عاشورادی
شامیده باشه هرایل قاره میزی باغلیاروق
دهم ماه عزا سینه ویروب آغلیاروق
.
.
خوردا قبرایچره یاتان صفرۀ عصمت دوزیدی
نام زیباسی رقیّه اَدبون اولدوزیدی
باباسی خاتم مُرسلدی حسینون قیزیدی
باغلیوب قاره سنی باشه قراباشدا ئولوب
ویریلوب دل یاراسی شامیده اوچ یاشدا ئولوب
.
.
زن نصرانی همان گون اَلی قوینوندا دوروب
قییدوب منزله فکرعالمی غم بزمی قوروب
قیزی منزلده قویوبدور قاپیا قفل ویروب
گَلدی صحنه گِنه اللّههَ توکل ائلدی
دختر شاه لب عطشانه توسل ائلدی
.
.
دئدی ای شمس حیا خیر دعا وئر بالاما
یولاما آیری اَطِبّایه دوا وئر بالاما
گلمیشم درگهیوه منده شفا وئر بالاما
آستانوندا دوران عیسوی زوّاروه باخ
دام محنتده فلج خورداجا بیماروه باخ
.
.
الغرض عیسوی عورت اوقدراشک الیوب
یوزونی اشک عزائیله سراسر بلیوب
قلب مهجوری حرمده سیخیلوب غش ائلیوب
حالت غشیده سس گلدی شفا تاپدی بالون
خیری اولسون او چتین در ده دوا تاپدی بالون
.
.
غشّیدن حاله گلوب دور دی یریندن ایاقا
یوزگوزی گولدی گوروب خیری چیخوبدور قاباقا
منزله ساری گلوب وارد اولوبدور اُطاقا
ایوده ناخوش قیزینی صاف و سلامت گوردی
شامده اصل طبیبیدن عنایت گوردی
.
.
چکدی آغوشه بالاسین اورگی تاپدی صفا
دئدی ای روح و روانیم سنه کیم وئردی شفا
قیز دئدی اوندا که سن منزلی ترک ائتدون آنا
عرشۀ بختیمه سیرینده بیر اولدوزگلدی
ناگهان منزیلیمه خورداجا بیر قیز گلدی
.
.
حرکت وئردی اطاقدا گُله بنزر دوداقا
گوستروب مهر و وفا شامیده ناخوش قوناقا
دئدی دور یاتما دئدیم من دورا بیلمم اَیاقا
یوزومه اِئتدی اُطاقیمده طبیبانه نگاه
یِرییرسن دئدی اوّلده دئسون بسم الله
.
.
گل سنی معجزه دن آی ننه اگاه ائلییم
الینی چکدی ایاقلاریمه دوردوم یریدیم
تئز ایاقینه دوشندیم ائوین آباد دئدیم
دئدیم آدون ندور ای کعبه عزّت حاجیسی
دئدی آدیمدی رقیّه علی اکبر باجیسی
.
.
نه رقیه آنا سالارشهیدان بالاسی
گورمه لی بیرخانمیدی منه گَلسون قاداسی
قند تک هر سوزی شیرین یوزی بیر آی پاراسی
سن گلنده دئدی من گِئتدیم او فرخنده مقام
مندن امّا یتوررسن آنووا چوخلی سلام
.
.
نه رقیه لقبی گوهر عصمت محکی
خبره سی اولسا آلار بیرباخیشی نُه فلکی
قویوب حیرتده گوزلیکده جناندا ملکی
شیعه سی اولسون هاچان جام شرفدن دویاسان
دوندریب آدیمی لبناندا رقیه قویاسان
.
.
دین اسلامه گلوب عورت پاکیزه خصال
اولدی عُقباده اودا صاحبۀ شأن و جلال
گلدی بازاره خرید اِیلمگه دلده ملال
دولانوب هم ئوزینه هم قیزینا قاره آلوب
هم رقیّه آدینا خورداجا گوشواره آلوب
.
.
ترک ائدوب کوچه و بازاری گلوبلر اطاقا
بوکدولر اوزلرینی قاریه باشدان ایاقا
آنا گلدی دیله گوشواروی سالما قولاقا
چون طبیبون دوولوب قلبی ملالیله دولوب
باباسیندان سورا گوشواره لری غارت اولوب
.
.
الغرض چیخدی اطاقیندن ایکی محترمه
اولدولار زایر اوگون منبع لطف وکرمه
اوخویوب اذن دخولی یتوشوبلر حرمه
خانیمون خورداجا قبری ساتاشوب گوزلرینه
سیل اشگی اولارون گوزدن آخوب یوزلرینه
.
.
بالیا دوتدی یوزین گلدی آناسی سخنه
دئدی قبرایچره یاتان قیزدی شفا وئردی سنه
چالمیوب عمه سی چوخ لای لای او وجه الحسنه
خوشدی آغوشوه سن خورداجا قبری آلاسان
عوضیمده اوشیرین دیل قیزا لای لای چالاسان
.
.
آناسیلان بالاسی ایله دیلرترک رواق
حرمون آیچره نوائیلن اولار آتدی ایاق
قیزضریحی آلوب آغوشه اوپه قویدی دوداق
عرض ائدوب قبریوه قربان اولوم ای حوریّه
دولتوندندی بهشت اولدی منه سوریّه
.
.
ای حسین بن علینون یوزی گویچک بالاسی
جان وئرنده ملیین باشینون اوسته آناسی
فلجیدیم ویریلاردی منه چوخ دیل یاراسی
آری نصرانیه ده مرحمتون شامل اولار
قابل انسانون عطاسی اوزی تک قابل اولار
.
.
لایلای ای شاه وگدا صحن و رواقیندن اوپن
لایلای ای منتّیلن حوری ایاقیندن اوپن
لایلای ای عمّه سی یولاردا دوداقیندن اوپن
لایلای ای تیرمحن قلبینی اوچ یاشدا بولن
لایلای ای شامیده زنداندا گوزی یولدا ئولن
.
.
لایلای ای داغ داشا چوللرده صداسی یاییلان
لابلای ای غمزده قیزلاردا غمی باش ساییلان
لابلای ای شمری گورنده یوخودان تز آییلان
لابلای ای چشم پر آبینه دوشن قانلی لکه
لابلای ای غملری تأثیر ایدن حور و ملکه
.
#حضرت_رقیه_مدح
#حضرت_رقیه_شهادت
#کیمدی_دردانه_رقیه_گل_زیبای_حسین
#معزی_اردبیلی
#ترکی
.
✍️ #زبدةالاشعار✍️
.
?: @nohe_torki
نظر دهید