زبانحال حضرت زینب در قتلگاه
.
#زبدةالاشعار
.
: @nohe_torki
.
مرحوم صدری اردبیلی
.
باجی قارداشی تانور گر اولا سالم بدنی
باجون ئولسون تانیوم هانسی علامتله سنی
.
.
نه باشون واردی بدنده نه الون الده سنون
نه لباسون قالوب اگنونده نه بیر پیرهنون
خنجر و تیریله الفت ائلیوب گل بدنون
ووردی بو حالون حسین قلبیمه داغ محنی
.
.
سندن اوتری بو بلا دشتینی ویلان گزدوم
سراغون وئرمدیلر عرصه ده هریان گزدوم
قتلگاهه گذریم دوشدی که نالان گزدوم
جذبۀ مهر فقط ساخلادی بو یئرده منی
.
.
اولماسیدی آرادا واسطه بو مهر و وفا
مشکل امریدی یارالی سنی زینب تانیا
باشیلن الدی حسین جسمه مشخص اونیدا
قویمیوبلار قالا جسمونده حسینجان علنی
.
.
یارالی جسموه اول قدر دگوب تیر و سنان
گورمک اولماز بدنون یاره سینی پیکاندان
خاک و خون ایچره اولوب صفحه ی جسمون پنهان
یوخسا بو یرده ائدوبسن آنام اوغلی وطنی
.
.
گرچه صیاد قضا ایلدی بو یئرده کمین
قاره پوش اولدی حسین عرش خداوند و زمین
بونی بیلّم که کسوب باشووی اول شمر لعین
بیر اوزوک اوسته کسوب اللروی هانسی دنی
.
.
وعده ی وصل قالوب حشره اوزاندی سفرون
ظاهراً اولمیاجاق حال دلیمدن خبرون
وئر اجازه چکوم اوخلاری اوپوم یاره لرون
نئجه باغدا اوپوب ایگللّه گل یاسمنی
.
.
آیریلوق موسمیدور شامه رواندور زینب
پابرهنه باش آچوق قدّی کماندور زینب
اذن وئر ایندی منه اشک فشاندور زینب
قانوی زلفه یاخوب سیر ائدوم هر انجمنی
.
.
بیر سفر ایلموسن بیر گونی مین ایل سایلور
گلمگی یوخ گئدنه دائمی منزل سایلور
پایه ی عشقون عجب گلشنی تکمیل سایلور
سولمیور حشره کیمی بیر ائله گلشن چمنی
.
.
خیلی بی مهرمیش اول گردش ادوار فلک
هئچ کیمه گوزله مه دی دهرده بیر نان و نمک
دئدی اولسون بو حسین قانینه غلطیده گرک
عدنیده داغینی گورسون او رسول مدنی
.
.
ندی تقصیری بونین سؤیله گوروم ای دنیا
بی جهت قانینی جاری ائلدى شمر دغا
یرده قویماز بو قانی حشرده زهرا زهرا
گورسه اوغلون یارالی جسمده یوخ پیرهنی
.
.
صدریا نام حسینی ائلین وقته بیان
بو غمی یاده سالوب گوز یاشوی ایله روان
ایستی قوم اوسته دوشه نعش سلیمان زمان
کسه انگشتیله انگشترین اوز اهرمنی
.
.
#کوچ_کربلا_صدری_اردبیلی
#قتلگاه
#باجی_قارداشی_تانور_گر_اولا_سالم_بدنی
#ترکی
.
#زبدةالاشعار
.
: @nohe_torki
نظر دهید