مدح صدیقه طاهره (س)
.
✍️ #زبدةالاشعار ✍️
.
🆔: @nohe_torki
.
سیفی اردبیلی
.
بزم عرفاندی بورا عشق و تولّا سوزی وار
هنر بی مثل خالق یکتا سوزی وار
عشقیمون خامه سینون صائب و زیبا سوزی وار
جنته فکر ائلمه اوردا که زهرا سوزی وار
اهل عرفانه بو یر میکده ی فاطمه دی
الولا مستینه دانشکده ی فاطمه دی
.
.
.
بذل ائدوبدور عظمت ذات خدا فاطمیه
نور نابیندن ائدوب جوهر عطا فاطمیه
لوح خلقتده یازوب خیر نسا فاطمیه
باش اگر نُه فلک و یدّی سما فاطمیه
سربه سر کون و مکان عزتی زهرادن آلوب
مرتضی پنجه لری قدرتی زهرادن آلوب
.
.
.
شیعه زهرانون آدیندان ائدر احساس غرور
یارادوب عالمی زهرایه گوره حیّ غفور
خلقتون صانع صورتگری معبود شکور
نَفَس فاطمه دن پایلادی اولدوزلارا نور
آب کوثر خانمون شهد و شراب لبی دی
کعبه ی حور و ملک فاطمه چادر شبی دی
.
.
.
انبیا مرشدینه نور بصر فاطمه دی
فیض جانبخش و تجلّای سحر فاطمه دی
گنج عصمتده که تابنده گهر فاطمه دی
گر علی شمس هدایتدی قمر فاطمه دی
دکمه ی پیرهنی حُسن زلیخایه دگر
قاشینون بیر توکی مین هاجر و سارایه دگر
.
.
.
عشق ائویندن اوجالان آهی آلیشدیردی خانم
پر پروانه ایلن ناری باریشدیردی خانم
ظلمتی محو ائلدی نوره قاریشدیردی خانم
دست مریمده ده عیسانی دانیشدیردی خانم
فاطمه شأنینون اندازه سینی یوخدی بیلن
لکّه ی تهمت مریم لری زهرادی سیلن
.
.
.
عشق هاتف لرینه پند و پیامی بو دیوب
زینب شیردله درس قیامی بو دیوب
حیدره غصه گونی انّی اُحامی بو دیوب
نار نمروده ده بَرداً و سلامی بو دیوب
یوسفی فاطمه مستوفی دربار ائلیوب
اودی ابراهیمه زهرادی که گلزار ائلیوب
.
.
.
پشت درده دئمرم فاطمه فریاد ائلدی
گل کیمی دست خزان عمرینی بر باد ائلدی
فاطمه جانینی وقف حقِ اوتاد ائلدی
عشق ایچون زینبی دورد سینّدن استاد ائلدی
بیله انسان داخی اقوام ملل گورمیه جک
روزگارون گوزی زهرایه مثل گورمیه جک
.
.
#فاطمیه_مدح
#بزم_عرفاندی_بورا_عشق_و_تولا_سوزی_وار
#سیفی_اردبیلی
#ترکی
.
✍️ #زبدةالاشعار ✍️
.
🆔: @nohe_torki
نظر دهید