بئله ائتمه ناله سکینه جان، بالام آغلاما، قیزیم آغلاما #حضرت_رقیه_صراف_تبریزی

زبانحال جناب زینب خطاب به جناب سکینه خاتون در خرابه (1)
..
..
..
#سبک_بالام_آغلاما_گلوم_آغلاما و … ( 7 سبک برای سینه زنی و زنجیر ) … من عزیز فاطمیم فلک … سن آت اوسته پای پیاده من … بو خرابه نی ایلمه وطن … دولانور علی قیزی مقتلی و … بالام آغلاما … باجی دور گئداخ ..
..
..
مرحوم حاج رضا صراف تبریزی
..
..
..
بئله ائتمه ناله سکینه جان، بالام آغلاما، قیزیم آغلاما (1)
سفره گئدوب گله جک بابان، بالام آغلاما، قیزیم آغلاما
..
..
..
گؤریرم خرابه دی منزلون، غم و رنج و درد و بلالیسان
نه چراغی واردی نه فرشی وار، گونی قاره، باشی قارالیسان
قوری یئرده یاتماقا اینجیمه سن ابوتراب عیالیسان
بو قدر سیزیلداما مهربان بالام آغلاما، قیزیم آغلاما
..
..
..
سن علی اکبر عزیزی سن یئتر عزّت علوی سنه
یخیلوب ائوین، گئدوب عزّتین، یئری وار اولام فدوی سنه
بو خرابه شامده گؤز تیکوب هامی عترت نبوی سنه
باجولار باخور هله بیر زمان، بالام آغلاما، قیزیم آغلاما
..
..
..
یوزه سیل اشکوی باغلاما من اولوم فداسی بو گؤزیاشون
یاتا بولمسن منی داغلاما، دیزیم اوسته دور گتی قوی باشون
بو قدر على دئیوب آغلاما گله جک صباح على قارداشون
منی ائتمه تیر غمه نشان، بالام آغلاما، قیزیم آغلاما
..
..
..
جگرین فراق اودونا یانوب، یئری وار سرشک ترون داشا
دل زارین اود دوتوب اودلانوب، باخارام گؤزونده کی قان یاشا
تؤكولوبدی گؤزیاشون ایسلانوب، داخی من نه کول سووریم باشا
منه سیل کاه اولوب آشیان، بالام آغلاما، قیزیم آغلاما
..
..
..
بولوسن سکینه منیم سنه، نه قدردی میل و محبتیم
سنه غم یئتنده اولور منیم بیره مین علاوه مصیبتیم
بیبون اولسون آغلاما قالمیوب داخی غصه چکمگه طاقتیم
غم الینده باغریم اولوبدور قان، بالام آغلاما، قیزیم آغلاما
..
..
..
بو خرابه ایچره سن اولماسانهانی همدم غمی زینبون
نه علاج ائدیم همی اؤز گونین ائدیسن قرا همی زینبون
سنیلن تسلّی تاپار کؤنول ای انیس همدمی زینبون
نه قالوبدی سنده نه منده جان بالام آغلاما، قیزیم آغلاما
..
..
..
گؤرورم کی بیر دگو محنتون نه دئیم نه قابل پندسن
کسیلوب قراریله طاقتون، یانار اودلار اوزره سپندسن
غم الینده یوخدو فراقتون سر زلف اکبره بندسن
بو بلای عشقدی یان، دایان، بالام آغلاما، قیزیم آغلاما
..
..
..
سن او مرغ بی پر و بال سن كیم اوز آشیانون ائدوب قفس
سن او شمع مجلس حال سن کی یانار بو حالوه هم نفس
سن او غرق بحر ملال سن، غمه غرق اولور سنه دادرس
نه علاج ائدوم من ناتوان، بالام آغلاما، قیزیم آغلاما
..
..
..
بو قدر گناهیلن ای رضا، دئ گؤروم الونده ندور سند؟
یول اوزاق، الون بوش، اؤزؤین قرا، گئجه وقتی سن یولا نابلد
سال أؤزون کمند سکینه یه، سنه بلکه زینب اولا مدد
گئجه گوندوز ائت بو سوزی روان: بالام آغلاما، قیزیم آغلاما
..
..
..
(1) سکینه ↔️ رقیه
..
..
..
#حضرت_رقیه_شهادت #صراف_تبریزی
#بئله_ائتمه_ناله_سکینه_جان_بالام_آغلاما_قیزیم_آغلاما
#ترکی
#زبدةالاشعار