صحنه ای از #شام_غریبان امام حسین (ع)
.
.
مرحوم حسینی سعدی زمان
.
.
بلا چولینده او گونکه شهید ایتدیله شاهی
خیام عصمتی یاندوردی شام و کوفه سپاهی
.
غروب ایلدی خورشید تاپدی خاتمه غارت
عقیلة العربین گتدى الدن عزّت و جاهی
.
یانان چادردا خواتین نازه ویردیله مسکن
سرشگ چشم لری ایتدی شرمسار میاهی
.
چخوب کناره دل شبده فاطمه قیزی زینب
کمال وحشتیله سینه سینده گزلدوب آهی
.
خمیده قدّیله آهسته گلدی تلّده دوردی
ویروردی وحشتینه اضطراب قلب گواهی
.
کمال خوفیله آغلار گوزی صاقا صولا باخدی
دوشوب او حالده قربانگه حسینه نگاهی
.
منای عشقده گوردی دوشن گل اوزلی فدالر
نشان ویرولَّه گلی گلستاندا باغدا گیاهی
.
آیون دوشوب ایشیقی گورسنور یارالی بدنلر
ایدولَّه جلب نظر، کهربا چکر نجه کاهی
.
مناظر اسف انگیزه حیرتیله باخوردی
جنازه لر آراسیندا گوروب گوروندی سیاهی
.
ئولنلره او سیاهی باخور گیچور مُتحیّر
خمیده قدّین ایدور گاه راست قدّینی گاهی
.
او وضع حالی گورنده بتوله نائبه بُلدی
که سارباندی گلوب آختارور جنازۀ شاهی
.
پوزولدی حال پریشانی قلب پاکی دوگوندی
بولوب او مجمعه گلماقدا وار نه فکر تباهی
.
کومک لیقا گیده بُلموردی دیزلری یریموردی
توان و طاقتین آلمیشدی اضطراب و دواهی
.
کسیلدی چاره سی هر یاندان اضطرارده قالدى
یوزین دوتوبدی سپهره مخاطب ایلدی ماهی
.
حسینه رحم ایله ای قرص ماه نوروی گیزلت
که بلکه ظلمت اولا ساربان تاپانمیا راهی
.
گلور الین کسه ایوای یوخدی بیر دییَن آخر
ندور بو یالقیز اوغولسوز غریب شاه گناهی
.
باشین کسوبله سویوبلار لباسینی قالوب عریان
بو بیکسین گوروسن یوخدی بیر معین و پناهی
.
کلام ناطقین اعضاسین ایلیوبدیله اوراق
بُلویدی قتلینی امر ثواب قوم مَناهی
.
بیر آسماندی وجود شریفی، زخمی ستاره
محالدور که سایا بیر نفر فلکده ستاهی
.
نگین دست سلیمانی، اهرمن آپاروبدی
محالدور تاپا بلقیس رو عیالی رفاهی
.
امامین ئولدوروب اسلام دینیمیزدی دییَن لر
ولیک کفردی اسلامده بو دعوی واهی
.
مدینه یوسفی گرگان شام الینده قالوبدی
عزیز فاطمه نین قانلو قتلگاهیدی چاهی
.
امامتین گونی ایلوب غروب قانلو شفقده
دولوبدی ابر بلائیله جوّ لایتناهی
.
آخوب یارالارینون قانی قتلگهده وورور موج
باخان دیر که شناوردی قانلو لُجَّه ده ماهی
.
غروب ایله و یا سال بولوددان عارضه پرده
گورنمسین اونی جَمّال کور چشم کماهی
.
«حسینی» گر چه مقصّردی لیک عمر عزیزین
بو آستانه ده صرف ایلیوب باغیشلا الهی
.
سنه اؤزون بُلوسن ایتمیوب مخالفت عمداً
حسینه، زینب کبرایه گئچ اگر اولا ساهی
.
.
.
#حسینیه #سعدی_زمان #حسینیه_شهادت #ترکی #زبدةالاشعار #آثارالحسینی1
نظر دهید