روز بصیرت و گریز به شهادت حضرت علی اصغر علیه السلام
.
مهدی عبادی
.
بصیرتیله گوزوم گور بو دار دنیانی
نَچون بصیر گورر،جمله زشت و زیبانی
.
مطیع امر ولایت گَرک بصیر اولسون
اشاره عاقله کافیدی ، واردی عنوانی
.
ولیّ اَمر سوزی ،فرضدور مسلمانه
کی واردی شاهد عرضیم ،حدیث و قرآنی
.
او کَسکی اَمر وَلی دن اوزون کناره چَکه
اولوبدی تابع شیطان،مطیعِ فرمانی
.
اگرچه فتنه ایدوب ،نچّه ایل قاباق دشمن
ولی ادامه سی وار، فتنه های پنهانی
.
هجوم لشکر شیطان ، چَتین لَشور هرگون
چَکور او جبهیه افراد سست ، ایمانی
.
چوخ امتحان اولوری ادعای دین ایلین
یخوبدی چوخلارینی امتحان ربّانی
.
ولایت اهلی اگر آچسا گوزلرین ، گوره جاق
نه چوخلی مُدّعی لر کی ،اولوبلا شیطانی
.
ولا یولوندا گَرک باش و جاندان اَل اوزماق
وار احتیاجی بو دینون برای قربانی
.
بصیرت اهلی دوتار دامن ولایتدن
تاپار نجات اولاندا ، زمانه طوفانی
.
باش اَگمز اهل ولایت ندای فتنه گره
ایدر همیشه خجل اهل کفر و طغیانی
.
همیشه فتنه سالانلار ذلیل و رسوادی
نَچون بصیر تانور ، گوهر و مُطلّانی
.
همیشه گوش به فرمان رهبر اولمالیدور
او کسلریکی اولوبلار بهشت خواهانی
.
بهشت و حورو قصوری ، دعایه ویرمزلر
کی جنّتین واریدی بیر بَهای شایانی
.
بَلا بَلایه دیین جنّته قویار ایاقین
مَحَک ووراللا بَلائیله اهل ایمانی
.
حسینی چوخلاری یالقیز قویوب او مأواده
امامی ترک ایلین لر اولوبدولار فانی
.
قالانلارین ولی آدی همیشه زنده قالار
حبیب و مسلم و نافع ،بُریریله هانی
.
دیردیلر کی حسینین یولوندا جان ویرّوخ
حسینه تاپمیه اَل ،تابعان سفیانی
.
بویاندی قانینه بیر بیر کمکلری ئولدی
امام سِیر ایلیَردی ،اوقانلی میدانی
.
بویوردی لشکره ای قوم باطل و بی دین
ندندی قطع ایدیسیز ،جمله نسل طاهانی
.
تمام ،یاور و انصاریمی شهید ایلدوز
قالور فقط بو حسینین ،بلالی بیر جانی
.
کیم ایستیری اَلینی من توتام قیامتده
کمکلیق ایتسون حسینه بو وقت پایانی
.
امام یار و مُعین ایستینده دشمندن
او دمده اهل خیامین اوجالدی افغانی
.
قیتدی شاه شهیدان ، خیامه سرعتیلن
سوال ایتدی نه وار، زینب ای آنام جانی
.
مگر سیزه دیمه دیم تا وارام من آغلامیون؟
شمادت ایلوری دشمن،توتوبلار هریانی
.
جواب ویردی حسین، واردی علّت آغلییروخ
ایدوبدی دیده میزی بیر قضیّه بارانی
.
دیَنده لشکره هَل مِن مُعین ، آنام اوغلی
اثر ایدوبدی بیزه اول ندای رحمانی
.
ولیک هامّیدان آرتوخ گلوبدی شوره علی
اوزون سالوب یره گهواره دن ،وار عنوانی
.
کی یعنی خیرداجا سربازیوی اونوتما بابا
چاغیرما نُصرتیوه ،سن گروه اعدانی
.
آلوب اَل اوسته بالاسین گیدوب، قیتدی امام
گوروبدی زینب آخور اصغرین قیزیل قانی
.
آلاندا نعش علینی ،حسین فاطمه دن
چاغیردی رأفتیله تا رباب تنهانی
.
بویوردی حرمله آرام ایدوب بالاوی رباب
کی خواب ناز آپاروبدور ، بو طفل عطشانی
.
آناسی فکر ایلدی،اصغری اولوب سیراب
تَرحُّم ایتدی اونا ،قوم کافر و جانی
.
صغیره قیزلارا سویلردی ،دینمیون اویانار
آتاسی زحمتیله ،یوخلادوب بو نالانی
.
یاخونلاشاندا نه گوردی بیچوبدی اوخ بوغازین
بوغازینون قانی رنگین ایدوبدی دامانی
.
دیردی چوخ دیمیشم آغلاما ،ولی آغلا
رعایت ایتمه داخی سن عروس زهرانی
.
خجالتم بالا سندن اَلیوی باغلامیشام
بِجادی کوسسن اوغول ،ای قتیل سبحانی
.
بو چولده قویدون علی بیکس و غریب منی
او درده سالدون آناوی ،کی یوخدی درمانی
.
قلم دایانموری (بیکَس)اوزون دایان بسدی
ولیک یادیوه سال نازنین اَحِبّانی
.
عریضه صاحبی (بهنام) آدینلی قارداشون
بو نچّه خطّه اولوبدور او با صفا بانی
.
خدادن ایسته میشم منده قانیمه بویانام
اوحالتیله گورم ،شافعان عقبانی
.
.
#بصیرت
#اصغریه_شهادت #اصغریه
#9دی #مهدی_عبادی
.
.
نظر دهید