ای گلستاندا اوز گلینی آختاران باجی #کوچ_کربلا_شهاب_تبریزی

کوچ از قتلگاه
سوال و جواب
..
زبانحال حضرت زینب (س) از مرحوم #کهنمویی و مرحوم #رجایی_تبریزی
#اورک_غمین_دیماقا_بیر_یانان_دل_آختاریرام
..
زبانحال امام از مرحوم #کهنمویی
#آنام_باجی_گورورم_بیر_یانان_دل_آختاروسان
..
زبانحال امام از مرحوم #شهاب_تبریزی
#ای_گلستاندا_اوز_گلینی_آختاران_باجی
..
..
..
..
مرحوم شهاب تبریزی
..
..
..
ای گلستاندا اوز گُلینی آختاران باجی
حیران دولانما چوللری ای مهربان باجی
.
گَل چک کناره اوخلاری ، نیزه سینقلارین
گور جسمیمی نه حاله سالوب کوفیان باجی
.
آهسته آل کناریوه باشسیز جنازه می
تا سرگذشتیمی سنه ایلوم بیان باجی
.
شمرِ لعین که سوسوز کسدی باشیمی
اولدی زمینه سو کیمی قانیم روان باجی
.
بیر بیر لباسیمی بدنیمدن چیخاتدیلار
بیر پیرهنده قویمادیلار شامیان باجی
.
قالموردی بیر زادیم داخی بجدل گلن زمان
عور ایلمیشدی جسمیمی شمر و سَنان باجی
.
گلمیشدی بیر امیدیله مأیوس ائدنمدیم
انگشتریمی بجدله ویردیم نشان باجی
.
معذورسن بو باره ده تک قویموسان منی
سندن گلایه ایتمرم ای باغریقان باجی
.
بولدوم فراغتون یوخوموش بو گئچن گئجه
اولموشدون اهل بیته اوزون پاسبان باجی
.
فکر ایلمه که یالقوزودوم قتلگاهده
اولدی نچه نفر منی یاده سالان باجی
.
ائتدی وفا ایتورمدی عالَمده حقّیمی
گلدی گئچن گئجه یانیما ساربان باجی
.
بیر ظلم قیلدی سالدی سماواته غُلغله
فریاده گلدی ، هوله دوشوب قدسیان باجی
.
جدّیم ، آتام ، آنام ، او زمان قارداشیم حسن
سَروَقتیمه یتیشدیله ناله کُنان باجی
.
قویسون آنام یوزین یوزومه اولمادی باشیم
گئتمیشدی کوفیه گجه نی میهمان باجی
.
جدّیم محاسنین ، آغاران ساچلارین آنام
ائتدیله قانمیله خضاب اُول زمان باجی
.
بیرده یارالی باشیمی زهرا سراغ ائدوب
یوز قویدی کوفه جانبینه موکَنان باجی
.
خولی ائوینده تاپدی کول اوستونده باشیمی
چوخ آغلیوب چوخ ایلدی آه و فغان باجی
.
کامه یتیشمسون گوروم عالمده خولینی
وئرمیشدی باشیمه بو گجه بیر مکان باجی
.
لایق دَگیلدی فاطمه گئتسون ایله یره
شرمنده ایلدی منی اول میزبان باجی
.
خولی ائوینده ائتدی باشیم آرزو سنی
زهرایه بیر اولیدون اؤزون هم زبان باجی
.
سندن اگر چه بیر بو گئجه آیریلوب باشیم
یاددان چیخاتمیوبدی سنی هیچ بیر آن باجی
.
نوکِ جداده شامه یتینجه سنیله وار
سندن بیر آنی آیریلا ائتمه گمان باجی
.
سن کوفیه گیرنده چیخار پیشوازیوه
نامهربان دگُل سنه ، ای مهربان باجی
.
ایمدی جِداده قانلی گوزوم گوزلوری یولون
دور دوشگلَن یولا ، جگری قان اولان باجی
.
عریان جنازه مون بو قدر قالما فکرینه
گونلر ایوینده قوی قالا بی سایبان باجی
.
بیر پارۀ حصیر اولی آخر کفن منه
قبره قویار جنازه می بیر ناتوان ، باجی
.
بوندان صورا سن ایله گیلن اؤز خیالیوی
ای سرو قدّی غصّه و غمدن کمان باجی
.
ابن زیاد مجلسی برپادی کوفه ده
گئت سنده وئر او بزمده بیر امتحان باجی
.
چوخ بی حیالوق ائتسه زیاد اوغلی دؤزگیلن
بادِ فنایه صبریوی وئرمه دایان باجی
.
ایلر یارالی باشیمه بیر ظلم او بی حیا
جدّیم چکر او شومون الیندن امان باجی
.
گورسن فنار آلوب الینه ، باخما یوم گوزون
چکمه نوا گر آغلاسان آغلا نهان باجی
.
ذلّت قبول ایلمه ، پوزما وقاریوی
عجز ایلمه ، شماتت ایدر کوفیان باجی
.
ابنه زیاد مجلسنون ظلمینی گوروب
گئتسون یزید مجلسینه ارمغان باجی
.
یتمز تمامه باشیمون آخر بلالری
تا دگمسه دوداقلاریما خیزران باجی
.
ویردی بو سوزده مرشدِ کامل «شهابه» دم
ای گلستاندا اوز گُلینی آختاران باجی
.
.
.
#ای_گلستاندا_اوز_گلینی_آختاران_باجی
#ترکی
#زبدةالاشعار